នាយករដ្ឋមន្ត្រីវៀតណាម លោក Pham Minh Chinh។ (រូបថត៖ VOV)

ថ្លែងមតិទៅកាន់សហគមន៍ធុរកិច្ចនៃប្រទេសទាំងពីរ ប្រធានាធិបតីកូរ៉េខាងត្បូង លោក Yoon Suk Yeol បានសង្កត់ធ្ងន់ថា ប្រទេសទាំងពីរចាំបាច់ត្រូវលើកកំពស់ទំនាក់ ទំនងវៀតណាម - កូរ៉េខាងត្បូងឡើងកំពស់ថ្មី។ ក្នុងនោះ ត្រូវលើកកំពស់បន្ថែមទៀត នូវសកម្មភាពដោះដូរពាណិជ្ជកម្ម រួមចំណែកសម្រេចបានគោលដៅនាំទំហំពាណិជ្ជកម្ម ទ្វេភាគីឡើងដល់ ១៥០ ពាន់លានដុល្លារអាមេរិកនៅឆ្នាំ ២០៣០។ វៀតណាម និងកូរ៉េខាងត្បូងគួរតែពង្រឹងកិច្ចសហប្រតិបត្តិការលើវិស័យនានាដូចជា ការផ្លាស់ប្តូរឌីជីថល ការបំប្លែងថាមពល។ ប្រធានាធិបតីកូរ៉េខាងត្បូងសង្ឃឹមថា សហគមន៍ធុរកិច្ចនៃ ប្រទេសទាំងពីរនឹងបន្តមានគម្រោងសហប្រតិបត្តិការជាក់ស្តែងនិងមានប្រសិទ្ធភាព ជាច្រើន។

រីឯខ្លួនវិញ នាយករដ្ឋមន្ត្រីវៀតណាម លោក Pham Minh Chinh បានអះអាងថា វៀតណាមលើកទឹកចិត្តសហគមន៍ធុរកិច្ចកូរ៉េខាងត្បូង បណ្តាក់ទុនចូលមកវៀតណាម លើវិស័យសក្តានុពលនានាដូចជា នវានុវត្តន៍ ការផ្លាស់ប្តូរឌីជីថល បច្ចេកវិទ្យាជីវ សាស្ត្រ អេឡិចត្រូនិក វត្ថុពាក់កណ្ដាលចំឡង ថាមពលស្អាត សេដ្ឋកិច្ចបៃតង ទីក្រុង ឆ្លាតវៃ កសិកម្មបច្ចេកវិទ្យាខ្ពស់ ជាដើម។ ជាពិសេស លោកនាយករដ្ឋមន្ត្រីរំពឹងថា បណ្ដាសហគ្រាសរបស់កូរ៉េខាងត្បូងនឹងបង្កើនការវិនិយោគលើវិស័យឧស្សាហកម្ម វប្បធម៌ និងឧស្សាហកម្មកម្សាន្ត។ នេះក៏ជាវិស័យដែលកូរ៉េខាងត្បូងមានប្រៀបខ្លាំង ហើយកិច្ចសហប្រតិបត្តិការនេះមានលក្ខណៈបំពេញបន្ថែមគ្នាដើម្បីការអភិវឌ្ឍរួម។

មុននេះ នាយករដ្ឋមន្ត្រីវៀតណាមលោក Pham Minh Chinh បានអញ្ជើញជា អធិបតីកិច្ចសន្ទនាតុមូល ជាមួយថ្នាក់ដឹកនាំសមាគមធុរកិច្ច និងសម្ព័ន្ធក្រុមហ៊ុនឈាន មុខគេរបស់កូរ៉េខាងត្បូង សំដៅពិភាក្សានិងជំរុញកិច្ចសហប្រតិបត្តិការពាណិជ្ជកម្ម វិនិយោគក្នុងសម័យកាលថ្មី។ បណ្ដាសមាគម និងសហគ្រាសរបស់កូរ៉េខាងត្បូង ចាត់ទុកវៀតណាមជាដៃគូយុទ្ធសាស្ត្រសំខាន់; សន្យារួមដំណើរជាមួយវៀតណាមក្នុង រយៈពេលយូរអង្វែង ដើម្បីរួមគ្នាបោះជំហានលើមាគ៌ានៃវិបុលភាពរួម៕