កាសែតរូបភាពវៀតណាមជាភាសាខ្មែរ

ការស្វែងយល់

ពិសេសភាពស្ថាបត្យកម្មវត្ត ស្រឡូង

17/07/2025

ស្ថាបត្យកម្មវត្តស្រឡូង (ឃុំដាយតឹម (Dai Tam) , ស្រុក មីស្វៀន (My Xuyen), ខេត្ត សុកត្រាំង (Soc Trang))..
ស្ថាបត្យកម្មវត្តស្រឡូង (ឃុំដាយតឹម (Dai Tam) , ស្រុក មីស្វៀន (My Xuyen), ខេត្ត សុកត្រាំង (Soc Trang)) ត្រូវបានកសាងដោយចុះសម្រុងគ្នា ក្នុងសួនដើមឈើព្រឹទ្ធព្រឹក្ស ដោយមានការរួមផ្សំរវាងប្រពៃណី និងទំនើប។ តាមរយៈគំនិតច្នៃប្រតិដ្ឋ និងភាពប៉ិនប្រសប់របស់សិប្បករ បានបង្កើតឡើងនូវស្នាដៃស្ថាបត្យកម្មប្លែកពិសេសមួល ដែលមានអត្តសញ្ញាណនៃវត្តខ្មែរ ក្នុងតំបន់ណាមបូ។
ក្បាច់រចនាប្រណិត និងប្លែកៗនៅវត្តស្រឡូង។ រូបថត៖ថុងធៀន

វត្តស្រឡូង បានកសាងពីឆ្នាំ១៨១៥ ដំបូងឡើយ វត្តនេះបានកសាងពីឈើ និងស្លឹកយ៉ាងសាមញ្ញ។ ឆ្លងកាត់ពេលវេលា និងដោយសារគ្រាប់បែកកាំភ្លើង បានបំផ្លាញ វត្តត្រូវរងការខូចខាតយ៉ាងធ្ងន់ធ្ងរ។ នៅឆ្នាំ១៩៤៥ ដោយមានការគាំទ្រ និងការបរិច្ចាគពីប្រជាជន និងពុទ្ធបរិស័ទ ព្រះតេជគុណ តាំងយុច (Tang Duch) បានចាប់ផ្ដើមសាងសង់វត្តនេះឡើងវិញ។ លុះដល់ឆ្នាំ១៩៨៥ ព្រះតេជគុណ តាំងយុច (Tang Duch) ទទួលអនិច្ចធម្មទៅ ព្រះតេជគុណ ក្វាចមែន (Quach Men) ជាព្រះចៅអធិការ ហើយក៏បន្តការជួសជុលសាងសង់បន្ថែមនូវសំណង់មួយចំនួនទៀត ដើម្បីសម្រេចការកសាង ហើយបានសម្ពោធ នៅឆ្នាំ១៩៨៩។
ព្រះវិហារវត្តស្រឡូង។ រូបថត៖ ង្វៀនថាំង

តាមប្រជាជនក្នុងតំបន់បានឱ្យដឹងថា មូលហេតុដែលមានឈ្មោះថា វត្ត ចែនគៀវ (Chen Kieu តាមភាសា វៀតណាម) គឺដោយសារតាំងពីដំបូងមក ដោយឥទ្ធិពលនៃសង្គ្រាម វត្តទ្រុឌទ្រោមគ្មានថវិកាជួសជុល ហើយប្រជាជនបានបរិច្ចាគយកចានទាប ថូ ចានតូច ចានធំ ធ្វើពីប៉សឺឡែន មកជួសជុលវត្ត។ ចាប់ពីពេលនោះមក ប្រជាជនវៀតណាមក្នុងតំបន់បានហៅថា វត្ត ចែនគៀវ (Chen Kieu តាមភាសាវៀតណាម)) តរៀងមក។
ស្ថាបត្យកម្មវត្តស្រឡូង រួមមានខ្លោងទ្វារវត្ត ព្រះវិហារ, សាលាឆាន់, សាលាធម្មសភា, ព្រះវិហារ អគាររតនត្រ័យ, បណ្ណាល័យ, សមណកុដិ...ត្រូវបានរៀបចំយ៉ាងចុះសម្រុងគ្នា ក្នុងសួនដើមឈើព្រឹទ្ធព្រឹក្ស ដែលមានផ្ទៃដីជាង ២,១ហិកតា។

វត្តស្រឡូង មានលក្ខណៈពិសេសនៃវប្បធម៌ខ្មែរនៅតំបន់ណាមបូ។ ក្បាច់រចនាប្រណិត និងមានពណ៌ចម្រុះចុះសម្រុងគ្នា។ អ្វីដែលពិសេសបំផុតនោះ គឺជាងចម្លាក់ប៉ិនប្រសប់យ៉ាងខ្លាំង ក្នុងការបង្កើតរូបភាពនៃទេវតា ដើម្បីតុបតែងលម្អវត្ត។ ប្រាង្គខ្ពស់ៗ នៅលើដំបូល ក្បាច់រចនាលើក្បឿង ចម្លាក់លើជញ្ជាំងនិងសសរ។
ព្រះវិហារគឺជាអគារធំនិងរឹងមាំ មានសសរធំៗចំនួន ១៦ ជួរ។ ក្រាលឥដ្ឋផ្កា ហើយជញ្ជាំងភាគច្រើនក៏ត្រូវបានបិទដោយឥដ្ឋសេរ៉ាមិច (ចម្រុះពណ៌ និងទំហំផ្សេងៗគ្នា)។
ច្រកចូលទៅខាងក្នុងវត្តស្រឡូង។ រូបថត៖ឡេមិញ

ដំបូលនៃព្រះវិហារ ត្រូវបានសាងសង់ក្នុងទម្រង់បីជាន់ មានន័យថា បីផ្នត់ ផ្នត់ខាងក្រោមធំជាងគេ ហើយតូចទៅៗឡើងទៅលើ។ ផ្នត់ខាងលើមានរាងត្រីកោណ មានហោជាងនៅពីរសងខាងនៃទិសទាំងពីរ ដោយមានបិតជហ្វាកោងពើតឡើងទៅលើ នៅចំកណ្តាលមានកំពូលខ្ពស់ឡើងទៅលើ។
ជហ្វាទាំងពីរសង្ខាងកោង ដោយសម្គាល់ថា មានទំនាក់ទំនងជាមួយនឹងឋានអាទិទេព និងព្រលឹងមនុស្ស ដើម្បីប្រសិទ្ធពរ និងការពារពិភពកណ្តាលឱ្យបានសុខសាន្ត និងសុភមង្គល។ផ្ទៃខាងក្រោយនៃព្រះវិហារគឺជាជញ្ជាំងមានក្បាច់រចនា បិតអណ្ដែតដោយចាន ចានទាបប៉សឺឡែន ជាច្រើន។ ខាងក្នុងព្រះវិហារគឺជាអាសនៈគោរពបូជាព្រះពុទ្ធសក្យមុនី។ ពិតានខាងលើខាងក្នុងព្រះវិហារ ជាផ្ទាំងគំនូរពិពណ៌នាអំពីពុទ្ធប្រវត្តិ តាំងពីប្រសូតិ ត្រាសដឹង និងបរិនិព្វាន។
ពុទ្ធបរិស័ទគោរពបូជាក្នុងព្រះវិហារវត្តស្រឡូង។ រូបថត៖ ឡេមិញ
នៅកណ្តាលទីធ្លាវត្ត មានបង្គោលទង់មានរូបសំណាកព្រះនាគក្បាល៥។ ជុំវិញគឺអគារសម្រាប់សិក្សា និងសម្រាក។ ជាពិសេស នៅខាងក្រោយវត្តគឺជាសួនច្បារខ្នាតតូច ដែលជាកន្លែងពិពណ៌នាបង្ហាញពីពុទ្ធប្រវត្តិ ។វត្តស្រឡូងទាក់ទាញភ្ញៀវទេសចរយ៉ាងច្រើនកុះករ ជាពិសេសក្នុងអំឡុងពេលបុណ្យទាន និងបុណ្យតេត។ មិនត្រឹមតែបងប្អូនជនរួមជាតិខ្មែរប៉ុណ្ណោះ ប្រជាជនទូទាំងប្រទេសក៏បានមកទស្សនាវត្តស្រឡូង ដើម្បីធ្វើធម្មយាត្រា បួងសួងសុំសេចក្តីសុខ និងគយគន់សម្រស់ស្ថាបត្យកម្មវត្ត ក៏ដូចជាស្វែងយល់ពីវប្បធម៌ខ្មែរ ផងដែរ៕

អត្ថបទ៖ ថុងធៀន រូបថត៖ ង្វៀនថាំង ឡេមិញ ថុងធៀន ប្រែសម្រួលដោយង្វៀនយ៉ាង