នាយករដ្ឋមន្ត្រីវៀតណាមលោក Pham Minh Chinh បានទទួលជួបលោកស្រី Katerina Konecna ប្រធានគណបក្សកុម្មុយនិស្តឆែក-ម៉ូរ៉ាវ៉ា។ (រូបថត៖ VOV)

លោកនាយករដ្ឋមន្ត្រី Pham Minh Chinh បានអះអាងថា ក្នុងគោលនយោបាយការបរទេសជារួម វៀតណាមគោរព និងមានបំណងចង់ពង្រឹងទំនាក់ទំនងមិត្តភាពជាប្រពៃណី និងកិច្ចសហប្រតិបត្តិការដ៏ល្អប្រសើរជាមួយសាធារណៈរដ្ឋឆែក គាំទ្រស្មារតីមហាសាមគ្គីភាពរបស់ប្រជាជននិងគណៈបក្សនានារបស់ឆែក រួមចំណែកដល់បរិយាកាសសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍក្នុងតំបន់ទាំងពីរ និងលើពិភពលោក។

លោកនាយករដ្ឋមន្ត្រីបានស្នើឱ្យបក្សកុម្មុយនិស្តឆែក-ម៉ូរ៉ាវ៉ា គាំទ្រអាជ្ញាធរគ្រប់ជាន់ថ្នាក់របស់ឆែក ក្នុងការបន្តបង្កើតលក្ខខណ្ឌអំណោយផលសម្រាប់សហគមន៍ជនវៀតណាមនៅសាធារណរដ្ឋឆែក រួមចំណែកយ៉ាងសកម្មថែមទៀតដល់សេដ្ឋកិច្ចសង្គមនៃប្រទេសសាមី និងបំពេញបានល្អនូវតួនាទី ជាស្ពានមិត្តភាពរវាងប្រជាជនវៀតណាម និងឆែក។ ជាពិសេស លោកនាយករដ្ឋមន្ត្រីបានស្នើថា ក្នុងនាមជាសមាជិកសភាអឺរ៉ុប លោកស្រី Katerina Konecna នឹងមានសំឡេង ដើម្បីឲ្យប្រទេសដែលនៅសេសសល់ក្នុងសហភាពអឺរ៉ុបអាចផ្តល់សច្ចាប័នលើកិច្ចព្រមព្រៀងការពារការវិនិយោគរវាងវៀតណាម និងសហភាពអឺរ៉ុប (EVIPA) ក្នុងពេលឆាប់ៗនេះ ព្រមទាំងដើម្បីឲ្យគណៈកម្មការអឺរ៉ុប (EC) ដកកាតលឿង IUU សម្រាប់ជលផលវៀតណាមផងដែរ។

រីឯខ្លួនវិញ ប្រធានគណៈបក្សកុម្មុយនិស្តឆែក-ម៉ូរ៉ាវ៉ា លោកស្រី Katerina Konecna បានសម្តែងនូវមនោសញ្ចេតនាដ៏ជ្រាលជ្រៅ និងការវាយតម្លៃដ៏ល្អប្រសើរចំពោះវៀតណាម ក៏ដូចជាទំនាក់ទំនងរវាងប្រទេសទាំងពីរ និងបក្សទាំងពីរ; បញ្ជាក់ពីការគាំទ្រគោលនយោបាយរបស់សាធារណរដ្ឋឆែកចំពោះវៀតណាម ហើយនឹងជំរុញយ៉ាងសកម្មទំនាក់ទំនងមិត្តភាព និងកិច្ចសហប្រតិបត្តិការរវាងបក្សកុម្មុយនិស្តវៀតណាម និងគណៈបក្សកុម្មុយនិស្តឆែក-ម៉ូរ៉ាវ៉ាឱ្យកាន់តែស្អិតរមួត រួមចំណែកពង្រឹងទំនាក់ទំនងរវាងប្រទេសទាំងពីរឱ្យកាន់តែស៊ីជម្រៅថែមទៀត និងអភិវឌ្ឍន៍ប្រកបដោយប្រសិទ្ធភាពលើគ្រប់វិស័យ។

លោកស្រី Katerina Konecna បានផ្ញើក្តីសាកសួរសុខទុក្ខ និងជូនពរចំពោះអគ្គលេខាបក្សកុម្មុយនិស្តវៀតណាមលោក To Lam ហើយបានឲ្យដឹងថា លោកស្រីនឹងរៀបចំដំណើរមកបំពេញទស្សនកិច្ចនៅវៀតណាមក្នុងពេលឆាប់ៗនេះ តបតាមការអញ្ជើញរបស់លោកអគ្គលេខាបក្ស។ ប្រធានបក្សកុម្មុយនិស្តឆែក-ម៉ូរ៉ាវ៉ា ក៏បានឯកភាពខ្ពស់ជាមួយនឹងយោបល់របស់លោកនាយករដ្ឋមន្ត្រី Pham Minh Chinh ដោយត្រៀមខ្លួនជាស្រេចជួយគាំទ្រវៀតណាមតាមគ្រប់មធ្យោបាយដែលអាចធ្វើទៅបាន រួមទាំងជំរុញការផ្តល់សច្ចាប័នលើកិច្ចព្រមព្រៀង EVIPA និងការដកកាតលឿង IUU សម្រាប់ជលផលវៀតណាមក្នុងពេលឆាប់ៗនេះ៕