បង្កើនសមត្ថភាពរចនា ផលិត ជួយសហគ្រាសកែលម្អផលិតកម្ម និងចូលរួមយ៉ាងស៊ីជម្រៅនៅក្នុងខ្សែសង្វាក់ផ្គត់ផ្គង់។ នោះគឺជាតម្រូវការរបស់អគ្គលេខាបក្ស ប្រធានរដ្ឋវៀតណាមលោក តូ ឡឹម នៅក្នុងពិធីមិទ្ទីញរំលឹកខួបលើកទី ៧០​ ទិវាបង្កើតសាកលវិទ្យាល័យវិទ្យាសាស្ត្រនិងបច្ចេកវិទ្យាហាណូយ (ថ្ងៃទី ១៥ ខែតុលា ឆ្នាំ ១៩៥៦ - ថ្ងៃទី ១៥ ខែតុលា ឆ្នាំ ២០២៦) និងទទួលគ្រឿងឥស្សរិយយសការងារថ្នាក់ទីមួយ។

អគ្គលេខាបក្ស ប្រធានរដ្ឋ លោក តូ ឡឹម ប្រគល់គ្រឿងឥស្សរិយយសការងារថ្នាក់ទីមួយជូនសាកលវិទ្យាល័យវិទ្យាសាស្ត្រនិងបច្ចេកវិទ្យាហាណូយ។ (រូបថត៖ VNA)

ដោយប្រគល់គ្រឿងឥស្សរិយយសការងារថ្នាក់ទីមួយជូនសាកលវិទ្យាល័យវិទ្យាសាស្ត្រនិងបច្ចេកវិទ្យាហាណូយ និងថ្លែងនៅក្នុងពិធីរំលឹកខួប អគ្គលេខាបក្ស ប្រធានរដ្ឋ លោក តូ ឡឹម បានស្នើឱ្យកសាងសាកលវិទ្យាល័យវិទ្យាសាស្ត្រនិងបច្ចេកវិទ្យាហាណូយទៅជាសាកលវិទ្យាល័យស្រាវជ្រាវដ៏ឆ្នើម ដែលមានសមត្ថភាពអនុវត្តន៍ភារកិច្ចសំខាន់ៗរបស់ប្រទេសជាតិ។ គោលដៅស្ថិតនៅក្នុងជម្រើសសាកលវិទ្យាល័យកំពូល ១០០ ដល់ ១៥០ នៅអាស៊ីនៅឆ្នាំ ២០៣៥ ត្រូវតែបង្កើតឡើងដោយផ្អែកលើគុណភាពនៃការអប់រំ ការស្រាវជ្រាវ កិត្យានុភាពសិក្សា និងការរួមចំណែកដល់ប្រទេសជាតិ។ លោកអគ្គលេខាបក្ស ប្រធានរដ្ឋ បានបញ្ជាក់យ៉ាងច្បាស់ថា៖

“ត្រូវតែបង្កើតរបកគំហើញក្នុងការបណ្តុះបណ្តាលទេពកោសល្យ កសាងកម្លាំងដែលមានសមត្ថភាពដឹកនាំផ្នែកបច្ចេកវិទ្យា និងឧស្សាហកម្មរបស់វៀតណាម។ ត្រូវតែបណ្តុះបណ្តាលវិស្វករដែលអាចធ្វើម្ចាស់លើការរចនា ការពិសោធន៍ និងមានទំនួលខុសត្រូវវិជ្ជាជីវៈ; អ្នកជំនាញដែលមានសមត្ថភាពដឹកនាំកម្មវិធីទ្រង់ទ្រាយធំ។ នៅក្នុងយុគសម័យនៃបញ្ញាសិប្បនិម្មិត ត្រូវបណ្ដុះផ្នត់គំនិតច្នៃប្រឌិត ខ្លួនទីពឹងខ្លួន ឯករាជ្យ សមត្ថភាពផ្ទៀងផ្ទាត់ និងភាពស្មោះត្រង់ខាងសិក្សា ដោយផ្តោតលើការស្រាវជ្រាវ ធ្វើម្ចាស់លើបច្ចេកវិទ្យា និងដោះស្រាយបញ្ហាធំៗរបស់ប្រទេសជាតិ។ ប្រទេសជាតិកំពុងរង់ចាំដំណោះស្រាយដែលកើតចេញពីបញ្ញានៃសាកលវិទ្យាល័យវិទ្យាសាស្ត្រនិងបច្ចេកវិទ្យា”។

លោកអគ្គលេខាបក្ស ប្រធានរដ្ឋ ក៏បានសម្តែងក្តីសង្ឃឹមថា សាកលវិទ្យាល័យវិទ្យាសាស្ត្រនិងបច្ចេកវិទ្យា នឹងក្លាយជាកន្លែងប្រមូលផ្ដុំបញ្ញាវៀតណាមលើទូទាំងពិភពលោកនិងអ្នកជំនាញអន្តរជាតិ ដោយទាក់ទាញមនុស្សដែលមានទេពកោសល្យឱ្យចូលរួមចំណែកដល់ប្រទេសជាតិ៕