ក្នុងនោះ លោកនាយករដ្ឋមន្ត្រីបានស្នើឱ្យក្តាប់ជាប់ស្ថានការណ៍ តម្រូវការស្បៀងអាហារ គ្រឿងឧបភោគបរិភោគ ទឹកប្រើប្រាស់ប្រចាំថ្ងៃ និងតម្រូវការផ្សេងៗរបស់ប្រជាពលរដ្ឋ; រៀបចំការផ្តល់ជំនួយស្បៀងអាហារ គ្រឿងឧបភោគបរិភោគ និងសម្ភារៈចាំបាច់ដល់ដៃប្រជាពលរដ្ឋដែលរងផលប៉ះពាល់ដោយភ្លៀង ជំនន់ទឹកភ្លៀង និងការបាក់ដីឱ្យបានលឿនបំផុតតាមដែលអាចធ្វើទៅបាន; កៀរគរកម្លាំង មធ្យោបាយ សម្ភារៈបរិក្ខារ និងរបស់របរចាំបាច់ តាមបាវចនា "ទាំង៤នៅនឹងកន្លែង" ដើម្បីជំនះពុះពារលើផលវិបាកឱ្យបានលឿនបំផុតតាមដែលអាចធ្វើទៅបាន។ ទន្ទឹមនឹងនោះ ជំនះពុះពារលើឧបទ្ទវហេតុ ស្ដារប្រព័ន្ធអគ្គិសនី និងទូរគមនាគមន៍ឡើងវិញជាបន្ទាន់ ដើម្បីធានាការផ្ដល់ព័ត៌មានឲ្យគ្រប់គ្រាន់ បន្តបន្ទាប់និងទាន់ពេលវេលា។

លោកនាយករដ្ឋមន្ត្រីក៏បានបញ្ជាឲ្យកៀរគរកម្លាំងយោធា នគរបាល កម្លាំងយុវជន ចូលរួមជួយឧបត្ថម្ភប្រជាពលរដ្ឋជាបន្ទាន់ក្នុងការងារជួសជុលផ្ទះ សំណង់ចរាចរណ៍ ធានាឱ្យចរាចរណ៍រលូន; ជួសជុលគ្រឹះស្ថានសុខាភិបាលដែលរងការខូចខាតដោយសារផលប៉ះពាល់នៃជំនន់ទឹកភ្លៀង និងការបាក់ដី ដើម្បីសង្គ្រោះព្យាបាលអ្នករបួសឲ្យបានទាន់ពេលវេលា និងថែទាំសុខភាពប្រជាពលរដ្ឋ; ជួសជុលសាលារៀន និងថ្នាក់រៀនដែលរងការខូចខាតដោយជំនន់ទឹកភ្លៀង និងការបាក់ដី ដោយមិនបណ្ដោយឲ្យប៉ះពាល់ដល់ការសិក្សារបស់សិស្សានុសិស្ស។

កាលពីថ្ងៃទី ២ ខែសីហា រដ្ឋាភិបាលបានសម្រេចផ្តល់ជំនួយចំនួន ២៥០ ពាន់លានដុង (ជាង ៩,៥ លានដុល្លារអាមេរិក) ពីទុនបំរុងថវិកាមជ្ឈិមឆ្នាំ២០២៥ សម្រាប់មូលដ្ឋានទាំង ៣ ខាងលើ ដើម្បីជំនះពុះពារលើផលវិបាក និងស្ដារលំនឹងជីវភាពរស់នៅរបស់ប្រជាជនក្រោយពីជំនន់ទឹកភ្លៀង៕