ថ្លែងមតិនៅទីនេះ ប្រធានរដ្ឋ លោក Nguyen Xuan Phuc បានសង្កត់ធ្ងន់លើគោលជំហររបស់ វៀតណាមវៀតណាម ដែលជាមិត្ត ជាដៃគូគួរឲ្យទុកចិត្ត និងជាសមាជិកដែលមានការទទួលខុសត្រូវក្នុងសហគមន៍អន្តរជាតិ សហប្រតិបត្តិការដោយសមភាព ដើម្បីផលប្រយោជន៍ទៅវិញទៅមក។ ទន្ទឹមនឹងនោះ វៀតណាមជានិច្ចកាលសាមគ្គីនិងគាំទ្រយ៉ាងខ្ជាប់ខ្ជួនចំពោះប្រជាជននៃប្រទេសផ្សេងៗ ក្នុងការតស៊ូដើម្បីសន្តិភាព ឯករាជ្យជាតិ ប្រជាធិបតេយ្យ និងវឌ្ឍនភាពសង្គម ដើម្បីពិភពលោកប្រកបដោយយុត្តិធម៌ និងការអភិវឌ្ឍប្រកបដោយចីរភាពនិងសន្តិភាពផងដែរ។ ប្រធានរដ្ឋ លោក Nguyen Xuan Phuc មានប្រសាសន៍ថា៖

“វៀតណាមនឹងប្រកាន់ខ្ជាប់នូវគោលដៅឯករាជ្យជាតិដែលផ្សាភ្ជាប់នឹងលទ្ធិសង្គមនិយម ប្រកាន់ខ្ជាប់នូវគោលមាគ៌ាកិច្ចការបរទេសឯករាជ្យ ម្ចាស់ការ សន្តិភាព មិត្តភាព សហប្រតិបត្តិការ និងអភិវឌ្ឍន៍ ធ្វើពហុភាគីភាវូបនីយកម្មនិងពិពិធកម្មទំនាក់ទំនងកិច្ចការបរទេស ធ្វើសមាហរណកម្មអន្តរជាតិយ៉ាងសកម្ម និងម្ចាស់ការ; ធានានូវផលប្រយោជន៍ខ្ពស់បំផុតរបស់ប្រទេសជាតិ-ប្រជាជាតិ ដោយឈរលើគោលការណ៍ជាមូលដ្ឋាននៃធម្មនុញ្ញអង្គការសហប្រជាជាតិ និងច្បាប់អន្តរជាតិ។ យើងខ្ញុំសង្ឃឹមថា ក្រុមប្រឹក្សាសន្តិភាពពិភពលោក អង្គការប្រជាធិបតេយ្យអន្តរជាតិ កម្លាំងដើម្បីសន្តិភាពនិងវឌ្ឍនភាពពិភពលោក នឹងបន្តរួមដំណើរ សាមគ្គីនិងគាំទ្រចំពោះប្រជាជនវៀតណាមនៅលើដំណើរថ្មី។ វៀតណាមនឹងបន្តរួមវិភាគទានយ៉ាងសកម្មចំពោះចលនារបស់ក្រុមប្រឹក្សា ក៏ដូចជា ចលនាប្រជាជនជឿនលឿនជុំវិញពិភពលោក ដើម្បីសន្តិភាព ឯករាជ្យជាតិ ប្រជាធិបតេយ្យ និងវឌ្ឍនភាពសង្គមផងដែរ”។

ចំណែកឯគណៈប្រតិភូ និងថ្នាក់ដឹកនាំនៃក្រុមប្រឹក្សាសន្តិភាពពិភពលោក និងក្រុមប្រឹក្សាសន្តិភាពនៃប្រទេសនានា សុទ្ធតែបានសម្តែងនូវក្តីស្រឡាញ់ និងការកោតសរសើរចំពោះប្រជាជនវៀតណាម និងលោកប្រធានហូជីមិញ។ តំណាងក្រុមប្រឹក្សាសន្តិភាពនៃបណ្ដាប្រទេសបានបញ្ជាក់ថា ប្រជាជន វៀតណាមពិតជាស្រឡាញ់សន្តិភាព ហើយវៀតណាមមានទីតាំងសំខាន់ក្នុងដួងចិត្តប្រជាជនស្រឡាញ់សន្តិភាពលើពិភពលោក៕