ឆ្នេរសមុទ្រកែបទាក់ទាញភ្ញៀវទេសចរជាច្រើន។ (រូបថត៖ VOV Phnom Penh)

យោងតាមការស្ថិតិរបស់ក្រសួងទេសចរណ៍កម្ពុជា នៅឆ្នាំ២០២៣ ចំនួនភ្ញៀវទេសចរអន្តរជាតិមកកម្ពុជា សម្រេចបានជាង ៥,៤ លាននាក់ កើនឡើង ១៣៩,៥% បើធៀបនឹងឆ្នាំ២០២២។ វៀតណាមបន្តជាប្រទេសដែលមានចំនួន ភ្ញៀវមកកម្ពុជាច្រើនជាងគេទីពីរ (បន្ទាប់ពីប្រទេសថៃ) ដោយមានចំនួនភ្ញៀវទេសចរជាង ១លាននាក់។ លោក សយ ស៊ីណុល ប្រធានមន្ទីរទេសចរណ៍ខេត្តកំពត បានឲ្យដឹងថា ដើម្បីរួមចំណែកទាក់ទាញភ្ញៀវទេសចរមកកម្ពុជាកាន់តែច្រើនឡើងៗ រាជរដ្ឋាភិបាលបានអនុវត្តន៍នូវដំណោះស្រាយជាច្រើន រួមទាំងការទាក់ទាញភ្ញៀវទេសចរពីប្រទេសវៀតណាមតាមផ្លូវសមុទ្រ ដូចជា៖ ការត្រៀមរៀបចំបើកខ្សែផ្លូវទឹកអន្តរជាតិសម្រាប់ភ្ញៀវទេសចរ ដែលធ្វើដំណើររវាងកោះទន្សាយ (ខេត្តកែប) និងកោះ Phu Quoc របស់វៀតណាម ឬការកសាងកំពង់ផែសមុទ្រពហុបំណងក្នុងខេត្តកំពត។ ល។ 

ដោយមានទីតាំងភូមិសាស្រ្តអំណោយផល ដែលជាប្រទេសជិតខាងទាំងពីរ មានលក្ខណៈស្រដៀងគ្នាជាច្រើនខាងវប្បធម៌ ទំនៀមទម្លាប់ របៀបរស់នៅ ហើយប្រជាជននៃប្រទេសទាំងពីរមានទំនាក់ទំនងដ៏ល្អប្រសើរ ដូច្នេះហើយចំនួនភ្ញៀវទេសចរទ្វេភាគីរវាងវៀតណាមនិងកម្ពុជា បានកើនឡើងយ៉ាងឆាប់រហ័សនាពេលថ្មីៗនេះ។ ក្នុងចំណោមប្រទេសដែលមានភ្ញៀវទេសចរទៅកាន់កម្ពុជា វៀតណាមតែងតែស្ថិតនៅជួរមុខ។ ផ្ទុយទៅវិញ ភ្ញៀវទេសចរកម្ពុជាមក វៀតណាមក៏មានកំណើនជាវិជ្ជមានពីមួយឆ្នាំទៅមួយឆ្នាំផងដែរ (ក្នុងឆ្នាំ២០២២ ចំនួនភ្ញៀវទេសចរកម្ពុជាមកវៀតណាមមានចំនួន ១៤ម៉ឺននាក់ ហើយបានកើនឡើងដល់ជាង ៤០ម៉ឺននាក់ (២៨៥%) នៅឆ្នាំ២០២៣)។ អ្នកស្រី Nguyen Thi Thanh Thuy ភ្ញៀវទេសចរមកពីទីក្រុងហូជីមិញបានចែករំលែកថា៖

“ខ្ញុំចាប់អារម្មណ៍យ៉ាងខ្លាំងចំពោះម្ហូបអាហាររបស់កម្ពុជា ហើយទំនៀមទំលាប់វប្បធម៌ខាងវិញ្ញាណ នៅទីនេះក៏មានលក្ខណៈខុសគ្នាជាច្រើនបើធៀបនឹងវៀតណាមដែរ។ ជាឧទាហរណ៍ វត្តទាំងអស់គឺខុសពីវត្តវៀតណាមពីខាងក្រៅទៅខាងក្នុង។ ឆ្នេរសមុទ្រកម្ពុជាមិនមានមនុស្សច្រើនពេកដូចនៅវៀតណាមទេ ទឹកសមុទ្រថ្លា កន្លែងសម្រាកក៏ត្រជាក់ស្រួល... ជាទូទៅអ្វីៗគ្រប់យ៉ាងគឺស្រួលណាស់។ ការធ្វើដំណើរក៏មានភាពងាយស្រួល មិនពិបាកដែរ”។

ដោយវាយតម្លៃពីកិច្ចសហប្រតិបត្តិការទេសចរណ៍សមុទ្ររវាងវៀតណាមនិងកម្ពុជា លោក Jesse McCaul ទីប្រឹក្សាម្នាក់នៃគណៈកម្មាធិការជាតិសម្រាប់ការអភិវឌ្ឍនិងគ្រប់គ្រងឆ្នេរសមុទ្រកម្ពុជា បានសម្តែងនូវសុទិដ្ឋិនិយមចំពោះយថាទស្សន៍នៃការតភ្ជាប់ទេសចរណ៍សមុទ្ររវាងប្រទេសទាំងពីរ អាស្រ័យដោយទីតាំងភូមិសាស្ត្រជិតគ្នា និងការបំពេញបែបបទប្រកបដោយភាពងាយស្រួល ក្នុងនោះមានគម្រោងតភ្ជាប់សាឡាងដោយផ្ទាល់រវាងកោះ Phu Quoc របស់វៀតណាម និងខេត្តជាប់មាត់សមុទ្ររបស់កម្ពុជានាពេលខាងមុខ ដោយចំណាយពេលធ្វើដំណើរតែចន្លោះពី ២០-៣០ នាទីប៉ុណ្ណោះ។

“ប្រហែលជា មនុស្សជាច្រើនបានទៅទស្សនានៅទូទាំងប្រទេសវៀតណាម ហើយគេចង់សាកពិសោធន៍ប្រទេសជិតខាងដ៏រាក់ទាក់នោះគឺកម្ពុជា ដោយមានកោះ តំបន់ទីក្រុង មជ្ឈមណ្ឌលទិញទំនិញ រមណីយដ្ឋាន អាហារគ្រប់ប្រភេទ ហើយជាពិសេសប្រជាជនមានភាពរួសរាយរាក់ទាក់ណាស់។ ការធ្វើដំណើរទៅកាន់ខេត្តជិតខាង ក៏មានភាពងាយស្រួលផងដែរ។ សូម្បីទៅភ្នំពេញត្រូវចំណាយពេលតែ ២ ម៉ោងប៉ុណ្ណោះ”។

ក្នុងនាមជាមនុស្សដែលមានបទពិសោធន៍ធ្វើដំណើរទេសចរណ៍នៅទាំងប្រទេសវៀតណាម និងកម្ពុជា លោក Rafael និងអ្នកស្រី Lucy មកពីប្រទេសបារាំងបានចែករំលែកថា៖

“នេះជាលើកដំបូងដែលខ្ញុំមកកម្ពុជា។ ខ្ញុំពេញចិត្តណាស់ ប្រទេសដ៏ស្រស់ស្អាត មានវត្ត ប្រាសាទច្រើន សកម្មភាពទេសចរណ៍ក៏ច្រើនដែរ។ អារម្មណ៍ទូទៅរបស់ខ្ញុំក្នុងអំឡុងពេល ២ សប្ដាហ៍នៅទីនេះ គឺពេញចិត្តមែនទែន។ មនុស្សគ្រប់គ្នានៅទីនេះធ្វើឱ្យយើងមានអារម្មណ៍ដូចនៅផ្ទះអញ្ចឹង។ ខ្ញុំពិតជាចង់ទទួលបទពិសោធន៍ធ្វើដំណើរតាមកប៉ាល់។ ប្រាកដណាស់ថា ប្រសិនបើមានការតភ្ជាប់តាមផ្លូវសមុទ្ររវាងកម្ពុជា និងវៀតណាម ខ្ញុំនឹងត្រៀមខ្លួនជាស្រេចសាកល្បង”។

“នៅពេលយើងនិយាយអំពីប្រទេសអាស៊ីអាគ្នេយ៍មួយចំនួន ដូចជាប្រទេសថៃ ឡាវ កម្ពុជា និងវៀតណាម យើងនឹងឃើញអត្តសញ្ញាណដ៏លេចធ្លោដែលខុសប្លែកពីប្រទេសដទៃទៀត។ ពិតណាស់ថា មានភាពស្រដៀងគ្នាមួយចំនួនរវាងប្រទេសទាំងនេះ ប៉ុន្តែក៏មានភាពខុសគ្នាជាច្រើនផងដែរ ដើម្បីឲ្យយើងអាចស្វែងយល់ ជាពិសេសនៅក្នុងម្ហូប មនុស្ស របៀបរស់នៅ និងការប្រាស្រ័យទាក់ទងគ្នា។ ចំពោះការតភ្ជាប់តាមផ្លូវសមុទ្រ បើមាន វាពិតជាល្អណាស់ ដោយផ្តល់ជម្រើសជាច្រើនដល់ភ្ញៀវទេសចរ ពេលធ្វើដំណើរពីប្រទេសមួយទៅប្រទេសមួយទៀត”។

ដោយមានការយកចិត្តទុកដាក់និងជួយសម្រួលដល់ការអភិវឌ្ឍទេសចរណ៍ជាមួយនឹងគោលនយោបាយជាក់លាក់ដូចជា៖ ការកែលម្អគុណភាពសេវាកម្ម ការធ្វើពិពិធកម្មមធ្យោបាយដឹកជញ្ជូន បង្កើតលក្ខខណ្ឌងាយស្រួលដល់ការចេញចូលប្រទេសសម្រាប់ភ្ញៀវទេសចរ… ប្រាកដណាស់ថា ចំនួនភ្ញៀវទេសចរពីវៀតណាមមកកម្ពុជានឹងកាន់តែកើនឡើង។ តាមនោះ រួមចំណែកជួយកម្ពុជាឱ្យសម្រេចបាននូវគោលដៅទាក់ទាញភ្ញៀវទេសចរបរទេសចំនួន ៥,៦ លាននាក់នៅឆ្នាំនេះ និងឈានដល់កម្រិត ៧ លាននាក់នៅឆ្នាំ ២០២៥ លើសពីកម្រិត៦,៦ លាននាក់ដែលសម្រេចបានក្នុងឆ្នាំ ២០១៩ មុនពេលផ្ទុះជំងឺកូវីដ-១៩។