នាយករដ្ឋមន្ត្រី លោក ហ្វាម មិញ ជិញ ក្នុងកិច្ចប្រជុំកំពូលអាស៊ាន (រូបថត៖ VNA)
ក្នុងជំនួបជាមួយនាយករដ្ឋមន្ត្រីកាណាដាលោក Justin Trudeau លោកនាយករដ្ឋមន្ត្រី ហ្វាម មិញ ជិញបានអះអាងថា វៀតណាមជានិច្ចកាលវាយតម្លៃខ្ពស់ចំពោះទំនាក់ទំនងដៃគូលើគ្រប់ជ្រុងជ្រោយជាមួយកាណាដា; ស្នើ ឱ្យភាគីទាំងពីរអនុវត្តន៍ប្រកបដោយប្រសិទ្ធភាពនូវឱកាសសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគ; ជំរុញកិច្ចសហប្រតិបត្តិការលើវិស័យការពារជាតិ ក្នុងនោះមានការគាំទ្ររបស់កាណាដាសម្រាប់វៀតណាមក្នុងការចូលរួមប្រតិបត្តិការរក្សាសន្តិភាពរបស់អង្គការសហប្រជាជាតិ។
នាយករដ្ឋមន្ត្រីកាណាដាលោក Justin Trudeau បានឯកភាពយ៉ាងខ្លាំងចំពោះសំណើរបស់លោកនាយករដ្ឋមន្ត្រី ហ្វាម មិញ ជិញ; ស្នើឲ្យភាគីទាំងពីរបង្កើនទំនាក់ទំនងនៅកម្រិតខ្ពស់និងគ្រប់កម្រិត ហើយរួមគ្នាទាញយកប្រយោជន៍ពីកិច្ចព្រមព្រៀងគ្រប់ជ្រុងជ្រោយនិងជឿនលឿនសម្រាប់ភាព ជាដៃគូអន្តរប៉ាស៊ីហ្វិក (CPTPP)។ នាយករដ្ឋមន្ត្រីទាំងពីរក៏បានឯកភាពបន្តកិច្ចសហប្រតិបត្តិការប្រកបដោយប្រសិទ្ធភាពលើវិស័យសំខាន់ៗផ្សេងទៀត ដូចជាវប្បធម៌ អប់រំ ការផ្លាស់ប្តូរប្រជាជន និងការសម្របសម្រួលយ៉ាងជិតស្និទ្ធក្នុងក្របខ័ណ្ឌនៃវេទិកាពហុភាគី។
ក្នុងជំនួបសវនាការជាមួយនាយករដ្ឋមន្ត្រីម៉ាឡេស៊ី លោក Anwar Ibrahim ថ្នាក់ដឹកនាំទាំងពីរបានឯកភាពដាក់ពង្រាយយន្តការសហប្រតិបត្តិការទ្វេភាគីប្រកបដោយប្រសិទ្ធភាព រួមទាំងគណៈកម្មាធិការពាណិជ្ជកម្មចម្រុះវៀតណាម-ម៉ាឡេស៊ី ដើម្បីរក្សាបាននូវសន្ទុះកំណើនទំហំពាណិជ្ជកម្មគួរឲ្យកត់សម្គាល់។ លោកនាយករដ្ឋមន្ត្រី ហ្វាម មិញ ជិញបានស្នើរឲ្យភាគីទាំងពីរនឹងចុះហត្ថលេខាលើកិច្ចព្រមព្រៀងសហប្រតិបត្តិការលើវិស័យដែលមាន ផលប្រយោជន៍ទៅវិញទៅមក ដូចជាសន្តិសុខ អប់រំ និងអាកាសចរណ៍ ។ លោកនាយករដ្ឋមន្ត្រីក៏បានស្នើឱ្យភាគីទាំងពីរ បង្កើតយន្តការពិគ្រោះយោបល់ និងគ្រប់គ្រងសមុទ្រ និងការប្រព្រឹត្តិមនុស្សធម៌ចំពោះនាវានេសាទ និងអ្នកនេសាទដែលចាប់បានស្របតាមច្បាប់អន្តរជាតិ និងទំនាក់ទំនងល្អរវាងប្រទេសទាំងពីរ។
នាយករដ្ឋមន្ត្រី លោក Anwar Ibrahim បានឯកភាពតាមសំណើរបស់នាយករដ្ឋមន្ត្រី លោក ហ្វាម មិញ ជិញ ដោយបានអះអាងនូវការត្រៀមខ្លួនជាស្រេចក្នុងការសម្របសម្រួលជាមួយវៀតណាម ដើម្បីជំរុញគ្រប់ជ្រុងជ្រោយលើវិស័យសហប្រតិបត្តិការ និងគាំទ្រវៀតណាមក្នុងការដកកាត លឿងរបស់គណៈកម្មការអឺរ៉ុបនាពេលឆាប់ៗខាងមុខ ស្តីពីការនេសាទខុសច្បាប់ គ្មានរបាយការណ៍ និងគ្មានច្បាប់គ្រប់គ្រង (IUU)។
ក្នុងជំនួបជាមួយប្រធានក្រុមប្រឹក្សាអឺរ៉ុប លោក Charles Michel នាយករដ្ឋមន្ត្រី លោក ហ្វាម មិញ ជិញបានអះអាងថា វៀតណាមជានិច្ចកាលគោរពចំពោះកិច្ចសហប្រតិបត្តិការជាមួយ EU និងប្រទេសជាសមាជិក; ស្នើឲ្យ EU បន្តយកចិត្តទុកដាក់ និងលើកទឹកចិត្តប្រទេសសមាជិកដែលនៅសល់ឲ្យផ្តល់សច្ចាប័នលើកិច្ចព្រមព្រៀងការពារការវិនិយោគរវាងភាគីទាំងពីរ (EVIPA) ហើយឆាប់ដកកាតលឿង IUU សម្រាប់ការនាំចេញគ្រឿងរសមុទ្ររបស់វៀតណាម។
ដោយសង្កត់ធ្ងន់ថា វៀតណាមជាដៃគូសំខាន់ក្នុងការអនុវត្តយុទ្ធសាស្ត្រឥណ្ឌូ - ប៉ាស៊ីហ្វិករបស់ EU លោក Charles Michel បានអះអាងថា EU នឹងជំរុញការផ្តល់សច្ចាប័នលើ EVIPA ឲ្យបានឆាប់ ពិចារណាយ៉ាងសកម្មអំពីការដកកាតលឿងរបស់ IUU សម្រាប់វៀតណាម និងបន្តគាំទ្រវៀតណាមក្នុងការអនុវត្តប្រកបដោយប្រសិទ្ធភាពនូវក្របខ័ណ្ឌភាពជាដៃគូផ្លាស់ប្តូរថាមពលដោយយុត្តិធម៌ (JETP)។ ថ្នាក់ដឹកនាំទាំងពីរបានសង្កត់ធ្ងន់លើសារៈសំខាន់នៃការធានាសន្តិសុខ សុវត្ថិភាព និងសេរីភាពនៃការធ្វើនាវាចរណ៍ និងអាកាសចរណ៍នៅសមុទ្រខាងកើត ព្រមទាំងការដោះស្រាយជម្លោះដោយសន្តិវិធីស្របតាមច្បាប់អន្តរជាតិ។
ក្នុងជំនួបជាមួយនាយករដ្ឋមន្ត្រីនូវែលហ្សេឡង់ លោក Christopher Luxon ភាគីទាំងពីរបានសង្កត់ធ្ងន់លើតម្រូវការពង្រឹងកិច្ចសហប្រតិបត្តិការលើវិស័យប្រពៃណីដូចជា ពាណិជ្ជកម្ម - វិនិយោគ ការអប់រំ - បណ្តុះបណ្តាល កសិកម្ម ការផ្លាស់ប្តូរប្រជាជន និងការបើកទូលាយលើវិស័យថ្មី។ លោកនាយករដ្ឋមន្ត្រី ហ្វាម មិញ ជិញបានស្នើឲ្យភាគីទាំងពីរដាក់ចេញនូវផែនទីបង្ហាញផ្លូវនិងជំហានជាក់លាក់ ដើម្បីនាំទំហំពាណិជ្ជកម្មទ្វេភាគីឡើងដល់ ២ ពាន់លានដុល្លារអាមេរិក នៅចុងឆ្នាំ ២០២៤ និង ៣ ពាន់លានដុល្លារនៅឆ្នាំ ២០២៦។
នាយករដ្ឋមន្ត្រី លោក Christopher Luxon បានយល់ព្រមតាមសំណើរបស់លោកនាយករដ្ឋមន្ត្រី ហ្វាម មិញ ជិញ; អះអាងថា នូវែលហ្សេឡង់នឹងជំរុញគ្រប់វិស័យនៃកិច្ចសហប្រតិបត្តិការដែលមានផលប្រយោជន៍ទៅវិញទៅមក និងបន្តជួយឧបត្ថម្ភ ODA លើវិស័យជាក់ស្តែងតាមតម្រូវការអភិវឌ្ឍរបស់វៀតណាម ជាពិសេសវិស័យកសិកម្មបច្ចេកវិទ្យាខ្ពស់ ការគ្រប់គ្រង និងឆ្លើយតបនឹងគ្រោះមហន្តរាយធម្មជាតិ អភិវឌ្ឍន៍ធនធានមនុស្ស ...៕