នៅក្នុងកិច្ចប្រជុំជាមួយអនុប្រធានគណៈកម្មការអឺរ៉ុប និងជាតំណាងជាន់ខ្ពស់នៃសហភាពអឺរ៉ុបទទួលបន្ទុកកិច្ចការបរទេស និងគោលនយោបាយសន្តិសុខ លោកស្រី Kaja Kallas នៅថ្ងៃទី ២១ ខែតុលា នៅទីក្រុងព្រុចសែល ប្រទេសបែលហ្ស៊ិក ក្នុងក្របខ័ណ្ឌនៃដំណើរទស្សនកិច្ចជាផ្លូវការទៅកាន់សហភាពអឺរ៉ុបរបស់​អគ្គលេខាបក្ស ប្រធានរដ្ឋវៀតណាម លោក តូ ឡាំ រដ្ឋមន្ត្រីក្រសួងការបរទេសវៀតណាម​ លោក ឡេ ហោយជុង បានថ្លែងអំណរគុណដល់លោកស្រី Kaja Kallas និងភ្នាក់​ងារកិច្ចការបរទេសអឺរ៉ុបចំពោះកិច្ចសហប្រតិបត្តិការយ៉ាងជិតស្និទ្ធ និងមានប្រសិទ្ធភាពក្នុងការរៀបចំដំណើរទស្សនកិច្ចនេះ។ រដ្ឋមន្ត្រីបានសង្កត់ធ្ងន់ថា ដំណើរទស្សនកិច្ចនេះ​មានសារៈសំខាន់ជាប្រវត្តិសាស្ត្រ ដែលបង្ហាញពីទំនុកចិត្តនយោបាយកាន់តែស៊ីជម្រៅ និងការប្តេជ្ញាចិត្តយ៉ាងមុតមាំរបស់ភាគីទាំងពីរ ក្នុងការអភិវឌ្ឍភាពជាដៃគូយុទ្ធសាស្ត្រគ្រប់ជ្រុងជ្រោយវៀតណាម-សហភាពអឺរ៉ុប​ឡើងដល់កម្ពស់ថ្មីមួយ ក្នុងលក្ខណៈតាមទិស​ជាក់ស្តែង និងមានប្រសិទ្ធភាព។ វៀតណាមក៏ត្រៀមខ្លួនរួចជាស្រេចដើម្បីបន្តដើរតួនាទីជាស្ពានតភ្ជាប់ ដោយលើកកម្ពស់ទំនាក់ទំនងអាស៊ាន-សហភាពអឺរ៉ុបឱ្យអភិវឌ្ឍកាន់តែស៊ីជម្រៅ និងជាក់ស្តែង។

រីឯខ្លួនវិញ តំណាងជាន់ខ្ពស់ លោកស្រី Kaja Kallas បានបញ្ជាក់ថា សហភាពអឺរ៉ុបឱ្យតម្លៃចំពោះទំនាក់ទំនងជាមួយវៀតណាម ដែលជាដៃគូអាទិភាពរបស់ EU នៅក្នុងតំបន់ឥណ្ឌូ-ប៉ាស៊ីហ្វិក។ លោកស្រី Kaja Kallas បានសង្កត់ធ្ងន់ថា វៀតណាម និង EU ចែករំលែកទស្សនៈ និងផលប្រយោជន៍ជាច្រើនក្នុងការ​ជំរុញពហុភាគីនិយម រក្សាសណ្តាប់ធ្នាប់អន្តរជាតិដោយផ្អែកលើច្បាប់ គាំទ្រពាណិជ្ជកម្មសេរី ធានាសន្តិសុខ សុវត្ថិភាព និងសេរីភាពនាវាចរណ៍ និងអាកាសចរណ៍ ព្រមទាំងដោះស្រាយជម្លោះដោយសន្តិវិធីដោយផ្អែកលើច្បាប់អន្តរជាតិ៕​