កាលនៅមានជីវិត ជីដូនខ្ញុំតែងធ្វើម្ហូបញាំត្រយោងចេកក្នុងថ្ងៃបុណ្យដា បុណ្យចូលឆ្នាំវៀតណាម ឬរដូវប្រាំងរាំងហួតហែង ធ្វើឲ្យបន្លែផ្សេងៗមិនអាចដុះលូតលាស់បានក្នុងចម្ការ។ ជីដូនមានប្រសាសន៍ថា ដើមចេកជាគ្រឿងរំដោះទុក្ខ របស់តំបន់ជនបទនៅរដូវស្រូវដាច់ជង្រុក អាចច្នៃជាម្ហូបដូចជា ធ្វើជាបន្លែស្រស់ ស្រុស ចំហុយ ញាំ។
ចម្ការផ្ទះខ្ញុំ មានចេកដុះជុំវិញរបង ពេលចេកចេញត្រយោងធំស្មើរកំភូនជើង គឺជីដូនគាត់កាច់ ហើយយកកាំបិតហាន់ស្តើងៗ រួចដាក់ចូលទៅត្រាំក្នុងទឹកអំបិល ដើម្បីបំបាត់ជាតិជ័រ និងបន្ថយកម្រិតចត់។ ពេលនោះ ខ្ញុំលោតខ្មាញ់ដូចសត្វសារិការកែវអញ្ចឹង ពេលបានជីដូនប្រើឲ្យទៅចំការបេះគ្រឿងផ្សំដូចជា ជីរណា ជីនាងវង ជីពងទាកូន។ ជាមួយវត្ថុមានស្រាប់ៗ គ្រាន់តែបន្ថែមបន្តិចសណ្តែកដីលីង គឺស្ពក់បាយសាមញ្ញមានម្ហូបញាំត្រយោងចេក យ៉ាងជក់ចិត្ត មកដល់សព្វថ្ងៃពេលនឹកឃើញឡើងវិញ ខ្ញុំនៅតែមានអារម្មណ៍ចាប់បាននូវរសជាតិស្រួយរលាយជាប់អណ្តាត ឈ្ងុយគ្រឿងទេសចម្ការជនបទដែលជីដូនបានធ្វើ។
 សព្វថ្ងៃ ជីវភាពរស់នៅកាន់តែរីកចម្រើនឡើង វត្ថុសំរាប់ធ្វើញាំត្រយោងចេកកាន់តែសម្បូរបែបជាង ទៅតាមតំបន់និងចំណូលចិត្តពិសា។  នៅទីក្រុងធំ ភោជនិយដ្ឋាន សណ្ឋាគារជាច្រើន តែងបន្ថែមសាច់មាន់ស្រុក ហែកជាបន្ទះតូចៗ ដើម្បីធ្វើម្ហូបញាំត្រយោងចេក។  ជីពងទាកូន និងគ្រឿងផ្សំផ្សេងៗ ដូចខ្ទឹមបារាំង ក្រូចឆ្មា និងម្ទេស នឹងធ្វើឲ្យរសជាតិរបស់ម្ហូបញាំត្រយោងចេកកើនឡើងមួយកម្រិត។  ចុងភៅល្បីឈ្មោះ ពេលធ្វើម្ហូបញាំត្រយោងចេកតែងតែបន្ថែមការូត ហាន់បន្ទះតូចៗ ដើម្បីបង្កើនរសជាតិស្រួយ និងបំប៉ន់ជាតិវិតាមីនអា ឲ្យអ្នកពិសា។  ម្ហូបញាំត្រយោងចេក ច្របល់ជាមួយសាច់មាន់ហែក ជាម្ហូបអាហារឆ្ងាញ់ មានជាតិបំប៉ន់ និងងាយស្រួលធ្វើ។  របៀបតុបតែងម្ហូបញាំត្រយោងចេកជក់ចិត្តសម្រាប់ជប់លៀងភ្ញៀវ។ |
ជីដូនខ្ញុំបានចែកឋានប្រហែលជាជាង២០ឆ្នាំទៅហើយ ចម្ការចេកខៀងស្រងាត់នៅភូមិកំណើត ក៏ត្រូវកាប់បំផាញ ដើម្បីកសាងផ្ទះជាន់អស់ទៅហើយ ខ្ញុំក៏ធ្លាប់បានភ្លក្សរសជាតិម្ហូបញាំត្រយោងចេករាប់រយតំបន់។ តំបន់នីមួយៗមានរសជាតិដោយឡែក របៀបធ្វើក៍ដោយឡែក។ ឧទាហរណ៍ដូចជា អ្នកនៅភាគខាងត្បូង តែងបន្ថែមបង្គា សាច់ជ្រូក សាច់មាន់ ឬងៀតគោ ចូលទៅក្នុងម្ហូបញាំ ពិសាផ្សំជាមួយនំក្រៀប រីឯអ្នកតំបន់សមុទ្រតែងតែបន្ថែម មឹកបន្តិច ដើម្បីឲ្យម្ហូបកាន់តែឆ្ងាញ់ពិសា។
ឥឡូវនេះ រាល់លើកអង្គុយមុខតុអាហារ មានម្ហូបញាំត្រយោងចេក ខ្ញុំបែរជាមានអារម្មណ៍ថានឹកដល់ស្រុកកំណើតដ៏កំសត់ មានចម្ការចេកជាមួយពេលបាយសាមញ្ញ មានរសជាតិស្រួលរលាយជាប់អណ្តាត នៃម្ហូបញាំត្រយោងចេករបស់ជីដូនធ្វើ៕
អនុវត្ត៖ ង្វៀនឡឹន
