ឧបនាយករដ្ឋមន្ត្រី លោក ហ្វាម យ៉ាទូក បានទទួលជួបលោក Robert Maersk Uggla ប្រធានសារជីវកម្ម A.P. Moller Holding (APM Holding) និងជាប្រធានសារជីវកម្ម Maersk (សមាជិករបស់ APM Holding)។ រូបថត៖ VGP

នៅក្នុងជំនួប​នេះ លោក​ឧបនាយករដ្ឋមន្ត្រី ហ្វាម យ៉ាទូក បានសង្កត់ធ្ងន់ថា វិស័យ​ដែល Maersk កំពុងវិនិយោគ ដូចជាកំពង់ផែសមុទ្រ ឡូជីស្ទិក ការដឹកជញ្ជូន និងការផ្លាស់ប្តូរបៃតង ក៏ជាវិស័យដែល​វៀតណាម​ផ្តល់​អាទិភាពសម្រាប់ការអភិវឌ្ឍ​ផងដែរ។ ក្រៅពីគោលដៅក្លាយជាប្រទេសរីកចម្រើនពីសមុទ្រ វៀតណាម​​​ក៏ចាប់អារម្មណ៍ជាពិសេសក្នុងការអភិវឌ្ឍថាមពលវាយោអគ្គិសនីនៅឯនាយសមុទ្រ ឧស្សហកម្មសាងសង់កប៉ាល់ សេដ្ឋកិច្ចសមុទ្រ និងការជំរុញការផ្លាស់ប្តូរថាមពល។

ឧបនាយករដ្ឋមន្ត្រីមាន​បំណងចង់ឱ្យ​ Maersk អមដំណើរជាមួយ​វៀតណាម​ក្នុងដំណើរការផ្លាស់ប្តូរបៃតង ការអភិវឌ្ឍថាមពលស្អាត និងការកសាងខ្សែសង្វាក់ឡូជីស្ទិកប្រកបដោយចីរភាព។ ឧបនាយករដ្ឋមន្ត្រីបានស្នើឱ្យសាជីវកម្ម​ ពន្លឿនការអនុវត្តគម្រោងដែលមានស្រាប់ ពង្រីកការវិនិយោគ​នៅកំពង់ផែសមុទ្ររបស់វៀតណាម និងគាំទ្រវៀតណាមក្នុងការទាក់ទាញ​វិនិយោគិនអន្តរជាតិបន្ថែមទៀត។ លោក​ឧបនាយករដ្ឋមន្ត្រីបានសន្យាថា រដ្ឋាភិបាលនឹងបង្កើតលក្ខខណ្ឌអំណោយផលទាំងអស់សម្រាប់វិនិយោគិនមក​បណ្ដាក់​ទុន​​នៅវៀតណាម។

រីឯខ្លួន​វិញ លោក Robert Maersk Uggla បានសង្កត់ធ្ងន់ថា វៀតណាមគឺជាដៃគូសំខាន់មួយ​របស់សាជីវកម្ម ហើយបានបញ្ជាក់ថា អាទិភាពរបស់វៀតណាមក្នុងការផ្លាស់ប្តូរបៃតង ការជំរុញនវានុវត្តន៍ និងការបង្កើន​ការតភ្ជាប់ជាមួយខ្សែសង្វាក់ផ្គត់ផ្គង់​សកល គឺសម​ស្របនឹងទិសដៅយុទ្ធសាស្ត្រ ក៏ដូចជាការប្តេជ្ញាចិត្តវិនិយោគរយៈពេលវែង​របស់សាជីវកម្មនៅវៀតណាម៕​