ពិធីបើកកម្មវិធីនេះមានការអញ្ជើញចូលរួមពីលោក ង្វៀន មិញ វូ ឯកអគ្គរដ្ឋទូតវៀតណាមប្រចាំព្រះរាជាណាចក្រកម្ពុជា តំណាងអាជ្ញាធរមូលដ្ឋាន ថ្នាក់ដឹកនាំសមាគម VCBA សមាគមមិត្តភាពវៀតណាម-កម្ពុជា ទីក្រុងហូជីមិញ ព្រមទាំងតំណាងសហគ្រាសដែលបានចូលរួមគាំទ្រកម្មវិធី។

កម្មវិធីនេះត្រូវបានរៀបចំឡើងនៅសាលាបឋមសិក្សា Northern Samraong ក្នុងខណ្ឌព្រែកព្នៅ ដោយមានប្រជាពលរដ្ឋដើមកំណើតវៀតណាម និងប្រជាពលរដ្ឋកម្ពុជាដែលមានជីវភាពរស់នៅជួបការលំបាកនៅក្នុងតំបន់ប្រមាណ ២.០០០ នាក់។

លោក ង្វៀន មិញ វូ ឯកអគ្គរដ្ឋទូតវៀតណាមប្រចាំព្រះរាជាណាចក្រកម្ពុជា ថ្លែងមតិក្នុងពិធី។ រូបថត៖ VNA

ថ្លែងមតិក្នុងពិធីនេះ លោក ង្វៀន មិញ វូ ឯកអគ្គរដ្ឋទូតវៀតណាមប្រចាំព្រះរាជាណាចក្រកម្ពុជា បានវាយតម្លៃខ្ពស់ចំពោះគំនិតផ្តួចផ្តើម និងកិច្ចសហការយ៉ាងជិតស្និទ្ធរបស់អង្គភាពរៀបចំ ព្រមទាំងការគាំទ្រយ៉ាងសកម្មពីរដ្ឋបាលរាជធានីភ្នំពេញ និងស្មារតីទទួលខុសត្រូវចំពោះសង្គមរបស់សហគមន៍ធុរកិច្ច។

លោកឯកអគ្គរដ្ឋទូតបានសង្កត់ធ្ងន់ថា សកម្មភាពថែទាំសុខភាពមនុស្សធម៌ ក្រោមប្រធានបទ «រួមគ្នាដើម្បីសុខភាពសហគមន៍ - ពង្រឹងចំណងសាមគ្គីភាព និងមិត្តភាពវៀតណាម-កម្ពុជា» មិនត្រឹមតែរួមចំណែកថែទាំជីវភាព និងសុខភាពរបស់ប្រជាពលរដ្ឋដែលជួបការលំបាកប៉ុណ្ណោះទេ ប៉ុន្តែថែមទាំងជាសក្ខីភាពជាក់ស្តែងមួយក្នុងការពង្រឹង និងរឹតចំណងមិត្តភាពប្រពៃណី ព្រមទាំងសាមគ្គីភាពរវាងប្រជាជននៃប្រទេសទាំងពីរផងដែរ។

ក្នុងឱកាសនេះ តំណាងអាជ្ញាធរមូលដ្ឋាន និងថ្នាក់ដឹកនាំសមាគម VCBA ក៏បានសម្តែងសេចក្តីរីករាយចំពោះការគាំទ្រយ៉ាងសកម្មពីសំណាក់សហគមន៍ និងបានបញ្ជាក់ថា កម្មវិធីនេះជាសកម្មភាពសុខុមាលភាពសង្គមដែលមានអត្ថន័យមនុស្សធម៌យ៉ាងជ្រាលជ្រៅ បង្ហាញពីស្មារតីជួយយកអាសាគ្នា និងទំនាក់ទំនងដ៏ជិតស្និទ្ធរវាងសហគមន៍ធុរកិច្ច និងប្រជាពលរដ្ឋក្នុងតំបន់។

ក្រុមគ្រូពេទ្យកំពុងពិនិត្យអេកូជូនប្រជាពលរដ្ឋ។ រូបថត៖ VNA

កម្មវិធីនេះបានប្រមូលផ្តុំកម្លាំងគ្រូពេទ្យ វេជ្ជបណ្ឌិត ឱសថការី បុគ្គលិកសុខាភិបាល និងអ្នកស្ម័គ្រចិត្តសរុបចំនួន ១៧៥ នាក់ មកពីប្រទេសវៀតណាម និងកម្ពុជា។ ក្រៅពីការពិនិត្យព្យាបាលជំងឺ ផ្តល់ប្រឹក្សាសុខភាព ពិនិត្យអេកូសាស្ត្រ និងធ្វើតេស្តមូលដ្ឋាន គណៈកម្មការរៀបចំក៏បានត្រៀមរថយន្តសង្គ្រោះបន្ទាន់ចំនួន ២ គ្រឿង ដើម្បីត្រៀមជួយសង្គ្រោះអ្នកជំងឺ ព្រមទាំងផ្តល់ថ្នាំពេទ្យដោយឥតគិតថ្លៃ ចែកវ៉ែនតាសម្រាប់មនុស្សវ័យចំណាស់ជាង ១.០០០ គូ និងផ្តល់ភេសជ្ជៈជូនអ្នកចូលរួមនៅនឹងកន្លែង។

ជាមួយគ្នានេះ ប្រជាពលរដ្ឋម្នាក់ៗដែលមកទទួលការពិនិត្យព្យាបាលជំងឺ ក៏ទទួលបានអំណោយជាសម្ភារៈប្រើប្រាស់ចាំបាច់ប្រចាំថ្ងៃមួយកញ្ចប់ និងថវិកាជំនួយមួយចំនួនផងដែរ។

កម្មវិធីនេះទទួលបានការគាំទ្រ និងឧបត្ថម្ភជាក់ស្តែងពីសហគ្រាស និងអង្គភាពជាច្រើន រួមមានក្រុមហ៊ុន Metfone ធនាគារ BIDC សម្ព័ន្ធក្រុមហ៊ុនឧស្សាហកម្មកៅស៊ូវៀតណាម (VRG) ក្រុមហ៊ុន Angkor Milk ព្រមទាំងសហគ្រាស និងសប្បុរសជនជាច្រើនទៀតនៅក្នុងតំបន់។