នាព្រឹកថ្ងៃទី ១៦ ខែកញ្ញា ឆ្នាំ២០១៩ នៅទីក្រុងហាណូយ គណៈកម្មាធិការមជ្ឈឹមបក្សកុម្មុយនិស្តវៀតណាម រដ្ឋសភា ប្រធានរដ្ឋ រដ្ឋាភិបាល គណៈកម្មាធិការមជ្ឈឹមរណសិរ្សមាតុភូមិវៀតណាមនិងទីក្រុងហាណូយបានប្រារព្ធឡើងពិធីរំលឹកខួបលើកទី ១៣០ នៃថ្ងៃកំណើតរបស់ លោក Bui Bang Doan អតីតប្រធានគណៈ កម្មាធិការអចិន្ត្រៃយ៍រដ្ឋសភានៃសាធារណរដ្ឋប្រជាធិបតេយ្យវៀតណាម (ដែលនាបច្ចុប្បន្នជាប្រធានរដ្ឋសភានៃសាធារណរដ្ឋសង្គមនិយមវៀតណាម) ។
![](https://imagevietnam.vnanet.vn/Upload/2019/9/17/17092019094656125ttxvn_le_ky_niem_130_nam_ngay_sinh_truong_ban_thuong_truc_quoc_hoi_bui_bang_doan_4077114_2_tcqh.jpg)
ប្រធានរដ្ឋសភាវៀតណាម លោកស្រី Nguyen Thi Kim Ngan អញ្ជើញចូលរួមពិធីរំលឹកខួបលើកទី ១៣០
នៃថ្ងៃកំណើតរបស់លោក Bui Bang Doan អតីតប្រធានរដ្ឋសភាវៀតណាម (រូបថត៖ quochoi.vn)
អញ្ជើញចូលរួមពិធីនេះមានវត្តមានរបស់ប្រធានរដ្ឋសភាវៀតពណាម លោកស្រី Nguyen Thi Kim Ngan; អនុប្រធារដ្ឋវៀតណាមលោកស្រី Dang Thi Ngoc Thinh និងឧបនាយករដ្ឋមន្ត្រីវៀតណាម លោក Vu Duc Dam ។
ថ្លែងនៅក្នុងពិធីនេះ ប្រធានរដ្ឋសភាវៀតណាមលោកស្រី Nguyen Thi Kim Ngan បានលើកច្បាស់ថាកាលពីខែមករាឆ្នាំ ១៩៤៦ លោក Bui Bang Doan ត្រូវបានជ្រើសតាំងជាសមាជិករដ្ឋសភានៃខេត្ត Ha Dong ហើយនាខែវិច្ឆិកាឆ្នាំនោះ លោកត្រូវបានរដ្ឋសភានៃសាធារណរដ្ឋប្រជាធិបតេយ្យវៀតណាមនៅសម័យប្រជុំផ្តល់ទំនុកចិត្តលើកទី ២ ជ្រើសតាំងជាប្រធានគណៈកម្មាធិការអចិន្ត្រៃយ៍នៃរដ្ឋសភា ជំនួសឲ្យលោក Nguyen Van To ដែលទៅបំពេញបេសកកម្មថ្មីផងដែរ។ លោកស្រី Nguyen Thi Kim Ngan បានឲ្យដឹងថាក្នុងគ្រាការលំបាកឧបសគ្គនៃបដិវត្តវៀតណាម លោក Bui Bang Doan មិនបានខ្វល់ចិត្តអំពីការលះបង់គ្រប់យ៉ាងនិងត្រៀមខ្លួនទទួលតំណែងដ៏សំខាន់ៗផងដែរ។
“ ពិធីរំលឹកខួបកំណើតលើកទី ១៣០ របស់ប្រធានគណៈកម្មាធិការអចិន្ត្រៃយ៍រដ្ឋសភាវៀតណាម លោក Bui Bang Doan គឺជាឱកាសសម្រាប់យើងសំដែងការដឹងគុណនិងរំលឹកឡើងវិញនូវគុណូបំណាច់និងការលះបង់ដ៏ធំធេងរបស់លោកចំពោះប្រជាជននិងបដិវត្តវៀតណាម។ លោក Bui Bang Doan គឺជាគំរូដ៏ខ្ពង់ខ្ពស់មួយរូបនៃបញ្ញាវន្តស្នេហាជាតិដ៏ស្មោះត្រង់ដែលជានិច្ចកាលលះបង់ជីវិតរបស់ខ្លួនដើម្បីបំរើមាតុភូមិនិងបំរើប្រជាជនផងដែរ។
ស្មារតីធ្វើការអស់ពីចិត្តពីថ្លើមកម្លាំងកាយចិត្ត ការលះបង់ជីវិតសម្រាប់ប្រទេសជាតិនិងប្រជាជន ក៏ដូចជាការរស់នៅដ៏សុភាពរាបសារនិងសាមញ្ញដោយមិនខ្វល់ចិត្តពីកិត្តិនាមនិងទ្រព្យសម្បត្តិរបស់លោកបានចាត់ទុកជាគំរូដ៏ភ្លឺស្វាងមួយរូបសម្រាប់សមាជិកសមាជិការដ្ឋសភា រួមទាំងកម្មាភិបាល បក្ខជន និងប្រជាជនទាំងមូល ដើម្បីសិក្សារៀនសូត្រនិងធ្វើតាមឲ្យបានល្អផងដែរ។ គំរូដ៏ល្អរបស់លោក Bui Bang Doan បានរួមចំណែកដ៏សំខាន់ក្នុងការបំប៉នឧត្តមគតិនិងប្រពៃណីបដិវត្តសម្រាប់កម្មាភិបាល បក្ខជន និងប្រជាជន ជាពិសេសគឺយុវជនវ័យក្មេងជំនាន់ក្រោយក្នុងបុព្វហេតុកសាងប្រទេសជាតិ»៕
តាម VOV5 - វិទ្យុសម្លេងវៀតណាម