នាព្រឹកថ្ងៃទី៤ ខែតុលា ឆ្នាំ២០១៨ សន្និសីទរំលឹកខួបរយៈពេល៣០ឆ្នាំនៃការទាក់ទាញទុនវិនិយោគពីបរទេស (FDI) បានប្រារព្ធឡើងនៅរដ្ឋធានីហាណូយ ប្រទេសវៀតណាម។
![](https://imagevietnam.vnanet.vn/Upload/2018/10/5/05102018061934445tieudiem_gupk.jpg)
នាយករដ្ឋមន្រ្តីវៀតណាមលោក Nguyen Xuan Phuc អញ្ជើញថ្លែងនៅសន្និសីទ (រូបថត៖ VGP)
ក្រោមប្រធានបទ “រយៈពេល៣០ឆ្នាំនៃការទាក់ទាញទុនវិនិយោគពីបរទេសចូលមកវៀតណាម៖ ទស្សនៈវិស័យនិងឱកាសថ្មីក្នុងយុគសម័យថ្មី” សន្និសីទនេះមានការអញ្ជើញចូលរួមរបស់នាយករដ្ឋមន្រ្តីវៀតណាមលោក Nguyen Xuan Phuc និងតំណាងប្រមាណជាង៣ពាន់៥រយនាក់ដែលជាថ្នាក់ដឹកនាំក្រសួង ស្ថាប័ន មូលដ្ឋាន ស្ថាប័នការទូត សមាគមន៍សហគ្រាស និងអង្គ ការអន្តរជាតិនានាផងដែរ
ថ្លែងនៅសន្និសីទនេះ រដ្ឋមន្រ្តីក្រសួងផែនការនិងវិនិយោគវៀតណាម លោក Nguyen Chi Dung បានអះអាងថា ក្រោយរយៈពេល ៣០ ឆ្នាំ ការវិនិយោគទុនដោយផ្ទាល់ពីបរទេសបានក្លាយទៅជាតំបន់សេដ្ឋកិច្ចសំខាន់នៃប្រទេសវៀតណាម។ ក្នុងរយៈពេលនោះ វៀតណាមបានទាក់ទាញគម្រោង FDI រាប់ហ្មឺន គម្រោងដោយទុនចុះបញ្ជីសរុបប្រមាណ៣៣៤ពាន់លានដុល្លាអាមេរិក ក្នុងនោះ បានបើកប្រាក់ចំណាយប្រមាណ ១៨៤ ពាន់លានដុល្លារអាមេរិកសម្រាប់ផ្នែកនិងវិស័យសឹងតែទាំងអស់នៃខឿនសេដ្ឋកិច្ច។
“ទុន FDI បានចូលរួមចំណែកដ៏សំខាន់ទៅក្នុងការអភិវឌ្ឍសេដ្ឋកិច្ចនិងផ្ទេរប្ដូររចនាសម្ព័ន្ធសេដ្ឋកិច្ច ព្រមទាំងបង្កើតវិស័យឧស្សាហកម្មមុខព្រួញនានាដូចជា៖ ទូរគមនាគមន៍ ប្រេងឧស្ម័ន អេឡិចត្រូនិក សារធាតុគីមី ដែកថែប បច្ចេកវិទ្យាព័ត៌មាន ស្បែកជើង កែច្នៃកសិផលចំណីអាហារជាដើម។ FDI ក៏ជាកត្តាអភិវឌ្ឍដែលជួយបង្កើតមណ្ឌលនគរថ្មី ជួយឲ្យវៀតណាមបើកទូលាយទីផ្សារអន្តរជាតិ រួមចំណែកទៅក្នុងការធានាតុល្យភាពពាណិជ្ជកម្ម។ ការទាក់ទាញទុន FDI ក៏រួមចំណែកទៅក្នុងដំណើរការសមាហរណកម្មអន្តរជាតិ លើកកំពស់ឋានៈនិងតួនាទី របស់វៀតណាមលើឆាកអន្តរជាតិទៀតផង”។
ចំណែកឯនាយករដ្ឋមន្ត្រីវៀតណាមលោក Nguyen Xuan Phuc បានវាយតំលៃខ្ពស់ចំពោះតួនាទីនៃប្រភពទុន FDI ចំពោះការអភិវឌ្ឍនៃខឿនសេដ្ឋកិច្ចវៀតណាម ហើយលើកច្បាស់ថា ត្រូវមានដំណោះស្រាយទូទៅដើម្បីទាក់ទាញប្រភព ទុន FDI នាពេលខាងមុខ។
“វៀតណាមអនុវត្តន៍ដោយការប្ដូរផ្ដាច់គោលមាគ៌ាគោលនយោបាយសហប្រតិបតិ្តការវិនិយោគបរទេស។ FDI ជានិច្ចកាលជាចំណែកសំខាន់នៃខឿន សេដ្ឋកិច្ចវៀតណាម។ រដ្ឋាភិបាលសំណូមពរឲ្យក្រសួង ស្ថាប័នពាក់ព័ន្ធទាំងអស់ត្រូវយកចិត្តទុកដាក់ រក្សារឹងមាំនូវបរិយាកាសនយោបាយសង្គម ស្ថិរភាពម៉ាក្រូ សេដ្ឋកិច្ច កែលំអហេដ្ឋារចនាសម្ព័ន្ធក៏ដូចជាក្របខ័ណ្ឌគតិយុត្តឲ្យបានសមស្រប ទៅនឹងការសន្យាអន្តរជាតិនានារបស់វៀតណាម ពិសេសគឺកិច្ចព្រមព្រៀង FTA ជំនាន់ថ្មីៗ។ ទន្ទឹមនឹងនោះ ជួយឧបត្ថម្ភគាំទ្រសហគ្រាសក្នុងស្រុកតភ្ជាប់សហការ ជាមួយសហគ្រាសមានទុនវិនិយោគពីបរទេសផងដែរ”៕
តាម VOV5 - វិទ្យុសម្លេងវៀតណាម