ចាប់តាំងពីថ្ងៃទី២៤ ខែកុម្ភៈ ឆ្នាំ ២០២២ ស្ថានការណ៍ជម្លោះប្រដាប់អាវុធនៅអ៊ុយក្រែនបានវិវឌ្ឍន៍យ៉ាងស្មុគស្មាញ ហើយបានរីករាលដាលយ៉ាងឆាប់រហ័សពាសពេញទឹកដីអ៊ុយក្រែន ដែលបង្កការគំរាមកំហែងផ្ទាល់ដល់សុវត្ថិភាពអាយុជីវិត និងទ្រព្យសម្បត្តិរបស់ប្រជាជន និងសហគ្រាស ក្នុងនោះមានពលរដ្ឋវៀតណាមប្រមាណ ៧ ពាន់នាក់ ដែលកំពុងស្នាក់នៅអ៊ុយក្រែន។ នៅចំពោះស្ថានការណ៍នេះ បក្ស រដ្ឋ និងរដ្ឋាភិបាលវៀតណាមបានផ្ដល់អាទិភាពចម្បងក្នុងការធានាសន្តិសុខ និងសុវត្ថិភាពខ្ពស់បំផុតចំពោះអាយុជីវិត ទ្រព្យសម្បត្តិ និងផលប្រយោជន៍ស្របច្បាប់ និងត្រឹមត្រូវជូនពលរដ្ឋ និងនីតិបុគ្គលវៀតណាមនៅអ៊ុយក្រែន និងកន្លែងពាក់ព័ន្ធនានា។

ការចូលជាបន្ទាន់ និងខ្លាំងក្លា

បន្ទាប់ពីប្រតិបត្តិការយោធាពិសេសរបស់រុស្ស៊ីត្រូវបានដាក់ពង្រាយនៅអ៊ុយក្រែននោះ  នាយករដ្ឋមន្ត្រីវៀតណាម លោក Pham Minh Chinh បានបញ្ជាឱ្យបង្កើតក្រុមការងារពិសេសមួយ ទទួលបន្ទុកដោះស្រាយបញ្ហាពាក់ព័ន្ធនានានៃស្ថានការណ៍នៅអ៊ុយក្រែន ព្រមទាំងដឹកនាំក្រសួង ស្ថាប័នផ្ទាល់ធ្វើការជម្លៀសពលរដ្ឋចេញពីតំបន់គ្រោះថ្នាក់ ជម្លៀសទៅកាន់ប្រទេសជិតខាង ហើយមានផែនការនាំប្រជាពលរដ្ឋដែលមានតម្រូវការឲ្យវិលត្រឡប់មកវៀតណាមវិញ។ អនុរដ្ឋមន្ត្រីការបរទេសវៀតណាម លោក Pham Quang Hieu បានឲ្យដឹងថា៖ “ក្រសួងការបរទេសបានសម្របសម្រួលយ៉ាងជិតស្និទ្ធជាមួយក្រសួង ស្ថាប័ន ពាក់ ព័ន្ធនានា ព្រមទាំងដឹកនាំបណ្ដាស្ថាប័នតំណាងវៀតណាមប្រចាំនៅអ៊ុយក្រែន និង ប្រទេសជិតខាងដូចជា ប៉ូឡូញ រូម៉ានី ហុងគ្រី និងស្លូវ៉ាគី ក៏ដូចជាសម្របសម្រួល ជាមួយសមាគមន៍នានា ដើម្បីធ្វើការជម្លៀសប្រជាពលរដ្ឋនៅតាមតំបន់ព្រំដែនភ្លាមមួយរំពេច។ ចាប់តាំងពីពេលផ្ទុះជម្លោះមក បណ្ដាស្ថានទូតវៀតណាមប្រចាំនៅបរទេសបានរៀបចំផែនការ រួមជាមួយសមាគមន៍នានា ហើយបានចុះទៅដល់ព្រំដែន ដើម្បីជួយសម្រួលប្រជាពលរដ្ឋ ដោយខិតខំប្រឹងប្រែងមិនទុកឲ្យនរណាម្នាក់រងការអត់ឃ្លាន ត្រជាក់ និងខ្វះចំណីអាហារឡើយ”។

  គ្រួសារជនជាតិវៀតណាមនៅក្រៅប្រទេសសម្តែងការសប្បាយរីករាយ នៅពេលវិលត្រឡប់មកមាតុប្រទេសវិញនៅថ្ងៃទី៨ ខែមីនា (រូបថត៖ VNA)  

  អនុរដ្ឋមន្ត្រីការបរទេសវៀតណាម លោក Pham Quang Hieu សួរសុខទុក្ខប្រជាពលរដ្ឋវៀតណាម (រូបថត៖ VNA)  

គិតត្រឹមបច្ចុប្បន្ននេះ ពលរដ្ឋវៀតណាមប្រមាណ ២ ពាន់នាក់ត្រូវបានជម្លៀសចេញពីតំបន់ប្រយុទ្ធគ្នានៅអ៊ុយក្រែន ហើយត្រូវបានបញ្ជូនទៅកាន់ប្រទេសជិតខាង ។ កាលពីថ្ងៃទី ៨ មិនា ជើងហោះហើរដើមដំបូង ដឹកពលរដ្ឋចំនួន ២៨៧ នាក់ ក្នុងនោះមានកុមារចំនួន ៧១ នាក់ចេញពីទីក្រុង Bucharest (រ៉ូម៉ានី) វិលត្រឡប់មកប្រទេសវិញប្រកបដោយសុវត្ថិភាព។

ពង្រីកប្រពៃណីជួយយកអាសារគ្នាទៅវិញទៅមក

នាថ្ងៃទី១០ ខែមិនាខាងមុខ ជើងហោះហើរផ្សេងមួយទៀត នឹងចេញដំណើរពីទីក្រុង Warsaw (ប៉ូឡូញ) ដឹកជញ្ជូនពលរដ្ឋវៀតណាមចំនួន ២៧០ នាក់ វិលត្រឡប់មកវៀតណាមវិញ។ កិច្ចគាំពារពលរដ្ឋកំពុងត្រូវបានអនុវត្តន៍ ដើម្បីបន្តដឹកប្រជាពលរដ្ឋវៀតណាមរាប់រយនាក់វិលត្រឡប់មកប្រទេសវិញតាមបណ្ដាជើងហោះហើរនាពេលខាងមុខ។ នាបច្ចុប្បន្ននេះ ប៉ូឡូញគឺជាប្រទេសទទួលជនភៀសខ្លួនវៀតណាមយ៉ាងច្រើនកុះករពីអ៊ុយក្រែន។ តាំងពីគ្រាដំបូងមក ស្ថានទូតវៀតណាមប្រចាំនៅប៉ូឡូញបានម្ចាស់ការបង្កើតក្រុមការងារជំនាញទទួលបន្ទុកកិច្ចគាំពារ
ពលរដ្ឋ ព្រមទាំងធានាដំណើរការនៃខ្សែទូរស័ព្ទបន្ទាន់ ២៤/២៤ ម៉ោង។ លោក Nguyen Hung ឯកអគ្គរដ្ឋទូតវៀតណាមប្រចាំនៅប៉ូឡូញបានអះអាងថា៖ “ស្ថានទូតវៀតណាមបានសម្របសម្រួលយ៉ាងជិតស្និទ្ធិជាមួយសមាគមន៍ជនវៀតណាម ដើម្បីបង្កើតក្រុមការងារជួយឧបត្ថម្ភបងប្អូនជនរួមជាតិធ្វើបច្ចុប្បន្នភាពបទប្បញ្ញត្តិរបស់ប្រទេសសាមី ព្រមទាំងបង្កើតក្រុមការងារជួយឧបត្ថម្ភការស្នាក់នៅ និងហូបចុកជូនបងប្អូនជនរួមជាតិ ក៏ដូចជាបង្កើតក្រុមការងារទទួលបន្ទុកសម្របសម្រួលយ៉ាងជិតស្និទ្ធិជាមួយសមាគមន៍ជនវៀតណាម និងស្ថាប័នមានសមត្ថកិច្ចវៀតណាមប្រចាំនៅអ៊ុយក្រែន ដើម្បីជួយឧបត្ថម្ភតាមតម្រូវការរបស់បងប្អូនជនរួមជាតិផងដែរ”។  

នាបច្ចុប្បន្ន ក្រុមហ៊ុនអាកាសចរណ៍វៀតណាមបានត្រៀមរៀបចំជើងហោះហើរនៅតាមតំបន់ចំនួន ៦ នៅអឺរ៉ុប ដើម្បីដឹកពលរដ្ឋវៀតណាមវិលត្រឡប់មកវៀតណាមវិញពីអ៊ុយក្រែន។ កិច្ចខិតខំប្រឹងប្រែងទាំងនេះគឺដើម្បីគោលដៅខ្ពស់បំផុតគឺធានាការដឹកពលរដ្ឋវៀតណាមឲ្យវិលត្រឡប់មកប្រទេសវិញតាមផែនការ និងប្រកបដោយសុខសុវត្ថិភាព។ លោកអនុរដ្ឋមន្ត្រីរដ្ឋមន្ត្រី Pham Quang Hieu បានអះអាងបន្តទៀតថា៖ “យើងខ្ញុំបានសង្កេតឃើញថា នាប៉ុន្មានថ្ងៃខាងមុខ ស្ថានការណ៍ប្រយុទ្ធគ្នានៅតែប្រព្រឹត្តិទៅ។ ដូច្នេះហើយ យើងខ្ញុំនឹងបន្តទទួលពលរដ្ឋនៅតាមបណ្ដាប្រទេស ហើយចាត់វិធានការ ដើម្បីឆ្លើយតបនឹងតម្រូវការរបស់បងប្អូនជនរួមជាតិឲ្យទាន់ពេលវេលា។ នារយៈពេលខាងមុខ ដោយពឹងផ្អែកលើបំណងប្រាថ្នារបស់បងប្អូនជនរួមជាតិ វៀតណាមនឹងរៀបចំជើងហោះហើរបន្ថែមទៀត ដើម្បីជម្លៀលប្រជាពលរដ្ឋផងដែរ”។

អាចនិយាយបានថា ក្នុងគ្រាមានទុក្ខលំបាក ប្រពៃណីមហាសាមគ្គីប្រជាជាតិទាំងមូល ស្មារតីខ្លួនទីពឹងខ្លួន ជួយគ្នាទៅវិញទៅមក“ស្លឹកល្អការពារស្លឹករហែក”លក្ខណៈមនុស្សសាស្ត្រកាន់តែត្រូវបានពង្រីកយ៉ាងខ្លាំងក្លាពីមួយថ្ងៃទៅមួយថ្ងៃ។ ការធានាសន្តិសុខ និងសុវត្ថិភាពអំពីអាយុជីវិត ទ្រព្យសម្បត្តិ និងផលប្រយោជន៍ស្របច្បាប់ ត្រឹមត្រូវរបស់ពលរដ្ឋវៀតណាមនៅអ៊ុយក្រែន គឺជាស្មារតីមនុស្សធម៌ និងការទទួលខុសត្រូវព្រមទាំងជាប្រការចាំបាច់បន្ទាន់នាពេលបច្ចុប្បន្នផងដែរ៕