នាយករដ្ឋមន្ត្រីវៀតណាម លោក ឡេ មិញហ៊ឹង បានទទួលជួបលោក Iain Frew ឯកអគ្គរដ្ឋទូតនៃចក្រភពអង់គ្លេស និងអៀរឡង់ខាងជើងប្រចាំនៅវៀតណាម។ រូបថត៖ VGP/Nhat Bac

ដោយបញ្ជាក់ថា វៀតណាម​ជានិច្ចកាលយក​ចិត្ត​ទុក​ដាក់ចំពោះទំនាក់ទំនងជាមួយចក្រភពអង់គ្លេស លោកនាយករដ្ឋមន្ត្រី ឡេ មិញហ៊ឹង បានសង្កត់ធ្ងន់ថា ប្រទេសទាំងពីរមាន​សក្តានុពលជា​ច្រើនសម្រាប់កិច្ចសហប្រតិបត្តិការលើវិស័យផ្សេងៗ ដូចជាពាណិជ្ជកម្ម និងវិនិយោគ ហិរញ្ញវត្ថុ វិទ្យាសាស្ត្រ និងបច្ចេកវិទ្យា ការអប់រំ និងបណ្តុះបណ្តាល ការផ្លាស់ប្តូរបៃតង ថាមពលកកើតឡើងវិញ ការពារជាតិ និងសន្តិសុខ។ លោកនាយករដ្ឋមន្ត្រីបានស្នើឱ្យប្រទេសទាំងពីរ បង្កើនការផ្លាស់ប្តូរគណៈប្រតិភូគ្រប់​ជាន់​ថ្នាក់ និងបង្កើតផែនការសកម្មភាពជាបន្ទាន់ ដើម្បីអនុវត្តក្របខ័ណ្ឌ​ភាពជាដៃគូយុទ្ធសាស្ត្រគ្រប់ជ្រុងជ្រោយវៀតណាម-អង់គ្លេស។ លោកនាយករដ្ឋមន្ត្រី ឡេ មិញហ៊ឹង បានស្នើឱ្យភាគីទាំងពីរ ជំរុញការបង្កើនពាណិជ្ជកម្មទ្វេភាគីឡើង​ដល់ ១០ ពាន់លានដុល្លារនៅឆ្នាំ ២០២៦ និងឆ្ពោះ​ទៅ​រក​គោលដៅ ១៥ ពាន់លានដុល្លារនាពេលខាងមុខ។

ក្នុងឱកាសនេះ លោកនាយករដ្ឋមន្ត្រី ឡេ មិញហ៊ឹង បានថ្លែងអំណរគុណ និងស្នើឱ្យរដ្ឋាភិបាលអង់គ្លេសបន្តបង្កើតលក្ខខណ្ឌអំណោយផលសម្រាប់សហគមន៍ជន​វៀតណាមនៅអង់គ្លេស ដើម្បីធ្វើសមាហរណកម្មបានល្អ និងរួមចំណែកជា​វិជ្ជមានដល់ការអភិវឌ្ឍសេដ្ឋកិច្ចសង្គមរបស់អង់គ្លេស ក៏ដូចជាទំនាក់ទំនងទ្វេភាគីផងដែរ។​

រីឯខ្លួន​វិញ ឯកអគ្គរដ្ឋទូត Iain Frew បានបញ្ជាក់ថា ចក្រភពអង់គ្លេសត្រៀមខ្លួនរួចជាស្រេច​ស​ម្រាប់​កិច្ច​សហប្រតិបត្តិការជាមួយវៀតណាម ដើម្បីលើកកម្ពស់ពាណិជ្ជកម្មទ្វេភាគី និងអន្តរជាតិ។ ឯកអគ្គរដ្ឋទូតបានបញ្ជាក់ថា វិនិយោគិនអង់គ្លេស​វាយតម្លៃខ្ពស់ ចំពោះ​យថាទស្សន៍អភិវឌ្ឍន៍របស់វៀតណាម ជាពិសេសក្នុងវិស័យថាមពល ហិរញ្ញវត្ថុ និងការផ្លាស់ប្តូរបៃតង ដោយសង្កត់ធ្ងន់ថា ចក្រភពអង់គ្លេស​មាន​បំណង​ចង់ក្លាយជាដៃគូរយៈពេលវែងរបស់វៀតណាមក្នុងការអនុវត្តភាពជាដៃគូផ្លាស់ប្តូរថាមពលដោយយុត្តិធម៌។

ទាក់ទងនឹងបញ្ហាក្នុងតំបន់ និងអន្តរជាតិ ភាគីទាំងពីរបានយល់​ព្រម បន្តពង្រឹងការសម្របសម្រួលក្នុងយន្តការពហុភាគី លើកកម្ពស់ទំនាក់ទំនងអាស៊ីអាគ្នេយ៍ជាមួយចក្រភពអង់គ្លេស ដោយសង្កត់ធ្ងន់លើការសន្ទនា និងកិច្ចសហប្រតិបត្តិការ ធានាសេរីភាព សន្តិសុខ និងសុវត្ថិភាពនៃការធ្វើនាវាចរណ៍ រួ​មចំណែកដល់ការរក្សាសន្តិភាព ស្ថិរភាព និងការអភិវឌ្ឍនៅក្នុងតំបន់ និងពិភពលោក៕​