រដ្ឋមន្ត្រីក្រសួងការបរទេសវៀតណាម លោក Le Hoai Trung នៅក្នុងកិច្ចសន្ទនាតាមទូរស័ព្ទ។ (រូបថត៖ qdnd.vn)

កាលពីរសៀលថ្ងៃទី ២៦ ខែឧសភា នៅទីស្នាក់ការក្រសួងការបរទេស (ហាណូយ) រដ្ឋមន្ត្រីក្រសួងការបរទេសវៀតណាម លោក Le Hoai Trung បានធ្វើការសន្ទនាតាមទូរស័ព្ទដាច់ដោយឡែកគ្នាជាមួយលោក Ahmed Attaf រដ្ឋមន្ត្រីក្រសួងការបរទេស សហគមន៍ជនអាល់ហ្សេរីនៅបរទេស និងកិច្ចការអាហ្វ្រិក និងលោកស្រី Selma Ashipala-Musavyi រដ្ឋមន្ត្រីក្រសួងការបរទេស និងពាណិជ្ជកម្ម ណាមីប៊ី ដើម្បីផ្លាស់ប្តូរទស្សនៈលើវិធានការជំរុញកិច្ចសហប្រតិបត្តិការទ្វេភាគី។

ក្នុងកិច្ចសន្ទនាតាមទូរស័ព្ទជាមួយលោក Ahmed Attaf រដ្ឋមន្ត្រីក្រសួងការបរទេសអាល់ហ្សេរី លោករដ្ឋមន្ត្រី Le Hoai Trung បានស្នើឱ្យភាគីទាំងពីរសម្របសម្រួលអនុវត្តន៍កិច្ចព្រមព្រៀងសហប្រតិបត្តិការរវាងសាជីវកម្មរុករកនិងផលិតប្រេងឧស្ម័នជាតិវៀតណាម (PVEP) និងក្រុមហ៊ុនប្រេងឧស្ម័នជាតិអាល់ហ្សេរី (Sonatrach) ប្រកបដោយប្រសិទ្ធភាព; ហើយបានស្នើឱ្យអាល់ហ្សេរីបន្តបង្កើតលក្ខខណ្ឌអំណោយផលសម្រាប់ PVEP ដើម្បីដំណើរការប្រកបដោយប្រសិទ្ធភាពនៅក្នុងប្រទេសអាល់ហ្សេរីផងដែរ។

រីឯខ្លួនវិញ ​រដ្ឋមន្ត្រីការបរទេស​អាល់ហ្សេរី លោក Ahmed Attaf បាន​បញ្ជាក់​ពី​ការប្តេជ្ញាចិត្ត​ជំរុញ​កិច្ចសហប្រតិបត្តិការ​ជាមួយ​វៀតណាម ជាពិសេស​ក្នុង​វិស័យ​វិនិយោគ ថាមពល កសិកម្ម វប្បធម៌ និង​ការជួបប្រាស្រ័យរវាងប្រជាជន។

ក្នុងកិច្ចសន្ទនា​តាមទូរស័ព្ទ​ជាមួយ​រដ្ឋមន្ត្រីការបរទេស​ណាមីប៊ី លោកស្រី Selma Ashipala-Musavyi លោករដ្ឋមន្ត្រី Le Hoai Trung បាន​ស្នើ​ឲ្យភាគីទាំងពីរ​ពង្រីក​កិច្ចសហប្រតិបត្តិការ​ក្នុង​វិស័យ​ដែលមាន​សក្តានុពល​ ដូចជា​សេដ្ឋកិច្ច ពាណិជ្ជកម្ម និង​វិនិយោគ។ លោករដ្ឋមន្ត្រី Le Hoai Trung បាន​ស្នើឲ្យ​​ណាមីប៊ី​គាំទ្រចំពោ​វៀតណាមក្នុងការចរចា​លើ​កិច្ចព្រមព្រៀង​ពាណិជ្ជកម្ម​សេរី (FTA) ជាមួយ​សហភាព​ពន្ធគយ​អាហ្វ្រិក​ខាងត្បូង (SACU)។

ចំណែក​ឯ​លោកស្រី រដ្ឋមន្ត្រី Selma Ashipala-Musavyi បាន​សម្តែង​នូវ​បំណងចង់ឲ្យ​ភាគី​ទាំងពីរពន្លឿនការផ្លាស់ប្ដូរ​ សំដៅលើកកំពស់​ទំហំ​ពាណិជ្ជកម្ម និង​ពង្រឹង​កិច្ចសហប្រតិបត្តិការ​ក្នុង​វិស័យ​កសិកម្ម នេសាទ ភស្តុភារកម្ម និង​ផលិតកម្ម។ ល៕