27/06/2021 07:29 GMT+7 print

វៀតណាមទទួលបានវាយតម្លៃថាស្ថិតក្នុងទីតាំងល្អបំផុតក្នុងការទាក់ទាញការវិនិយោគផ្ទាល់ពីបរទេស

គេហទំព័រ lexology.com ដែលមានមូលដ្ឋាននៅចក្រភពអង់គ្លេស ទើបតែបានចុះផ្សាយអត្ថបទមួយដែលបញ្ជាក់ថា សេដ្ឋកិច្ចរបស់ វៀតណាមកំពុងទទួលបានសញ្ញាវិជ្ជមានច្រើនជាង បើប្រៀបនឹងប្រទេសជាច្រើនទៀតក្នុងកំឡុងពេលជំងឺរាតត្បាតកូវីដ - ១៩ ហើយកំពុងស្ថិតក្នុងទីតាំងល្អបំផុតក្នុងការទាក់ទាញការវិនិយោគផ្ទាល់ពីបរទេស (FDI)។

ខ្សែសង្វាក់ផលិតកម្មវត្ថុធាតុដើមសម្រាប់ផលិតថ្មថាមពលពន្លឺព្រះអាទិត្យនៅក្រុមហ៊ុនភាគហ៊ុន JA Solar វៀតណាម ទុនវិនិយោគរបស់ហុងកុង (ចិន) នៅតំបន់ឧស្សាហកម្ម Quang Chau  (Bac Giang)  (រូបភាព៖ TTXVN)


យោងតាមអត្ថបទនោះ ប៉ុន្មានឆ្នាំកន្លងមក វៀតណាមជាទិសដៅ សម្រាប់វិនិយោគិនបរទេស ចាប់តាំងពីវៀតណាមបានបើកទីផ្សារនិងជំរុញទំនាក់ទំនងពាណិជ្ជកម្មអន្តរជាតិ។ បន្ទាប់ពីបានចូលជាសមាជិកអង្គការពាណិជ្ជកម្មពិភពលោក WTO នៅឆ្នាំ ២០០៧ និងចូលរួមក្នុងកិច្ចព្រមព្រៀង ពាណិជ្ជ កម្មតាមតំបន់ជាច្រើនជាមួយសហរដ្ឋអាមេរិក ចិន អឺរ៉ុប ជប៉ុន កូរ៉េខាងត្បូងនិងប្រទេសធំៗ ជាច្រើននៅលើពិភពលោក វៀតណាមបានក្លាយជាសមាជិកនៃកិច្ចព្រមព្រៀងពាណិជ្ជកម្មសេរីសកល “យុគសម័យថ្មី” បង្កើតឡើងប្លុកពាណិជ្ជកម្មធំបំផុតរបស់ពិភពលោកនាពេលបច្ចុប្បន្ននេះ ក្នុងនោះមានកិច្ចព្រមព្រៀង CPTPP ភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីជាមួយសហភាពអឺរ៉ុប ជប៉ុននិងកូរ៉េខាងត្បូងផងដែរ។\

វៀតណាមក៏ប្តេជ្ញាបង្កើនខ្សែសង្វាក់តម្លៃផលិតកម្មតាមរយៈ FDI និងបានខិតខំអស់រយៈពេលជាច្រើនឆ្នាំដើម្បីបំប៉ន់ជំនាញរបស់ពលករ។ អត្ថបទវាយតម្លៃថា ការខិតខំប្រឹងប្រែងផ្នែកសេដ្ឋកិច្ចនិងការគ្រប់គ្រងរបស់រដ្ឋាភិបាលវៀតណាមនឹងរួមចំណែកក្នុងការជំរុញលំហូរ FDI ចូលប្រទេសវៀតណាមក្នុងរយៈពេលប៉ុន្មានឆ្នាំខាងមុខនេះជាក់ជាពុំខាន៕

តាម​ VOV5 - វិទ្យុសម្លេងវៀតណាម