ថ្លែងនៅក្នុងកិច្ចពិភាក្សាទូទៅកម្រិតខ្ពស់នៃមហាសន្និបាតលើកទី១៥៣ នៃសហភាពអន្តរសភាពិភពលោក (IPU-១៥៣) ដែលកំពុងប្រព្រឹត្តទៅនៅទីក្រុង Arusha ប្រទេសតង់ហ្សានី កាលពីថ្ងៃទី៧ ខែតុលា លោក ង្វៀន ហុងយាន អនុប្រធានរដ្ឋសភាវៀតណាម បានសង្កត់ធ្ងន់ថា លក្ខណៈបរិយាប័ន្ន ការជឿទុកចិត្ត និងឱកាសសម្រាប់មនុស្សទាំងអស់គ្នា គឺជាមូលដ្ឋានគ្រឹះនៃអភិបាលកិច្ចប្រកបដោយប្រសិទ្ធភាព និងការផ្តល់អំណាចដល់សហគមន៍។

លោកអនុប្រធានរដ្ឋសភា បានអះអាងថា ការដាក់ប្រជាជនជាកម្លាំងចលករ និងជាចំណុចកណ្តាលនៃការសម្រេចចិត្ត និងសកម្មភាពទាំងអស់ បានរួមចំណែកដល់សមិទ្ធផលសំខាន់ៗរបស់វៀតណាម ក្រោយពីរយៈពេល ៤០ ឆ្នាំនៃបុព្វហេតុផ្លាស់ប្ដូរថ្មី។ វៀតណាមកំពុងបន្តកែទម្រង់ស្ថាប័នយ៉ាងខ្លាំងក្លា ដោយយកវិទ្យាសាស្ត្រ បច្ចេកវិទ្យា នវានុវត្តន៍ ការផ្លាស់ប្តូរឌីជីថល ការផ្លាស់ប្តូរបៃតង និងសេដ្ឋកិច្ចវិលជុំជាកម្លាំងចលករនៃការអភិវឌ្ឍ។

ដោយផ្អែកលើការពិតជាក់ស្តែងនោះ វៀតណាមស្នើឡើងនូវអាទិភាពចំនួនបីសម្រាប់កិច្ចសហប្រតិបត្តិការអន្តរសភា រួមមាន៖ ការជំរុញការចូលរួមរបស់ប្រជាជនក្នុងអភិបាលកិច្ច; ការបង្កើនការត្រួតពិនិត្យ តម្លាភាព និងគណនេយ្យភាព ដើម្បីបង្រួមគម្លាតរវាងការសន្យានិងលទ្ធផល; ការធានាថាវិទ្យាសាស្ត្រ និងបច្ចេកវិទ្យាបម្រើមនុស្ស និងរួមចំណែកក្នុងការបង្រួមគម្លាតអភិវឌ្ឍន៍។ លោកអនុប្រធានរដ្ឋសភាបានអះអាងថា វៀតណាមបន្តជាសមាជិកសកម្ម និងមានការទទួលខុសត្រូវរបស់ IPU ដោយជំរុញការសន្ទនា ពង្រឹងទំនុកចិត្ត និងប្រែក្លាយបញ្ហាប្រឈមទៅជាឱកាសសម្រាប់កិច្ចសហប្រតិបត្តិការ និងការអភិវឌ្ឍរួមគ្នា៕