ប្រធានរដ្ឋសភាវៀតណាម លោក Vuong Dinh Hue ទទួលជួបលោកនាយឧត្តមសេនីយ Singsuk Singpai អនុប្រធានទី១នៃព្រឹទ្ធសភាថៃ។ (រូបថត៖ VNA)
នៅក្នុងជំនួបនេះ ប្រធានរដ្ឋសភាវៀតណាម លោក Vuong Dinh Hue បានសង្កត់ធ្ងន់ថា ការងារបង្ការទប់ស្កាត់អំពើពុករលួយ និងភាពអសកម្មគឺជាភារកិច្ចស្នូលរបស់បក្ស និងរដ្ឋវៀតណាម។ វៀតណាមបានបង្កើតគណៈកម្មាធិការមជ្ឈិមដឹកនាំការបង្ការ ប្រយុទ្ធប្រឆាំងអំពើពុករលួយ ភាពអសកម្ម ព្រមទាំងក៏បានបង្កើតគណៈកម្មាធិការដឹកនាំនៅថ្នាក់ខេត្ត; ចាត់ការយ៉ាងតឹងរ៉ឹងចំពោះកម្មាភិបាលដែលមានអំពើពុករលួយ។ រដ្ឋសភាវៀតណាមបានចេញផ្សាយច្បាប់ស្ដីពីការបង្ការ ប្រយុទ្ធប្រឆាំងអំពើពុករលួយដើម្បីបង្កើតក្របខ័ណ្ឌគតិយុត្តសម្រាប់ការងារនេះ។ លោកប្រធានរដ្ឋសភាបានមានប្រសាសន៍ថា វៀតណាមនៅតែបន្តរៀនសូត្របទពិសោធន៍របស់ប្រទេសដទៃទៀត ដើម្បីជំរុញខ្លាំងការងារតស៊ូ ប្រយុទ្ធប្រឆាំងនឹងអំពើពុករលួយ និងភាពអសកម្ម ដោយដើរទន្ទឹមនឹងអនុវត្តការសន្សំសំចៃ ប្រឆាំងភាពខ្ជះខ្ជាយ។
រីឯខ្លួនវិញ អនុប្រធានទីមួយនៃព្រឹទ្ធសភាថៃ លោក Singsuk Singpai បានវាយតម្លៃខ្ពស់ចំពោះប្រទេសវៀតណាមវៀតណាម ដែលនៅតែសម្រេចបាននូវល្បឿនកំណើន GDP ខ្ពស់ ហើយរក្សាបាននូវសន្ទុះកំណើននាពេលកន្លងមក ព្រមទាំងមានគោលបំណងថា នាពេលខាងមុខ ទំនាក់ទំនងរវាងប្រទេសទាំងពីរ និងប្រជាជននៃប្រទេសទាំងពីរនឹងកាន់តែរីកចម្រើន ប្រកបដោយចីរភាព; ក្រុមសមាជិកសភាមិត្តភាពនៃប្រទេសទាំងពីរនឹងបន្តបង្កើនដំណើរទស្សនកិច្ច កិច្ចប្រជុំ និងការផ្លាស់ប្តូរបទពិសោធន៍ប្រតិបត្តិការ។
តាមការអនុញ្ញាតពីប្រធានរដ្ឋសភាថៃ អនុប្រធានទី១ព្រឹទ្ធសភាថៃបានគោរពអញ្ជើញប្រធានរដ្ឋសភាវៀតណាម លោក Vuong Dinh Hue ចូលរួមវេទិកាសភាអាស៊ី-ប៉ាស៊ីហ្វិក (APPF) នៅប្រទេសថៃ នាថ្ងៃទី ១០ តុលា ខាងមុខនេះ៕