នារសៀលថ្ងៃទី ២៧ មេសា នៅទីក្រុងហាណូយ ឧបនាយករដ្ឋមន្ត្រីវៀតណាមលោក Vu Duc Dam បានអញ្ជើញទទួលជួបលោកបណ្ឌិត Kidong Park ប្រធានតំណាងអង្គការសុខភាពពិភពលោកប្រចាំនៅវៀតណាម មកជំរាបលាក្នុងឱកាសលោកបញ្ចប់បេសកកម្មការទូតនៅ វៀតណាម។

លោកឧបនាយករដ្ឋមន្ត្រី លោក Vu Duc Dam បានវាយតំលៃខ្ពស់ចំពោះការជួយឧបត្ថម្ភរបស់អង្គការសុខភាពពិភពលោក និងរូបលោក Kidong Park ផ្ទាល់ សម្រាប់វៀតណាមក្នុងការបង្ការ និងប្រយុទ្ធប្រឆាំងជំងឺរាតត្បាតកូវីដ ១៩ និយាយដោយឡែក ក៏ដូចជាការជួយឧបត្ថម្ភរបស់អង្គការសុខភាពពិភពលោកសម្រាប់ វៀតណាម ក្នុងរយៈពេលជាង ៤០ ឆ្នាំកន្លងទៅលើគ្រប់ផ្នែកនៃវិស័យសុខាភិបាលដូចជា៖ ការប្រយុទ្ធប្រឆាំងជំងឺរាតត្បាត ការប្រយុទ្ធប្រឆាំងជំងឺឆ្លង និងមិនឆ្លង ការចាក់វ៉ាក់សាំងបើកទូលាយ ការអភិវឌ្ឍប្រព័ន្ធសុខាភិបាល ការបណ្តុះបណ្តាលធនធានមនុស្ស ការពិគ្រោះយោបល់កសាងគោលនយោបាយសុខាភិបាល ការផ្លាស់ប្ដូរថ្មីហិរញ្ញវត្ថុសុខាភិបាល ការសម្របសម្រួលជំនួយ ការធានារ៉ាប់រងសុខាភិបាល  គោលដៅអភិវឌ្ឍន៍សហស្សវត្សរ៍  ជំងឺរបេង គ្រុនចាញ់ជាដើម។

លោកឧបនាយករដ្ឋមន្ត្រីសង្ឈឹមថា ក្នុងតួនាទីថ្មី លោកបណ្ឌិត Kidong Park នឹងបន្តរួមចំណែកយ៉ាងសកម្មទៅក្នុងសកម្មភាពសហប្រតិបត្តិការរវាងអង្គការសុខភាពពិភពលោកនិងវៀតណាមលើវិស័យសុខាភិបាល រួមចំណែកអនុវត្តន៍ប្រកបដោយជោគជ័យនូវគោលដៅកសាងប្រព័ន្ធសុខាភិបាលវៀតណាមទំនើប និងពេញលេញ និងសម្រេចរាល់គោលដៅដែលបានដាក់ចេញក្នុងយុទ្ធសាស្ត្រថែទាំ និងការពារសុខភាពជូនប្រជាជន ដំណាក់កាល ២០២០-២០៣០ ផងដែរ៕