វៀតណាមជានិច្ចកាលចាត់ទុកសហរដ្ឋអាមេរិកជាដៃគូដ៏សំខាន់។ លោកនាយឧត្តមសេនីយ៍ Phan Van Giang រដ្ឋមន្ត្រីក្រសួងការពារជាតិ វៀតណាមបានអះអាងដូច្នេះនារសៀលថ្ងៃទី ៨ មិនា នៅទីក្រុងហាណូយ ក្នុងជំនួបជាមួយគណៈប្រតិភូសភាអាមេរិក ដឹកនាំដោយព្រឹទ្ធសមាជិក Jeff Merkley សមាជិកគណៈកម្មាធិការកិច្ចការបរទេសនៃព្រឹទ្ធសភាអាមេរិក ដែលកំពុងបំពេញទស្សនកិច្ច និងធ្វើការនៅវៀតណាម។

លោកនាយឧត្តមសេនីយ៍ Phan Van Giang បានសង្កត់ធ្ងន់ថា វៀតណាមមានបំណងចង់ជំរុញទំនាក់ទំនងជាមួយសហរដ្ឋអាមេរិក ដោយឈរលើមូលដ្ឋានគោរពឯករាជ្យ អធិបតេយ្យភាព និងរបៀបរបបនយោបាយរបស់គ្នាទៅវិញទៅមក ដើម្បីផលប្រយោជន៍នៃប្រទេសទាំងពីរ ដើម្បីសន្តិភាព ស្ថិរភាព កិច្ចសហប្រតិបត្តិការ និងអភិវឌ្ឍន៍ក្នុងតំបន់ និងនៅលើពិភពលោក។

ទាក់ទិននឹងទិសដៅនៃកិច្ចសហប្រតិបត្តិការនាពេលខាងមុខ រដ្ឋមន្ត្រីក្រសួងការពារជាតិបានស្នើឱ្យសមាជិកសភាអាមេរិកយកចិត្តទុកដាក់ និងជំរុញសភាអាមេរិកបន្តគាំទ្រការអនុវត្តខ្លឹមសារសហប្រតិបត្តិការលើវិស័យការពារជាតិរវាងប្រទេសទាំងពីរតាមឯកសារដែលបានចុះហត្ថលេខា និងកិច្ចព្រមព្រៀងផ្តោតលើវិស័យ៖ ជម្នះលើផលវិបាកសង្គ្រាម បណ្ដុះបណ្ដាល រក្សាសន្តិភាពនៃអង្គការសហប្រជាជាតិ។

រីឯខ្លួនវិញ សមាជិកព្រឹទ្ធសភា Jeff Merkley បានបញ្ជាក់ថា លោកនឹងបន្តជំរុញកិច្ចសហប្រតិបត្តិការជាមួយវៀតណាម ក្នុងនោះមានការយកចិត្តទុកដាក់ជាពិសេសទៅលើវិស័យជំនះលើផលវិបាកនៃសង្គ្រាម ដោយឈរលើមូលដ្ឋាននៃការទទួលមរតកដែលបន្សល់ទុកដោយសមាជិកព្រឹទ្ធសភាអាមេរិកមុនៗផងដែរ៕