30/05/2017 10:29 GMT+7 Email Print Like 0

ຊຸກຍູ້ການພົວພັນຄູ່ຮ່ວມມືຮອບດ້ານຫວຽດນາມ-ອາເມລິກາໃຫ້ພັດທະນາ

      ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ພວມຢ້ຽມຢາມສະຫະລັດອາເມລິກາ ຢ່າງເປັນທາງການ ໃນລະຫວ່າງວັນທີ 29 – 31 ພຶດສະພາ. ການຢ້ຽມຢາມອາເມລິກາ ຢ່າງເປັນທາງການຄັ້ງທຳອິດຂອງທ່ານນາຍົກລັດຖະມົນຕີ ຫງວຽນຊວນຟຸກ ໃນຖານະຕຳແໜ່ງເປັນນາຍົກລັດຖະມົນຕີ ແລະ ແມ່ນການພົບປະຄັ້ງທຳອິດລະຫວ່າງການນຳຫວຽດນາມ ແລະ ທ່ານປະທານາທິບໍດີອາມເລິກາ Donald Trump ມີຄວາມໝາຍສຳຄັນພິເສດສຳລັບອະນາຄົດຂອງການພົວພັນຮ່ວມມືຫວຽດນາມ - ອາເມລິກາ. ບົດຂຽນຂອງບັນນາທິການ ທູຮວາ ດ້ວຍຫົວຂໍ້ວ່າ ຊຸກຍູ້ການພົວພັນຄູ່ຮ່ວມມືຮອບດ້ານຫວຽດນາມ - ອາເມລິກາ ໃຫ້ພັດທະນາ”.
      ນັບແຕ່ເມື່ອສ້າງການພົວພັນລະຫວ່າງ 2 ປະເທດຫວຽດນາມ - ອາເມລິກາ ເປັນປົກກະຕິເມື່ອເດືອນ ກໍລະກົດ ປີ 1995 ເປັນຕົ້ນມາ, ການພົວພັນດ້ານການເມືອງ, ການທູດລະຫວ່າງຫວຽດນາມ - ອາເມລິກາ ໄດ້ຮັບການພັດທະນາຢ່າງໜັກແໜ້ນເທື່ອລະກ້າວ. ເດືອນ ກໍລະກົດ ປີ 2013, 2 ປະເທດໄດ້ສ້າງຕັ້ງການພົວພັນຄູ່ຮ່ວມມືຮອບດ້ານ. ບົນພື້ນຖານນັ້ນ, ການພົວພັນຫວຽດນາມ - ອາເມລິກາ ບັນລຸໄດ້ບາດກ້າວພັດທະນາໃໝ່ຫຼາຍຢ່າງໃນທຸກຂົງເຂດ, ນັບທັງການພົວພັນ 2 ຝ່າຍ ແລະ ຫຼາຍຝ່າຍ.
 

(ພາບປະກອບອີນເຕີແນັດ)
      ການພົວພັນຄູ່ຮ່ວມມືຮອບດ້ານພັດທະນາຢ່າງບໍ່ຢຸດຢັ້ງ
        ຫວຽດນາມ ແລະ ອາເມລິກາ ໄດ້ຮັກສາ, ເພີ່ມທະວີການແລກປ່ຽນຄະນະຜູ້ແທນຂັ້ນສູງ ແລະ ທຸກຂັ້ນຢ່າງຕໍ່ເນື່ອງ ເພື່ອປັບປຸງການພົວພັນຄູ່ຮ່ວມມືຮອບດ້ານນີ້. ເດືອນກໍລະກົດ ປີ 2015, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟຸຈ້ອງ ໄດ້ໄປຢ້ຽມຢາມອາເມລິກາຢ່າງເປັນທາງການ, ໄດ້ເປັນຂີດໝາຍປະຫວັດສາດໃນຂອບເຂດການພົວພັນຄູ່ຮ່ວມມືຮອບດ້ານລະຫວ່າງ 2 ປະເທດ. ໃນເດືອນ ພຶດສະພາປີ 2016, ປະທານາທິບໍດີອາເມລິກາ ໃນຄາວນັ້ນແມ່ນທ່ານ Barack Obama ໄດ້ມາຢ້ຽມຢາມຫວຽດນາມ ຢ່າງເປັນທາງການ. ຕໍ່ຈາກນັ້ນ, ໃນເດືອນມັງກອນປີ 2017, ທ່ານອະດີດລັດຖະມົນຕີການຕ່າງປະເທດອາເມລິກາ John Kerry ໄດ້ມາຢ້ຽມຢາມຫວຽດນາມ… ພາຍຫຼັງທ່ານປະທານາທິບໍດີ Donald Trump ໄດ້ຮັບໄຊຊະນະໃນການເລືອກຕັ້ງ, ຫວຽດນາມ ແລະ ອາເມລິກາ ສືບຕໍ່ຮັກສາບັນດາການເຄື່ອນໄຫວແລກປ່ຽນ 2 ຝ່າຍ. ຫວ່າງມໍ່ໆມານີ້, ໃນເດືອນ ເມສາ ປີ 2017, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຟ້າມບິ່ງມິງ ໄດ້ໄປຢ້ຽມຢາມອາເມລິກາ ຢ່າງເປັນທາງການ ແລະ ໄດ້ພົບປະກັບການນຳຂັ້ນສູງຂອງອາເມລິກາ ຫຼາຍທ່ານ.
        ພ້ອມກັບການພົວພັນດ້ານການເມືອງອັນດີງາມນັ້ນ, ບັນດາການເຄື່ອນໄຫວຮ່ວມມືດ້ານການຄ້າ ແລະ ການລົງທຶນລະຫວ່າງ 2 ປະເທດກໍບັນລຸໄດ້ໝາກຜົນທີ່ຕັ້ງໜ້າ. ອາເມລິກາ ພວມແມ່ນໜຶ່ງໃນບັນດາຄູ່ຄ້າແຖວໜ້າຂອງຫວຽດນາມ ດ້ວຍວົງເງິນການຄ້າ 2 ສົ້ນເຕີບໂຕຢ່າງຕໍ່ເນື່ອງ ຢູ່ໃນດັບ 20% ໃນຊຸມປີມໍ່ໆມານີ້ ແລະ ບັນລຸ 53 ຕື້ USD ໃນປີ 2016. ກ່ຽວກັບການລົງທຶນ, ຮອດທ້າຍປີ 2016, ອາເມລິກາ ຢືນອັນດັບ 8/112 ປະເທດ ແລະ ເຂດແຄ້ວນທີ່ມີທຶນ FDI ຢູ່ຫວຽດນາມ, ດ້ວຍ 815 ໂຄງການ, ຍອດຈຳນວນທຶນຈົດທະບຽນແມ່ນກວ່າ 10 ຕື້ USD.
        ການສຶກສາ, ການທ່ອງທ່ຽວ ແລະ ການພົບປະແລກປ່ຽນປະຊາຊົນ ກໍ່ແມ່ນຂົງເຂດເຊິ່ງ 2 ປະເທດມີການຮ່ວມມືຢ່າງມີປະສິດທິຜົນ. ໄລ່ຮອດເດືອນ ພະຈິກ ປີ 2016, ໄດ້ມີນັກສຶກສາ, ນັກຝຶກງານຫວຽດນາມ ພວມຮ່ຳຮຽນຢູ່ອາເມລິກາ ກວ່າ 31.000 ຄົນ, ຢືນແຖວໜ້າໃນຈຳນວນບັນດາປະເທດອາຊີຕາເວັນອອກສ່ຽງໃຕ້ ແລະ ຢືນອັນດັບທີ 6 ໃນຈຳນວນບັນດາປະເທດທີ່ມີນັກສຶກສາໄປຮ່ຳຮຽນຢູ່ອາເມລິກາ. ຫວຽດນາມ - ອາເມລິກາ ກໍ່ພວມຕັ້ງໜ້າຜັນຂະຫຍາຍໂຄງການມະຫາວິທະຍາໄລ Fulbright ຢູ່ຫວຽດນາມ.
        ໃນສະພາບພາກພື້ນ ແລະ ຫຼາຍຝ່າຍ, ຫວຽດນາມ - ອາເມລິກາ ເພີ່ມທະວີການສົມທົບກັນຢູ່ບັນດາເວທີປາໄສພາກພື້ນຄື: APEC, ARF, ADMM+, LMI, EAS, ໃນນັ້ນມີບັນດາບັນຫາພາກພື້ນຄື: ຄວາມປອດໄພໃນການເດີນທະເລ, ເຊີດຊູບົດບາດໃຈກາງຂອງອາຊຽນ, ຜັນຂະຫຍາຍຄູ່ຮ່ວມມືຍຸດທະສາດອາເມລິກາ - ອາຊຽນ ກໍຄືບັນດາບັນຫາທົ່ວໂລກອື່ນໆຄື: ຕ້ານການກໍ່ການຮ້າຍ, ຕ້ານອາວຸດລ້າງຜານ… 2 ຝ່າຍກໍ່ໄດ້ສືບຕໍ່ເຈລະຈາກ່ຽວກັບບັນດາສິດທິມະນຸດບົນຈິດໃຈຢ່າງກົງໄປກົງມາ, ສ້າງສັນ ແລະ ເຄົາລົບຄວາມແຕກຕ່າງຂອງກັນ. ໃນນັ້ນ, ຫວຽດນາມ - ອາເມລິກາ ໄດ້ສົມທົບກັນຈັດຕັ້ງການເຈລະຈາສິດທິມະນຸດຄັ້ງທີ 20 ຢູ່ ວໍຊິຕັນ ດີຊີ ເປັນຢ່າງດີ ແລະ ຮອບເຈລະຈາຄັ້ງທີ 21 ທີ່ພວມດຳເນີນຢູ່ຮ່າໂນ້ຍ.

        ສ້າງທ່າໃຫ້ແກ່ການຮ່ວມມື ແລະ ພັດທະນາການພົວພັນ 2 ຝ່າຍ
        ການຢ້ຽມຢາມອາເມລິກາ ຢ່າງເປັນທາງການຂອງທ່ານນາຍົກລັດຖະມົນຕີ ຫງວຽນຊວນຟຸກ ມີຄວາມໝາຍສຳຄັນຍິ່ງ ແລະ ມີລັກສະນະເປັນສັນຍາລັກສູງ, ແມ່ນກາລະໂອກາດເພື່ອສະແດງໃຫ້ເຫັນຢ່າງຈະແຈ້ງບົດບາດນຳໜ້າຂອງຫວຽດນາມ ໃນອາຊຽນ ແລະ ທີ່ຕັ້ງບົດບາດຂອງຫວຽດນາມ ຄືດັ່ງຄູ່ຮ່ວມມືເສດຖະກິດ ແລະ ຄວາມໝັ້ນຄົງຫຼັກແຫຼ່ງຂອງອາເມລິກາ. ບັນດາໜັງສືພິມ, ສຳນັກຂ່າວສານສາກົນຄື: Reuters, Forbes, VOA, Manila Bulletin… ໄດ້ອອກຂ່າວກ່ຽວກັບການຢ້ຽມຢາມອາເມລິກາ ຢ່າງເປັນທາງການຂອງທ່ານນາຍົກລັດຖະມົນຕີ ຫງວຽນຊວນຟຸກ ພ້ອມກັນສະແດງຄວາມຄິດເຫັນ. Reuters ໄດ້ຄັດຖະແຫຼງການຈາກທຳນຽບຂາວ ໃນວັນທີ 23 ພຶດສະພາ ໂດຍໃຫ້ຮູ້ວ່າ, ທ່ານປະທານາທິບໍດີ Donald Trump ຈະຕ້ອນຮັບທ່ານນາຍົກລັດຖະມົນຕີ ຫງວຽນຊວນຟຸກ ຢູ່ທຳນຽບຂາວ ໃນວັນທີ 31 ພຶດສາພາ ເພື່ອປຶກສາຫາລືກ່ຽວກັບການພົວພັນ 2 ຝ່າຍ ແລະ ການຮ່ວມມືໃນພາກພື້ນ. ສ່ວນຕາມ VOA ແລ້ວ, ທ່ານນາຍົກລັດຖະມົນຕີຫວຽດນາມ ຈະກາຍເປັນການນຳອາຊີຕາເວັນອອກສ່ຽງໃຕ້ຜູ້ທຳອິດ ມາຢ້ຽມຢາມທຳນຽບຂາວ ນັບແຕ່ເມື່ອທ່ານ Donald Trump ຮັບດຳລົງຕຳແໜ່ງເປັນປະທານາທິບໍດີອາເມລິກາ ໃນເດືອນ ມັງກອນ ປີ 2017. ໜັງສືພິມ Manila Bulletin ກໍຄັດຄຳເວົ້າຂອງເລຂາການຂ່າວທຳນຽບຂາວ Sean Spicer ວ່າ “ທ່ານປະທານາທິບໍດີ Donald Trump ລໍຖ້າການປຶກສາຫາລືບັນດາມາດຕະການເພີ່ມທະວີການພົວພັນ 2 ຝ່າຍ ແລະ ເຮັດໃຫ້ການຮ່ວມມືພາກພື້ນເລິກເຊິ່ງກວ່າ ກັບໜຶ່ງໃນບັນດາຄູ່ຮ່ວມມືສຳຄັນຂອງອາເມລິກາ ຢູ່ອາຊີຕາເວັນອອກສ່ຽງໃຕ້”.
        ດ້ວຍບັນດາຜົນສຳເລັດບົນພື້ນຖານການຮ່ວມມືທີ່ມີຢູ່ແລ້ວ, ຄວາມໄວ້ເນື້ອເຊື່ອໃຈ, ຄວາມເຂົ້າອົກເຂົ້າໃຈ ແລະ ເຄົາລົບເຊິ່ງກັນ ແລະ ກັນ, ການຢ້ຽມຢາມອາເມລິກາ ຢ່າງເປັນທາງການຂອງທ່ານນາຍົກລັດຖະມົນຕີ ຫງວຽນຊວນຟຸກ ຈະຊຸກຍູ້ການພົວພັນຮ່ວມມືຄູ່ຮ່ວມມືຮອບດ້ານຫວຽດນາມ - ອາເມລິກາ ກວ່າອີກ; ນຳມາເຊິ່ງບັນດາກາລະໂອກາດໃໝ່ໃຫ້ແກ່ 2 ປະເທດ, ເພື່ອຜົນປະໂຫຍດ, ຄວາມວັດທະນາຖາວອນພັດທະນາລວມຂອງ 2 ປະເທດ; ເພື່ອສັນຕິພາບ, ສະຖຽນລະພາບ ແລະ ການຮ່ວມມືໃນພາກພື້ນ.
 (ແຫຼ່ງຄັດຈາກ VOV)