នារសៀលថ្ងៃទី១៤ ខែមករា ឆ្នាំ២០២២ រដ្ឋមន្ត្រីការបរទេស លោក Bui Thanh Son បានអញ្ជើញជួបសន្ទនាជាមួយលោកស្រី Noeleen Heyzer បេសកជនពិសេសរបស់អគ្គលេខាធិការអង្គការសហប្រជាជាតិ (អ.ស.ប) ប្រចាំប្រទេសមីយ៉ាន់ម៉ា តាមទម្រង់អនឡាញ។
 

លោករដ្ឋមន្ត្រីការបរទេស Bui Thanh Son អញ្ជើញទទួលជួបលោកស្រី Noeleen Heyzer បេសកជនពិសេសរបស់អគ្គលេខាធិការអង្គការសហប្រជាជាតិប្រចាំប្រទេសមីយ៉ាន់ម៉ា តាមទម្រង់អនឡាញ (រូបថត៖ ក្រសួងការបរទេស)

លោកស្រី Noeleen Heyzer បេសកជនពិសេសរបស់អគ្គលេខាធិការអង្គការសហប្រជាជាតិប្រចាំប្រទេសមីយ៉ាន់ម៉ា (រូបថត៖ ក្រសួងការបរទេស)

ក្នុងជំនួបនេះ ភាគីទាំងពីរបានចែករំលែកនូវការព្រួយបារម្ភអំពីស្ថានភាពអស្ថិរភាពនៅ មីយ៉ាន់ម៉ាដោយសង្កត់ធ្ងន់ថា អាទិភាពចម្បងនិងបន្ទាន់បច្ចុបន្នគឺការបញ្ចប់អំពើហិង្សា ក៏ដូចជាបង្កើនជំនួយមនុស្សធម៌ដល់ប្រជាជនមីយ៉ាន់ម៉ា ហើយទន្ទឹមនឹងនោះ ត្រូវជំរុញកិច្ចសន្ទនានិងការកសាងទំនុកចិត្ត ដើម្បីស្វែងរកដំណោះស្រាយសន្តិភាព ទូលំទូលាយនិងនិរន្តរភាព ដែលស្របតាមផលប្រយោជន៍របស់ប្រជាជនមីយ៉ាន់ម៉ា។ ភាគីទាំងពីរបានឯកភាពសម្របសម្រួលជាមួយគ្នាយ៉ាងជិតស្និទ្ធ ក្នុងគោលបំណងជួយមីយ៉ាន់ម៉ាវិលត្រឡាប់ទៅរកប្រក្រតីភាពនិងស្ថិរភាព ដើម្បីផលប្រយោជន៍របស់ប្រជាជនមីយ៉ាន់ម៉ា ក៏ដូចជាសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍរួមនៃតំបន់។

លោករដ្ឋមន្ត្រី Bui Thanh Son បានអះអាងថា វៀតណាមនិងអាស៊ានតែងតែចាត់ទុក មីយ៉ាន់ម៉ាជាសមាជិកនៃគ្រួសារអាស៊ាន ដូច្នេះតែងតែតាមដានយ៉ាងដិតដល់នូវស្ថានភាពនិងគាំទ្រមីយ៉ាន់ម៉ាដោយឈរលើមូលដ្ឋានគោរពឯករាជ្យ អធិបតេយ្យភាពនិងបូរណភាពទឹកដីនៃប្រទេសនេះ៕

តាម VOV5 - វិទ្យុសំឡេងវៀតណាម