នៅក្នុងសេចក្តីជូនដំណឹងមួយដែលបានបង្ហោះនៅលើគេហទំព័ររបស់ក្រសួងហិរញ្ញវត្ថុចិន គណៈកម្មការពន្ធគយនៃរដ្ឋសភាចិនបានឲ្យដឹងថា ប្រទេសចិននឹងដាក់ពន្ធបន្ថែម ១៥% លើធ្យូងថ្ម និងឧស្ម័នធម្មជាតិរាវ និង ១០% លើប្រេងឆៅ គ្រឿងយន្តកសិកម្ម រថយន្តធុនធំ និងរថយន្តភីកអាប់ នាំចូលពីសហរដ្ឋអាមេរិក។ សេចក្តីសម្រេចចិត្តថ្មីនេះនឹងចូលជាធរមានចាប់ពីថ្ងៃទី ១០ ខែកុម្ភៈ ។
ប្រធានរដ្ឋចិន លោក Xi Jinping និងប្រធានាធិបតីអាមេរិក លោក Donald Trump។ រូបថត៖ Reuter
ក្នុងពេលជាមួយគ្នានោះ ក្រសួងពាណិជ្ជកម្មចិនបានឲ្យដឹងថា ប្រទេសនេះបាននាំយកវិធានការពន្ធរបស់សហរដ្ឋអាមេរិកជូនដល់យន្តការដោះស្រាយវិវាទរបស់អង្គការពាណិជ្ជកម្មពិភពលោក (WTO) "ដើម្បីការពារសិទ្ធិ និងផលប្រយោជន៍ស្របច្បាប់របស់ខ្លួន" ហើយបានជំរុញឱ្យសហរដ្ឋអាមេរិក "កែតម្រូវជាបន្ទាន់នូវអំពើខុសឆ្គង”។ ក្រសួងពាណិជ្ជកម្ម និងនាយកដ្ឋានគយរបស់ចិនក៏បានចេញផ្សាយបញ្ជីត្រួតពិនិត្យការនាំចេញថ្មីដែលទាក់ទងនឹងលោហៈធាតុកម្រជាច្រើនប្រភេទ រួមទាំងសម្ភារៈដែលទាក់ទងនឹងសារធាតុ tungsten ដែលជាធម្មតា ត្រូវបានប្រើប្រាស់ក្នុងឧបករណ៍ឧស្សាហកម្មនិងការពារជាតិ ក៏ដូចជាសម្ភារៈទាក់ទងនឹង tellurium ដែលអាចប្រើប្រាស់សម្រាប់បង្កើតបន្ទះស្រូបពន្លឺព្រះអាទិត្យ៕