នាថ្ងៃ២០ ខែមករា នៅទីក្រុងហាណូយ បានប្រព្រឹត្តទៅកិច្ចប្រជុំពិគ្រោះយោបល់នយោបាយប្រចាំឆ្នាំលើកទី៧ នៃអនុរដ្ឋមន្រ្តីការបរទេសរវាងវៀតណាម និងថៃក្រោមអធិបតីភាពលោក Nguyen Quoc Dung អនុរដ្ឋមន្រ្តីវៀតណាម និងលោកស្រី Busaya Mathelin លេខាធិការអចិន្រ្តៃយ៍នៃក្រសួងការបរទេសថៃ។
ភាគីទាំងពីរបានវាយតម្លៃថា ទំនាក់ទំនងមិត្តភាព និងដៃគូយុទ្ធសាស្រ្តវៀតណាម-ថៃបានរីកចម្រើនយ៉ាងខ្លាំងក្លា។ ភាគីទាំងពីរបានឯកភាពបង្កើនការផ្លាស់ប្តូរគណៈប្រតិភូជាន់ខ្ពស់ និងគ្រប់លំដាប់ថ្នាក់នៅពេលខាងមុខនេះ។ ភាគីទាំងពីរក៏សហការត្រៀមរៀបចំឲ្យល្អនូវកិច្ចប្រជុំលើកទី ៤ គណៈរដ្ឋមន្រ្តីវៀតណាម-ថៃនៅវៀតណាម ដែលដឹកនាំដោយនាយករដ្ឋមន្រ្តីនៃប្រទេសទាំងពីរនៅឆ្នាំ ២០២០ និងជម្រុញទំនាក់ទំនងសហប្រតិបត្តិការលើគ្រប់វិស័យរវាងប្រទេសទាំងពីរ ពង្រីកទំនាក់ទំនងសហប្រតិបត្តិការល្អប្រសើររវាងក្រសួងការបរទេសនៃប្រទេសទាំងពីរតាមកិច្ចព្រមព្រៀងសហប្រតិបត្តិការរវាងក្រសួងទាំងពីរ (ឆ្នាំ២០១៥)។
លោក Nguyen Quoc Dung និងលោកស្រី Busaya Mathelin (រូបថត៖ baoquocte.vn)
លោក Nguyen Quoc Dung សង្កត់ធ្ងន់ថា ក្នុងស្ថានភាពបច្ចុប្បន្នអាស៊ានគប្បីបង្កើនសាមគ្គីភព ជម្រុញការអនុវត្តប្រកបដោយជោគជ័យនូវការងារនៃសហគមន៍អាស៊ាន បញ្ជាក់តួនាទីជាស្នូលរបស់អាស៊ានក្នុងតំបន់។ ទន្ទឹមនឹងនោះ ជាសមាជិកនៃយន្តការអនុតំបន់ទន្លេមេគង្គ វៀតណាមនិងថៃគប្បីបង្កើនកិច្ចសហការ និងការចែករំលែកបទពិសោធន៍ជាមួយប្រទេសសមាជិកដទៃនិងដៃគូផ្សេងៗ ដើម្បីជម្រុញកិច្ចសហប្រតិបត្តិការនៅអនុតំបន់ទន្លេមេគង្គ។ លោក Nguyen Quoc Dung ស្នើឲ្យប្រទេសថៃសហការជាមួយវៀតណាមក្នុងបញ្ហាសន្តិសុខតំបន់ រួមទាំងបញ្ហាសមុទ្រខាងកើតនិងការគ្រប់គ្រងធនធានទឹកទន្លេមេគង្គ៕
តាមកាសែតកងទ័ពប្រជាជនអនឡាញ