នៅថ្ងៃទី១២ ខែវិច្ឆិកា នៅទីស្នាក់ការកណ្តាលអង្គការសហប្រជាជាតិនៅទីក្រុងញូវយ៉ក គណៈកម្មាធិការនយោបាយពិសេសនិងការរំសាយអាណានិគម (គណៈកម្មាធិការទី៤) នៃសម័យប្រជុំលើកទី៨១ នៃមហាសន្និបាតអង្គការសហប្រជាជាតិបានពិភាក្សាអំពីសកម្មភាពរបស់ទីភ្នាក់ងារជួយសង្គ្រោះ និងការងាររបស់អង្គការសហប្រជាជាតិសម្រាប់ជន ភៀសខ្លួនប៉ាឡេស្ទីននៅតំបន់ជិតបូព៌ា (UNRWA)។ អគ្គរដ្ឋទូតលោក ង្វៀន ហៃ លឺវ អនុប្រធានបេសកកម្មអចិន្ត្រៃយ៍វៀតណាមប្រចាំអង្គការសហប្រជាជាតិ បានចូលរួមនិងថ្លែងសុន្ទរកថាជាតិនៅក្នុងសម័យប្រជុំនេះ។

ថ្លែងនៅក្នុងសម័យប្រជុំនោះ តំណាងវៀតណាមបានអំពាវនាវដល់គ្រប់ភាគីទាំងអស់ឱ្យរក្សាបទឈប់បាញ់ អនុវត្តការអត់ធ្មត់ជាអតិបរមា គោរពច្បាប់មនុស្សធម៌អន្តរជាតិ ការពារជនស៊ីវិលនិងហេដ្ឋារចនាសម្ព័ន្ធស៊ីវិល ព្រមទាំងធានាថា ជំនួយមនុស្សធម៌ត្រូវបានផ្តល់ជូនដោយសុវត្ថិភាព ទាន់ពេលវេលា និងដោយគ្មានការរារាំង។ វៀតណាមបានបញ្ជាក់ពីតួនាទីយ៉ាងសំខាន់ និងមិនអាចជំនួសបានរបស់ UNRWA ក្នុងការគាំទ្រដល់ជនភៀសខ្លួនប៉ាឡេស្ទីនរាប់លាននាក់នៅតំបន់ហ្គាហ្សា តំបន់វេស្តប៊ែង (រួមទាំងក្រុងយេរូសាឡឹមខាងកើត) ហ្ស៊កដានី លីបង់ និងស៊ីរី។ វៀតណាមស្វាគមន៍ចំពោះការពន្យាអាណត្តិរបស់ UNRWA រហូតដល់ខែមិថុនា ឆ្នាំ២០២៩ កិច្ចខិតខំប្រឹងប្រែងដើម្បីបង្កើនអព្យាក្រឹតភាព តម្លាភាព និងការទទួលខុសត្រូវ និងបានអំពាវនាវឱ្យធានាការផ្តល់មូលនិធិគ្រប់គ្រាន់ ស្ថិរភាព និងប្រកបដោយចីរភាពសម្រាប់ទីភ្នាក់ងារនេះ។

ទាក់ទងនឹងកិច្ចខិតខំប្រឹងប្រែងសន្តិភាព និងការកសាងឡើងវិញនៅតំបន់ហ្គាហ្សា វៀតណាមវាយតម្លៃថា សេចក្តីសម្រេចលេខ ២៨០៣ ឆ្នាំ២០២៥ របស់ក្រុមប្រឹក្សាសន្តិសុខ និងការអនុវត្តផែនការសន្តិភាពនៅតំបន់ហ្គាហ្សា បង្កើតឱកាសដើម្បីពង្រឹងបទឈប់បាញ់ និងលើកកម្ពស់ការកសាងឡើងវិញ។ វៀតណាមបន្តគាំទ្រជាប់លាប់ចំពោះសិទ្ធិក្នុងការសម្រេចចិត្តដោយខ្លួនឯងរបស់ប្រជាជនប៉ាឡេស្ទីន និងការបង្កើតរដ្ឋប៉ាឡេស្ទីនឯករាជ្យ និងមានអធិបតេយ្យភាព ដោយផ្អែកលើខ្សែព្រំដែនមុនឆ្នាំ ១៩៦៧ ដោយមានក្រុងយេរូសាឡឹមខាងកើតជារដ្ឋធានី ដោយរួមរស់ដោយសន្តិភាពជាមួយអ៊ីស្រាអែល៕