កាសែតរូបភាពវៀតណាមជាភាសាខ្មែរ

រូបថត

លោកស្រី តូ ធ្វីយីមក្វៀន - ពីបទពិសោធន៍ក្លាយជាបេសកកម្មអប់រំ

08/12/2025

ក្នុងចំណោមរឿងរ៉ាវស្ដីពីការផ្លាស់ប្ដូរថ្មី កាលៈទេសៈនៃការភ្ញាក់រលឹក ពេលខ្លះកើតចេញពីរឿងរ៉ាវតូចតាច។ ចំពោះអ្នកជំនាញអប់រំ លោកស្រី តូ ធ្វីយីមក្វៀន (To Thuy Diem Quyen)...ក្នុងចំណោមរឿងរ៉ាវស្ដីពីការផ្លាស់ប្ដូរថ្មី កាលៈទេសៈនៃការភ្ញាក់រលឹក ពេលខ្លះកើតចេញពីរឿងរ៉ាវតូចតាច។ ចំពោះអ្នកជំនាញអប់រំ លោកស្រី តូ ធ្វីយីមក្វៀន (To Thuy Diem Quyen) នោះមិនមែនជាពានរង្វាន់ ឬកិត្តិយសឡើយ តែជាគំនូរដែលកូនប្រុសរបស់លោកស្រីបានគូរ - ក្មេងប្រុសមានជំងឺអូទីស្សឹម (Autism) ម្នាក់គូររូបខ្លួនឯងត្រៀមចាកចេញពីលោកនេះ។ រូបភាពនោះបានដាស់ស្មារតីអ្នកម្ដាយរូបនេះ និងបានដុតបញ្ឆេះបេសកកម្មមួយក្នុងចិត្តលោកស្រី៖ ផ្លាស់ប្ដូរការអប់រំ ដើម្បីកុំឱ្យក្មេងម្នាក់ណាត្រូវរងទុក្ខវេទនាដូចកូនប្រុសរបស់លោកស្រីឡើយ។
អ្នកជំនាញអប់រំ លោកស្រី តូ ធ្វីយីមក្វៀន ជាជនជាតិវៀតណាមដំបូងគេ ដែលទទួលបានងារជា អ្នកជំនាញអប់រំច្នៃតិដ្ឋឆ្នើម នៃក្រុមហ៊ុន Microsoft នៅឆ្នាំ២០១៤ (Microsoft Innovative Educator Expert Fellow)។ រូបថត៖ ថុងហាយ
លោកស្រី តូ ធ្វីយីមក្វៀន បានដឹងថា ឫសគល់នៃបញ្ហាមិនត្រឹមតែស្ថិតនៅលើសិស្សប៉ុណ្ណោះទេ តែក៏ស្ថិតនៅលើរបៀបដែលគ្រូបង្រៀនកៀកនឹងការងារបង្រៀនដែរ។ «មិនបង្ខំត្រីឱ្យឡើងដើមឈើ» - ទ្រឹស្ដីអប់រំដែលលោកស្រីប្រកាន់ខ្ជាប់បានអះអាងថា កុមារម្នាក់ៗសុទ្ធតែមានសមត្ថភាព និងវិធីសាស្ត្ររៀនសូត្រខុសៗគ្នា ហើយតួនាទីរបស់គ្រូគឺជួយពួកគាត់ឱ្យរីកចម្រើនទៅតាមភាពប្រៀបរៀងៗខ្លួន។ ដោយឆ្លងកាត់ការចំណាយពេលជាច្រើនឆ្នាំជាមួយកូនប្រុស ដើម្បីជំនះជំងឺអូទីស្សឹម និងពិបាកអំណាន លោកស្រីយល់យ៉ាងច្បាស់ថា ការអប់រំត្រូវចាប់ផ្ដើមពីការយល់ចិត្តគ្នា មិនមែនត្រឹមតែពីចំណេះដឹងនោះទេ។
ផ្តើមពីបទពិសោធន៍ផ្ទាល់ខ្លួន លោកស្រីបានបង្វែរភាពឈឺចាប់ទៅជាកម្លាំងជំរុញសង្គម។ នៅឆ្នាំ ២០១២ លោកស្រីបានបង្កើតក្រុមហ៊ុនទទួលខុសត្រូវមានកម្រិត ប្រឹក្សា និងអភិវឌ្ឍការអប់រំ InnEdu ដែលបើកដំណើរការនៃការចាប់ផ្ដើមអាជីវកម្មពោរពេញទៅដោយឧបសគ្គ ប៉ុន្តែក៏ពោរពេញដោយជំនឿទៅលើការផ្លាស់ប្ដូរថ្មីដែរ។ InnEdu ផ្ដោតលើការបណ្ដុះបណ្ដាលដល់គ្រូបង្រៀន និងថ្នាក់ដឹកនាំការអប់រំក្នុងវិស័យ STEAM (វិទ្យាសាស្ត្រ បច្ចេកវិទ្យា បច្ចេកទេស សិល្បៈ គណិតវិទ្យា) និងអនុវត្តបច្ចេកវិទ្យាព័ត៌មានក្នុងការបង្រៀន។ ក្រោមការដឹកនាំរបស់លោកស្រី គ្រូបង្រៀនរាប់ម៉ឺននាក់នៅទូទាំងប្រទេសវៀតណាមបានបំផុសគំនិត និងទទួលបានវិធីសាស្ត្របង្រៀនបែបទំនើប។ លោកស្រីក៏ជាអ្នកសហនិពន្ធសៀវភៅ «ការរៀនសូត្រតាមរយៈគម្រោង» ដែលបោះពុម្ពផ្សាយដោយគ្រឹះស្ថានបោះពុម្ពអប់រំវៀតណាម រួមចំណែកផ្សព្វផ្សាយស្មារតីនៃការរៀនសូត្រប្រកបដោយភាពច្នៃប្រតិដ្ឋ។
អ្នកជំនាញអប់រំ លោកស្រី តូ ធ្វីយីមក្វៀន បើកវគ្គបណ្ដុះបណ្ដាលតាមអនឡាញឥតគិតថ្លៃសម្រាប់គ្រូបង្រៀនទូទាំងប្រទេស ជួយគ្រូបង្រៀនបង្កើនភាពអន្តរកម្ម បង្កើតកម្លាំងចិត្តដល់សិស្ស តាមរយៈល្បែងកម្សាន្តដែលមិនប្រើឧបករណ៍ឌីជីថល និងការរួមបញ្ចូល AI។ រូបថត៖ ថុងហាយ
លោកស្រី តូ ធ្វីយីមក្វៀន កំពុងពិភាក្សាជាមួយមិត្តរួមការងារ អំពីគម្រោងបណ្តុះបណ្តាល។ រូបថត៖ ថុងហាយ/កាសែតរូបភាពវៀតណាម
ឥទ្ធិពលរបស់លោកស្រីបានរីករាលដាលយ៉ាងឆាប់រហ័សហួសពីព្រំដែនវៀតណាម។ លោកស្រីជាជនជាតិវៀតណាមដំបូងគេដែលបាន Microsoft ទទួលស្គាល់ជាអ្នកជំនាញអប់រំច្នៃប្រឌិតឆ្នើម (Microsoft Innovative Educator Expert Fellow) - ជាសក្ខីភាពបញ្ជាក់ពីសមត្ថភាពក្នុងការធ្វើសមាហរណកម្ម និងសមត្ថភាពដឹកនាំការផ្លាស់ប្ដូរថ្មី។ នៅឆ្នាំ២០២០ InnEdu បានក្លាយជាដៃគូបណ្ដុះបណ្ដាលសកលដំបូងរបស់ Microsoft នៅវៀតណាម ដែលជាចំណុចរបត់សំខាន់ក្នុងកិច្ចសហប្រតិបត្តិការរវាងវិស័យសាធារណៈ និងឯកជនស្ដីពីការអប់រំ។ លោកស្រីបានអញ្ជើញឱ្យធ្វើជាគណៈមេប្រយោគនៅវេទិកាអប់រំសកលឆ្នាំ២០១៥ នៅសហរដ្ឋអាមេរិក ជាតំណាងតែម្នាក់គត់មកពីទ្វីបអាស៊ីក្នុងព្រឹត្តិការណ៍នេះ។
អ្នកជំនាញអប់រំ តូ ធ្វីយីមក្វៀន គឺជាជនជាតិវៀតណាមដំបូងគេ ដែលបានក្រុមហ៊ុន Microsoft ទទួលស្គាល់ថាជា អ្នកជំនាញអប់រំប្រកបដោយការច្នៃប្រតិដ្ឋឆ្នើម។ រូបថត៖ ថុង ហាយ/កាសែតរូបភាពវៀតណាម
ការរួមចំណែកជាប់លាប់បានជួយលោកស្រីបាន Forbes វៀតណាម ផ្ដល់កិត្តិយសក្នុងបញ្ជី «ស្ត្រីវៀតណាមទាំង ២០ រូបដែលបំផុសគំនិត» ឆ្នាំ២០២១។ ក៏ប៉ុន្តែ ចំពោះលោកស្រី រង្វាន់ធំបំផុតមិនមែនជាកិត្តិយសឡើយ តែជាពេលដែលឃើញពន្លឺកែវភ្នែកដ៏មានទំនុកចិត្ត របស់សិស្សដែលធ្លាប់ខ្លាចសាលារៀន។ «រៀនដើម្បីទទួលបានសេរីភាព» - ជាពាក្យដែលលោកស្រីតែងនិយាយ។ ចំពោះលោកស្រី ការរៀនសូត្រមិនមែនគ្រាន់តែដើម្បីទទួលបានពិន្ទុខ្ពស់នោះទេ តែដើម្បីឱ្យមនុស្សមានសមត្ថភាពក្នុងការជ្រើសរើស និងរស់នៅក្នុងជីវិតសុភមង្គល។
អ្នកជំនាញអប់រំ លោកស្រី តូ ធ្វីយីមក្វៀន បណ្ដុះបណ្ដាលអំពីការផ្លាស់ប្តូរឌីជីថល សម្រាប់វិស័យអប់រំ និងបណ្តុះបណ្តាល នៃទីក្រុងហូជីមិញ។ រូបថត៖ ឯកសារផ្ទាល់ខ្លួន
អ្នកជំនាញអប់រំ លោកស្រី តូ ធ្វីយីមក្វៀន ចែករំលែកអំពីជំនាញពលរដ្ឋឌីជីថល ព្រមទាំងកំណត់ទិសដៅសម្រាប់ខ្លួនឯង ដល់និស្សិតនៃសកលវិទ្យាល័យជាតិហូជីមិញ។ រូបថត៖ ឯកសារផ្ទាល់ខ្លួន
អ្នកជំនាញអប់រំ លោកស្រី តូ ធ្វីយីមក្វៀន ចែករំលែកអំពីជំនាញពលរដ្ឋឌីជីថល ព្រមទាំងកំណត់ទិសដៅសម្រាប់ខ្លួនឯង ដល់និស្សិតនៃសកលវិទ្យាល័យជាតិហូជីមិញ។ រូបថត៖ ឯកសារផ្ទាល់ខ្លួន
លោកស្រីជឿថា បណ្ដា «ស្នាមរបួស» ក្នុងជីវិតមិនមែនជាបរាជ័យទេ តែជាធាតុផ្សំដែលជួយមនុស្សឲ្យពេញវ័យ។ ដោយសារជម្នះនូវការបាត់បង់ផ្ទាល់ខ្លួន លោកស្រីយល់កាន់តែច្បាស់ពីតម្លៃនៃការតស៊ូអត់ធ្មត់ និងមេត្តាធម៌ - ជាកត្តាពីរដែលលោកស្រីតែងតែបង្ហាត់បង្រៀនដល់សិស្ស និងសហការី។
អ្នកជំនាញអប់រំ តូ ធ្វីយីមក្វៀន ក្នុងព្រឹត្តិការណ៍ “អុជភ្លើងឆ្ពោះទៅមុខទាំងអស់គ្នា” នៃអ្នកគ្រប់គ្រងអប់រំ ដែលបានរៀបចំឡើងជារៀងរាល់ឆ្នាំ ដោយ ក្លឹបគ្រប់គ្រងអប់រំឥតព្រំដែន (EdulightenUp) ចំណុះឱ្យ វិទ្យាស្ថានស្រាវជ្រាវ និងអភិវឌ្ឍន៍ការគ្រប់គ្រងអប់រំ (ELRD)។ រូបថត៖ ឯកសារផ្ទាល់ខ្លួន

នៅឆ្នាំ២០២១ ទស្សនាវដ្តី Forbes វៀតណាម បានលើកតម្កើង លោកស្រី តូ ធ្វីយីមក្វៀន ក្នុងបញ្ជី "ស្ត្រីវៀតណាម ២០ រូបដែលបំផុសគំនិត”។ រូបភាព៖ ថុងហាយ
សព្វថ្ងៃនេះស្ថិតក្នុងវ័យជាង៥០ឆ្នាំ អ្នកជំនាញអប់រំ លោកស្រី តូ ធ្វីយីមក្វៀន នៅតែខិតខំប្រឹងប្រែងលើដំណើរការផ្លាស់ប្ដូរថ្មី។ លោកស្រីបន្តកាន់តួនាទីជានាយកប្រតិបត្តិក្រុមហ៊ុន InnEdu ទន្ទឹមនឹងនោះក៏ជាវាគ្មិន និងអ្នកជំនាញសម្រាប់កម្មវិធីកំណែទម្រង់របស់ក្រសួងអប់រំ និងបណ្ដុះបណ្ដាល បន្ត «សាបព្រោះគ្រាប់ពូជ» នៃការផ្លាស់ប្ដូរថ្មីក្នុងថ្នាក់រៀននីមួយៗ គ្រូបង្រៀនម្នាក់ៗ។ កេរដំណែលរបស់លោកស្រីមិនត្រឹមតែស្ថិតនៅលើសមិទ្ធផលប៉ុណ្ណោះទេ តែស្ថិតនៅលើផ្នត់គំនិតផងដែរ៖ ការអប់រំមិនមែនជាការប្រណាំងនោះទេ តែជាដំណើរការនៃការស្វែងរក និងរំដោះមនុស្សជាតិ៕
អត្ថបទ៖ ថាវវី រូបថត៖ ថុងហាយ & ឯកសារផ្ទាល់ខ្លួន
ប្រែសម្រួល៖ រីកើង