ទិដ្ឋភាពនៃជំនួបពិភាក្សា (រូបថត៖ VOV)

នៅក្នុងកិច្ចពិភាក្សា ថ្នាក់ដឹកនាំទាំងពីរបានឯកភាពគ្នាលើទិសដៅ និងវិធានការសំខាន់ៗ ដើម្បីបង្កើនបន្ថែមទៀតនូវភាពជាដៃគូ និងយុទ្ធសាស្ត្រគ្រប់ជ្រុងជ្រោយរវាងវៀតណាម និងសហព័ន្ធរុស្ស៊ី។ ភាគីទាំងពីរបានឯកភាពពង្រឹងទំនាក់ទំនងដោយឈរលើមូលដ្ឋាន នៃការជឿទុកចិត្តគ្នាទៅវិញទៅមក មានផលប្រយោជន៍ទៅវិញទៅមក និងមិនជ្រៀតជ្រែកក្នុងកិច្ចការផ្ទៃក្នុងរបស់គ្នាទៅវិញទៅមក ដោយឈរលើគោលការណ៍ជាមូលដ្ឋាននៃធម្មនុញ្ញអង្គការសហប្រជាជាតិ និងច្បាប់អន្តរជាតិ។

ទាក់ទងនឹងនយោបាយ ការទូត ភាគីទាំងពីរបានឯកភាពបន្តលើកកម្ពស់ទំនុកចិត្តនយោបាយ តាមរយៈការបង្កើនការផ្លាស់ប្តូរគណៈប្រតិភូគ្រប់ជាន់ថ្នាក់ ជាពិសេសនៅកម្រិតខ្ពស់បំផុត។ ជំរុញយន្តការសហប្រតិបត្តិការតាមរយៈបណ្តាញរបស់បក្ស រដ្ឋ រដ្ឋាភិបាល រដ្ឋសភា ក្រសួង ស្ថាប័ន មូលដ្ឋាន និងការជួបប្រាស្រ័យរវាងយុវជនជំនាន់ក្រោយ។

ទាក់ទិននឹងកិច្ចសហប្រតិបត្តិការសេដ្ឋកិច្ច ភាគីទាំងពីរបានឯកភាពដាក់ពង្រាយប្រកបដោយប្រសិទ្ធភាព ធ្វើការចរចាយ៉ាងឆាប់ៗ និងធ្វើឱ្យប្រសើរឡើងនូវកិច្ចព្រមព្រៀងពាណិជ្ជកម្មសេរីរវាងវៀតណាម និងសម្ព័ន្ធសេដ្ឋកិច្ចអាស៊ី-អឺរ៉ុប។  ខិតខំប្រឹងប្រែងដើម្បីលុបបំបាត់ការលំបាក និងឧបសគ្គដែលបណ្តាលមកពីផលប៉ះពាល់មិនអំណោយផល នៃសេដ្ឋកិច្ចពិភពលោក ដើម្បីលើកកម្ពស់ពាណិជ្ជកម្ម និងការវិនិយោគទ្វេភាគី។ ភាគីទាំងពីរគាំទ្រការបន្តលើកកម្ពស់ប្រសិទ្ធភាពនៃគម្រោងសំខាន់ៗក្នុងវិស័យថាមពល ប្រេង និងឧស្ម័ន បង្កើតលក្ខខណ្ឌអំណោយផលសម្រាប់ធុរកិច្ចនៃប្រទេសទាំងពីរក្នុងការពង្រីកការវិនិយោគ និងប្រតិបត្តិការលើទឹកដីរបស់គ្នាទៅវិញទៅមក ស្របតាមច្បាប់របស់ប្រទេសទាំងពីរ និងច្បាប់អន្តរជាតិ។

ភាគីទាំងពីរមានបំណងជំរុញកិច្ចសហប្រតិបត្តិការ លើវិស័យការពារជាតិ និងសន្តិសុខ ឆ្លើយតបទៅនឹងបញ្ហាប្រឈមសន្តិសុខក្រៅប្រពៃណី ដោយ ឈរលើមូលដ្ឋានច្បាប់អន្តរជាតិ និងការអនុវត្តជាក់ស្តែង រួមចំណែកដល់សន្តិភាព និងសន្តិសុខក្នុងតំបន់ និងពិភពលោក។ វៀតណាម និងសហព័ន្ធរុស្ស៊ីបានឯកភាពបន្តបង្កើតលក្ខណៈងាយស្រួលសម្រាប់ប្រជាពល រដ្ឋរៀងៗខ្លួនក្នុងការរស់នៅ សិក្សា និងធ្វើការនៅប្រទេសនីមួយៗប្រកប ដោយស្ថិរភាព ធ្វើជាស្ពានតភ្ជាប់មិត្តភាពរវាងប្រទេសទាំងពីរ។

ទាក់ទងនឹងបញ្ហាក្នុងតំបន់ និងអន្តរជាតិ ភាគីទាំងពីរគាំទ្រការកសាងប្រព័ន្ធទំនាក់ទំនងអន្តរជាតិប្រកបដោយប្រជាធិបតេយ្យ យុត្តិធម៌ និងតម្លាភាព ដោយផ្អែកលើច្បាប់អន្តរជាតិ និងធម្មនុញ្ញអង្គការសហប្រជាជាតិ។

ទាក់ទិននឹងបញ្ហាសមុទ្រខាងកើត ភាគីទាំងពីរគាំទ្រការធានាសន្តិសុខ និងសុវត្ថិភាព សេរីភាពនៃការធ្វើនាវាចរណ៍ និងអាកាសចរណ៍ មិនប្រើប្រាស់ ឬគម្រាមកំហែងក្នុងការប្រើប្រាស់កម្លាំង ដោះស្រាយជម្លោះដោយសន្តិវិធី ស្របតាមធម្មនុញ្ញអង្គការសហប្រជាជាតិ និងច្បាប់អន្តរជាតិ ជាពិសេស អនុសញ្ញាអង្គការសហប្រជាជាតិស្តីពីច្បាប់សមុទ្រ ឆ្នាំ ១៩៨២ (UNCLOS ១៩៨២) គាំទ្រការអនុវត្តពេញលេញនៃ DOC (សេចក្តីថ្លែងការណ៍ស្តីពីការប្រតិបត្តិរបស់ភាគីនានានៅសមុទ្រខាងកើត) និងការចរចារដំណាក់កាលដំបូងឆ្ពោះទៅរក COC (ក្រមប្រតិបត្តិនៃភាគីនានានៅសមុទ្រខាងកើត) ដែលអនុវត្តជាក់ស្តែង មានប្រសិទ្ធភាព និងស្របតាមច្បាប់អន្តរជាតិ។

ក្នុងឱកាសនេះ ភាគីទាំងពីរបានអនុម័តលើសេចក្តីថ្លែងការណ៍រួមស្តីពីការធ្វើឲ្យស៊ីជម្រៅថែមទៀត ភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ៕