ចាប់ពីថ្ងៃទី២៨ ដល់ថ្ងៃទី៣០ ខែកញ្ញា ឆ្នាំ២០២២ នៅប្រទេសកូរ៉េខាងត្បូង គណៈប្រតិភូបក្សកុម្មុយនិស្តវៀតណាមបានអញ្ជើញចូលរួមសន្និសីទពិសេសនៃសន្និសីទអន្តរជាតិនៃគណបក្សនយោបាយអាស៊ី (ICAPP) ក្រោមប្រធានបទ “ការអភិវឌ្ឍ នយោបាយនៅអាស៊ីតាមរយៈគណបក្សនយោបាយ”។ ICAPP ត្រូវបានបង្កើតឡើងក្នុងខែកញ្ញា ឆ្នាំ ២០០០ ជាមួយគោលដៅជំរុញការផ្លាស់ប្ដូរ និងកិច្ចសហប្រតិបត្តិការរវាងគណបក្សនយោបាយអាស៊ី។

សន្និសីទដ៏ពិសេសលើកនេះស្តីពី "ការអភិវឌ្ឍនយោបាយរបស់អាស៊ី តាមរយៈគណបក្សនយោបាយ" សំដៅបង្កើនកិច្ចសហប្រតិបត្តិការថែមទៀតរវាងគណបក្សនយោបាយ រក្សាសន្តិភាព សន្តិសុខ វិបុលភាព និងការអភិវឌ្ឍនៅតំបន់ និងនៅលើពិភពលោក។ អង្គសន្និសីទបានអនុម័តជាឯកច្ឆ័ន្ទលើ "សេចក្តីថ្លែងការណ៍ទីក្រុងសេអ៊ូល" ដោយបានអះអាងពីសារៈសំខាន់នៃការជំរុញកិច្ចសហប្រតិបត្តិការ និងសម្របសម្រួលរវាងគណបក្សនយោបាយនៅអាស៊ីចំពោះការអភិវឌ្ឍនយោបាយរបស់តំបន់នាពេលអនាគត។

គណៈប្រតិភូបក្សកុម្មុយនិស្តវៀតណាមបានពិភាក្សាយ៉ាងសកម្មនៅក្នុងសន្និសីទ និងថ្លែងសុន្ទរកថាក្នុងសម័យប្រជុំស្តីពី “តួនាទីរបស់គណបក្សនយោបាយក្នុងការជំរុញប្រជាធិបតេយ្យ”។ នៅខាងក្រៅសន្និសីទ គណៈប្រតិភូបានជួបធ្វើការជាមួយគណបក្សនយោបាយរបស់ប្រទេសជាច្រើន ដើម្បីជំរុញកិច្ចសហប្រតិបត្តិការនាពេលខាងមុខផងដែរ៕