30/11/2020 16:27 GMT+7 print

ពិធីប្រគល់ម៉ាស់ដល់សហគមន៍អាណិកជនវៀតណាមនៅឡាវ

នាព្រឹកថ្ងៃទី ២៨ ខែវិច្ឆិកា នៅរដ្ឋធានីវៀងចន្ទន៍ ស្ថានទូតវៀតណាមប្រចាំនៅឡាវ បានរៀបចំពិធីប្រគល់ម៉ាស់វេជ្ជសាស្ត្រចំនួន ៧៥,០០០ សន្លឹកដល់សហគមន៍អាណិកជនវៀតណាមដែលកំពុងធ្វើការ រស់នៅ និងសិក្សានៅប្រទេសឡាវ។ នេះជាការគាំទ្រជាក់ស្តែងពីរដ្ឋាភិបាល វៀតណាមដល់សហគមន៍អាណិកជនវៀតណាមនៅឡាវ ក្នុងបរិបទការវិវឌ្ឍយ៉ាងស្មុគស្មាញនៃជំងឺរាតត្បាត Covid-19 នៅលើពិភពលោក។

ពិធីប្រគល់ម៉ាស់ដល់សហគមន៍អាណិកជនវៀតណាមនៅឡាវ


ថ្លែងនៅក្នុងពិធីនេះ អគ្គទីប្រឹក្សាស្ថានទូតវៀតណាមប្រចាំនៅឡាវលោកស្រី Trinh Thi Tam បានមានប្រសាសន៍ថា ក្នុងរយៈពេលកន្លងមក ជំងឺរាតត្បាតបានរាលដាលពាសពេញពិភពលោក។ ប៉ុន្តែ ជាមួយនឹងការប្តេជ្ញាចិត្តរបស់រដ្ឋាភិបាល និងប្រជាជន វៀតណាមត្រូវបានគេចាត់ទុកថាជាប្រទេសមួយដែលគ្រប់គ្រងជំងឺនេះបានល្អ។ លោកស្រីអគ្គទីប្រឹក្សា Trinh Thi Tam បានសង្កត់ធ្ងន់ថា ម៉ាស់វេជ្ជសាស្រ្តចំនួន ៧៥,០០០ សន្លឹក ជាអំណោយដ៏មានអត្ថន័យ ដែលបង្ហាញពីការយកចិត្តទុកដាក់ និងមនោសញ្ចេតនារបស់ប្រទេស ចំពោះអាណិកជនវៀតណាមនៅប្រទេសឡាវ។

លោក Pham Van Hung អនុប្រធានសមាគមអាណិកជនវៀតណាមនៅឡាវ បានថ្លែងអំណរគុណយ៉ាងជ្រាលជ្រៅចំពោះបក្ស រដ្ឋ រដ្ឋាភិបាល ក៏ដូចជាប្រជាជនក្នុងប្រទេស ដែលបានយកចិត្តទុកដាក់ចំពោះសហគមន៍អាណិកជនវៀតណាមនៅឡាវ៕

 

តាមកាសែតកងទ័ពប្រជាជនអនឡាយ