ក្នុងដំណើរ៨០ឆ្នាំ នៃការកសាងនិងអភិវឌ្ឍប្រទេសជាតិ វិស័យកសិកម្មនៃរដ្ឋធានីហាណូយ បានធ្វើការផ្លាស់ប្តូរយ៉ាងខ្លាំង ពីការផលិតសម្រាប់ប្រើប្រាស់ផ្ទាល់ខ្លួនទៅជាការផលិតទំនិញ ប្រើប្រាស់បច្ចេកវិទ្យាខ្ពស់ និងបន្តិចម្តងៗធ្វើសមាហរណកម្មទៅក្នុងពិភពលោក។
ក្នុងដំណើរ៨០ឆ្នាំ នៃការកសាងនិងអភិវឌ្ឍប្រទេសជាតិ វិស័យកសិកម្មនៃរដ្ឋធានីហាណូយ បានធ្វើការផ្លាស់ប្តូរយ៉ាងខ្លាំង ពីការផលិតសម្រាប់ប្រើប្រាស់ផ្ទាល់ខ្លួនទៅជាការផលិតទំនិញ ប្រើប្រាស់បច្ចេកវិទ្យាខ្ពស់ និងបន្តិចម្តងៗធ្វើសមាហរណកម្មទៅក្នុងពិភពលោក។ ដំណាំតែ ជាដំណាំឧស្សាហកម្មប្រពៃណីនៃរដ្ឋធានីហាណូយ ក៏មិនស្ថិតនៅក្រៅលំហូរនេះដែរ ដោយបច្ចុប្បន្នកំពុងបានរៀបចំផលិតតាមខ្សែសង្វាក់តភ្ជាប់គ្នា ឆ្ពោះទៅរកគោលដៅនាំចេញ និងអភិវឌ្ឍប្រកបដោយចីរភាព។
បាត្រាយ (Ba Trai) គឺជាតំបន់ដាំដុះតែធំជាងគេបំផុត នៃរដ្ឋធានីហាណូយ ដែលមានផ្ទៃដីជាង ៤៧០ ហិកតា។
កម្មាភិបាលកសិកម្ម នៃមន្ទីរកសិកម្ម និងបរិស្ថានរដ្ឋធានីហាណូយ បានចុះណែនាំដោយផ្ទាល់ ដល់បងប្អូនកសិករ ពីបច្ចេកទេសប្រមូលផលត្រួយតែ នៅលើភ្នំតែបាត្រាយ (Ba Trai)។
លែងមានការផលិតជាលក្ខណៈតូចតាច លក្ខណៈគ្រួសារទៀតហើយ ក្នុងរយៈពេលប៉ុន្មានឆ្នាំថ្មីៗនេះ រដ្ឋធានីហាណូយបានបង្កើតតំបន់ដាំតែប្រមូលផ្តុំជាច្រើន ដែលមានផែនការច្បាស់លាស់ និងការគ្រប់គ្រងតឹងរ៉ឹង ចាប់តាំងពីពូជ ដំណើរការបច្ចេកទេស រហូតដល់ការប្រើប្រាស់សម្ភារៈកសិកម្មប្រកបដោយសុវត្ថិភាព។ តាមរយៈសហករណ៍កសិកម្ម រដ្ឋធានីបានរៀបចំខ្សែសង្វាក់ផលិតកម្មតែ តាមទម្រង់រូបភាពបិទជិត រួមមាន ការដាំដុះ ការប្រមូលផល ការកែច្នៃបឋម និងប្រើប្រាស់។ ដំណើរការទាំងមូល បានត្រួតពិនិត្យហ្មត់ចត់ ដោយឆ្លើយតបទៅនឹងស្តង់ដារបច្ចេកទេសខ្ពស់ នៃទីផ្សារអន្តរជាតិ។ សកម្មភាពតាមដានប្រភព និងការផ្តល់លេខកូដតំបន់ដាំដុះ ក៏កំពុងបានអនុវត្តស្របគ្នា ដើម្បីបង្កើតមូលដ្ឋានគ្រឹះសម្រាប់វិស័យតែរបស់រដ្ឋធានីហាណូយ ក្នុងការចូលទៅកាន់ទីផ្សារនាំចេញមានសក្តានុពល។
នៅតាមភូមិភុកស្វឹន (Phuc Xuan) និង ឌូលឿង (Do Luong) (ឃុំត្រុងយ៉ា - Trung Gia) តែរាប់រយហិកតា បានដាំដុះតាមទិសដៅសុវត្ថិភាព និងប្រសិទ្ធភាព។ យោងតាម លោកស្រីដាវ ធីគ្វី (Dao Thi Quy) នាយិកាសហករណ៍កសិកម្ម និងរុក្ខាកម្មបាក់សើន (Bac Son) ជាមួយនឹងដំណើរការបច្ចេកទេស ដែលបានកែលម្អ តែមួយហិកតាអាចផ្តល់ទិន្នផលប្រហែល ៥តោននៃត្រួយស្រស់ ស្មើនឹង១តោននៃតែស្ងួត។ ដោយសារបានកែច្នៃ និងវេចខ្ចប់ប្រកបដោយវិជ្ជាជីវៈ ផលិតផលមានការរចនាប្រអប់ ផ្លាកសញ្ញា និងការតាមដានប្រភពច្បាស់លាស់ យើយបានទទួលស្គាល់សម្រេចស្តង់ដារ OCOP ផ្កាយ៤ ដូច្នេះតម្លៃលក់តែមានស្ថិរភាព ការលក់មានភាពងាយស្រួល ដែលផ្តល់ប្រាក់ចំណូលដល់កសិករ ពី ២៥០ - ៣០០លានដុងក្នុងមួយហិកតា ក្នុងមួយឆ្នាំ។
ប្រជាជននៅភូមិបាត្រាយ (Ba Trai) ឃុំស៊ូយហាយ (Suoi Hai) លីងតែតាមវិធីសាស្ត្របុរាណ។
សហករណ៍ និងសហគ្រាសមួយចំនួន នៅក្នុងតំបន់រដ្ឋធានីហាណូយ បានផ្តោតលើការកសាងពាណិជ្ជញ្ញាតែ ពង្រឹងការជំរុញពាណិជ្ជកម្ម ការផ្សព្វផ្សាយផលិតផល ដែលនាំមកនូវប្រាក់ចំណូលខ្ពស់ ដល់បងប្អូនកសិករ។
ចំណែកនៅភូមិបាត្រាយ (Ba Trai) (ឃុំស៊ុយហាយ - Suoi Hai) ជាតំបន់ដាំតែធំបំផុតរបស់រដ្ឋធានី ដោយមានទំហំជាង ៤៧០ហិកតា ដំណាំតែបានលូតលាស់ខ្លាំងនៅលើដីខ្ពង់រាប ដែលមានអាកាសធាតុត្រជាក់ និងលក្ខណៈដីសមស្រប។ ផលិតផលតែបាត្រាយ (Ba Trai) មានគុណភាពខ្ពស់ ក្លិនក្រអូបធម្មជាតិ រសជាតិឆ្ងាញ់ពិសេស មានរហស្សនាមថា “តែលេខមួយនៃរដ្ឋធានី”។ បងស្រី វូ ធីតឹម (Vu Thi Tam) ជាប្រជាពលករម្នាក់ នៅក្នុងតំបន់ បានចែករំលែកថា៖ “ដោយទទួលបានការគាំទ្រពីវិស័យកសិកម្មរដ្ឋធានីហាណូយ ក្នុងការនាំយកពូជថ្មីមកដាំ និងកែលម្អចម្ការតែចាស់ៗ យើងខ្ញុំបានអនុវត្តដំណើរការ VietGAP ដូច្នេះទិន្នផល គុណភាព និងតម្លៃតែបានកើនឡើងច្បាស់លាស់”។
តាមលោក តា វ៉ាន់ទឿង (Ta Van Tuong) អនុប្រធានមន្ទីរកសិកម្ម និងបរិស្ថានហាណូយ រដ្ឋធានីទាំងមូល បច្ចុប្បន្នមានផ្ទៃដីដាំតែជាង ២០០០ហិកតា ក្នុងនោះមាន ៣៥៦ហិកតា បានផលិតតាមទិសដៅអនុវត្តបច្ចេកវិទ្យាខ្ពស់ ស្រូបយកប្រហែល ១០,២% នៃផ្ទៃដីសរុប។ តំបន់ដាំតែល្បីៗនៃរដ្ឋធានីហាណូយ ដូចជា បាក់សើន (Bac Son) ឡុងភូ (Long Phu) បាត្រាយ (Ba Trai)។ល។ មិនត្រឹមតែអនុវត្តការប្រើប្រាស់គ្រឿងយន្ត ក្នុងការថែទាំ និងប្រមូលផលប៉ុណ្ណោះទេ ថែមទាំងវិនិយោគលើប្រព័ន្ធកែច្នៃទំនើប ធានាបានអនាម័យនិងសុវត្ថិភាពស្បៀងអាហារ ព្រមទាំងឆ្លើយតបទៅនឹងស្តង់ដារអន្តរជាតិ។ ហេតុនេះ ផលិតផលតែរបស់តំបន់ បានចាប់ផ្តើមជ្រៀតចូលទីផ្សារពិបាកមួយចំនួនដូចជា៖ រុស្ស៊ី តៃវ៉ាន់ (ចិន) មជ្ឈិមបូព៌ា។ល។ គូសបញ្ជាក់ជំហានទៅមុខថ្មី ក្នុងដំណើរការឈានទៅដល់ពិភពលោក នៃកសិផលរបស់រដ្ឋធានី។
ប៉ុន្មានឆ្នាំថ្មីៗនេះ រដ្ឋធានីហាណូយ បានបង្កើតតំបន់ដាំតែប្រមូលផ្តុំជាច្រើន ដែលមាន ការរៀបចំផែនការច្បាស់លាស់ ការគ្រប់គ្រងយ៉ាងតឹងរ៉ឹង ចាប់ពីពូជ បច្ចេកទេស និងការប្រើប្រាស់សម្ភារៈកសិកម្ម ប្រកបដោយសុវត្ថិភាព។
លោកស្រី ផាម ធីលី (Pham Thi Ly) (ខាងឆ្វេងបំផុត) - នាយិកាក្រុមហ៊ុនទទួលខុសត្រូវមានកម្រិតយិនសិនញឹតយឿងស៊ីញ (Nhat Duong Sinh) បានដឹកនាំគណៈកម្មាធិការ នៃមន្ទីរកសិកម្ម និងបរិស្ថានរដ្ឋធានីហាណូយ ពិនិត្យមើលចម្ការបណ្តុះតែផ្កាពណ៌មាស នៅក្នុងតំបន់ឃុំជុងយ៉ា (Trung Gia)។
ទន្ទឹមនឹងការរៀបចំផលិតកម្ម រដ្ឋធានីហាណូយបានយកចិត្តទុកដាក់ជាពិសេស ចំពោះការកសាងពាណិជ្ជសញ្ញា និងការពង្រីកទីផ្សារលក់។ ជាក់ស្តែង ផលិតផល “តែស្អាតបាត្រាយ (Ba Trai)” ត្រូវបានផ្តល់ការការពារពាណិជ្ជសញ្ញា មានលេខកូដ QR សម្រាប់តាមដានប្រភព និងមានផ្លាកសញ្ញាបញ្ជាក់គុណភាពពេញលេញ។ ផលិតផលនេះ បច្ចុប្បន្នមានស្តង់ដារ OCOP ផ្កាយ៣ និងបានចែកចាយនៅតាមប្រព័ន្ធហាងលក់អាហារស្អាត ហាងលក់កសិផលជាច្រើន ផ្តល់ប្រាក់ចំណូលស្ថិរភាពប្រហែល ៣០០លានដុងក្នុងមួយហិកតា ក្នុងមួយឆ្នាំដល់ប្រជាកសិករ។ ជាមួយគ្នានេះ ផលិតផលតែរដ្ឋធានីហាណូយ កំពុងបានដាក់លក់បន្តិចម្តងៗ នៅលើទីផ្សារពាណិជ្ជកម្មអេឡិចត្រូនិក ចូលរួមពិព័រណ៍កសិផលក្នុងតំបន់អាស៊ាន អាស៊ីបូព៌ា អឺរ៉ុប ដូច្នេះបានចូលរួមចំណែកលើកកម្ពស់ទីជំហរ និងពាណិជ្ជសញ្ញាលើទីផ្សារអន្តរជាតិ។
ការបង្កើតខ្សែសង្វាក់ផលិតកម្ម - កែច្នៃ - លក់តែ របស់រដ្ឋធានីហាណូយ មិនត្រឹមតែជួយគ្រប់គ្រងគុណភាព កាត់បន្ថយចំណាយអន្តរការីប៉ុណ្ណោះទេ ថែមទាំងបង្កើតបានទីផ្សារលក់មានស្ថិរភាព កាត់បន្ថយហានិភ័យសម្រាប់ប្រជាកសិករ។ នេះគឺ ជាវិធីសាស្ត្រប្រកបដោយប្រសិទ្ធភាព ជួយបង្កើនតម្លៃកសិផល ព្រមទាំងបញ្ជាក់ពីតួនាទីដឹកនាំនៃរដ្ឋធានីហាណូយ ក្នុងដំណើរការផ្លាស់ប្តូរទៅរកកសិកម្មទំនើប ប្រកបដោយចីរភាព និងមានការប្រកួតប្រជែងជាសកល។
អត្ថបទនិងរូបថត៖ ហ្វាងហា/កាសែតរូបភាពវៀតណាម
ប្រែសម្រួល៖ រីកើង