កាលពីម្សិលមិញ (ថ្ងៃទី៥ ខែកញ្ញា) នៅខាងក្រៅកិច្ចប្រជុំកំពូលសមាគមប្រជាជាតិអាស៊ីអាគ្នេយ៍ (អាស៊ាន) លើកទី៤៣ នៅទីក្រុងហ្សាកាតា (ឥណ្ឌូនេស៊ី) នាយករដ្ឋមន្ត្រីកម្ពុជា លោក ហ៊ុន ម៉ាណែតបានអញ្ជើញជួបពិភាក្សាដាច់ដោយឡែកជាមួយសមភាគីម៉ាឡេស៊ី លោក Anwar Ibrahim និងសមភាគីសិង្ហបុរី លោក Lee Hsien Loong។

នៅក្នុងជំនួបពិភាក្សាជាមួយនាយករដ្ឋមន្ត្រីម៉ាឡេស៊ី ភាគីទាំងពីរបានពិភាក្សាអំពីវិធានការជំរុញកិច្ចសហប្រតិបត្តិការទ្វេភាគីបន្ថែមទៀតលើវិស័យនយោបាយ ពាណិជ្ជកម្ម វិនិយោគ អប់រំ សន្តិសុខថាមពល ការងារ និងការប្រយុទ្ធប្រឆាំងឧក្រិដ្ឋកម្មតាមអ៊ីនធឺណិត និងឧក្រិដ្ឋកម្មឆ្លងដែន។ ក្នុងវិស័យសន្តិសុខថាមពល លោកនាយករដ្ឋមន្ត្រី ហ៊ុន ម៉ាណែត បានអំពាវនាវដល់សមភាគីលោក Anwar ជួយឧបត្ថម្ភសាងសង់ខ្សែកាបថាមពលក្រោមបាតសមុទ្រ ដោយធ្លាប់តែ ឆ្លងកាត់ព្រំដែនសមុទ្រនៃប្រទេសម៉ាឡេស៊ី ដែលជាផ្នែកមួយនៃគម្រោងពាណិជ្ជកម្មថាមពលបៃតងរវាងកម្ពុជា និងសិង្ហបុរី។

ទន្ទឹមនឹងនោះ នៅក្នុងជំនួបជាមួយនាយករដ្ឋមន្ត្រីសិង្ហបុរី ភាគីទាំងពីរបានពិភាក្សាអំពីវិធានការពង្រីកបន្ថែមទៀតនូវកិច្ចសហប្រតិបត្តិការនាពេលបច្ចុប្បន្នរវាងប្រទេសទាំងពីរលើវិស័យដែលមានសក្តានុពលដូចជា ពាណិជ្ជកម្ម វិនិយោគ ទេសចរណ៍ អប់រំ សន្តិសុខ ថាមពល សុខាភិបាល ឌីជីថល កសិកម្ម និងការពារជាតិ។ លើសពីនេះ ភាគីទាំងពីរក៏បានពិភាក្សាគ្នាអំពីលទ្ធភាពដែលកម្ពុជានាំចេញអង្ករ និងផលិតផលកសិកម្មទៅកាន់ប្រទេសសិង្ហបុរី ក៏ដូចជាគម្រោងសាងសង់ខ្សែកាបថាមពលក្រោមបាតសមុទ្រដែលជាផ្នែកមួយនៃគម្រោងពាណិជ្ជកម្មថាមពលបៃតងរវាងប្រទេសទាំងពីរ៕