| ໃນຈຳນວນ 34 ຄົນທີ່ໄດ້ຮັບນາມມະຍົດເປັນ ສາດສະດາຈານເມື່ອປີ 2011, ອາຈານ ຫງວຽນກວາງ ຢ້ຽວ ເປັນຜູ້ທີ່ມີອາຍຸນ້ອຍກວ່າໝູ່, ລາວໄດ້ຮັບ ນາມມະຍົດເປັນ ສາດສະດາຈານຄະນິດສາດ ເມື່ອ ອາຍຸຫາກໍໄດ້ 37 ປີ ແລະ ກາຍເປັນ ສາດສະດາຈານ ຜູ້ທີ່ໜຸ່ມນ້ອຍ ທີ່ສຸດຢູ່ຫວຽດນາມ ໃນປະຈຸບັນ. |
|
ພິເສດເມື່ອປີ 2007, ອາຈານ ຫງວຽນກວາງຢ້ຽວ ກໍເປັນ ຮອງສາດສະດາຈານຜູ້ທີ່ໜຸ່ມນ້ອຍທີ່ສຸດຂອງຫວຽດນາມ. ທຸກຄົນອາດຈະຄິດວ່າ,ຜູ້ທີ່ເປັນສາດສະດາຈານຕ້ອງແມ່ນອາຈານ, ນັກວິທະຍາສາດທີ່ໜ້ານັບຖືດ້ວຍສີຜົມຫງອກ, ແຕ່ບໍ່ມີຈັກຄົນຮູ້ໄດ້ວ່ານາມມະຍົດທີ່ສູງສົ່ງດັ່ງກ່າວ ໄດ້ມອບໃຫ້ນັກວິທະຍາສາດຄົນໜຶ່ງທີ່ມີອາຍຸໜຸ່ມນ້ອຍຄືອາຈານ ຫງວຽນກວາງຢ້ຽວ. ສິ່ງດັ່ງກ່າວສະແດງໃຫ້ເຫັນຄວາມ ສາມາດກໍຄືການ ປະກອບສ່ວນແບບພິເສດຂອງລາວໃຫ້ແກ່ຂະແໜງວິທະຍາສາດຂອງປະເທດຊາດ.
ອາຈານ ຫງວຽນກວາງຢ້ຽວ ເກີດມາຢູ່ໃນຄອບຄົວໜຶ່ງທີ່ມີມູນເຊື້ອໃນການຄົ້ນຄວ້າວິທະຍາສາດ, ພໍ່ລາວເປັນສາດສະດາຈານຄະນິດສາດຂອງ ມະຫາວິທະຍາໄລສ້າງຄູ ຮ່າໂນ້ຍ, ສະນັ້ນ ລາວຈຶ່ງມີເງື່ອນໄຂເພື່ອສຳຜັດ ກັບຄະນິດສາດຕັ້ງແຕ່ຍາມນ້ອຍ, ແຕ່ລາວເລີ່ມລົງມື ຄົ້ນຄວ້າ ຄະນິດສາດຂັ້ນສູງໃນຊຸມປີສຸດທ້າຍຢູ່ຂະແໜງຄະນິດສາດ-ກົນຈັກ-ຄອມພິວເຕີຂອງມະຫາວິທະຍາໄລສັງລວມຮ່າໂນ້ຍ (ປະຈຸບັນແມ່ນ ມະຫາວິທະຍາໄລວິທະຍາສາດ, ມະຫາວິທະຍາໄລແຫ່ງຊາດ ຮ່າໂນ້ຍ). ຫຼັງຈາກນັ້ນ ໂຊກດີ ທີ່ລາວຖືກສົ່ງໄປ ຝຣັ່ງ ເພື່ອຂຽນບົດ ວິທະຍາ ນິພົນປະລິນຍາເອກຂະແໜງຄະນິດສາດທີ່ມະຫາວິທະຍາໄລ Toulouse 3 (ຝຣັ່ງ) ພາຍໃຕ້ການແນະນຳຂອງ ສຈ. ໂດ໋ດຶກຖາຍ (ມະຫາວິທະຍາໄລສ້າງຄູ ຮ່າໂນ້ຍ) ແລະ ສຈ. Pascal Thomas (ມະຫາວິທະຍາໄລ Toulouse 3).
ເດືອນມິຖຸນາ 2000, ອາຈານ ຫງວຽນກວາງຢ້ຽວ ສຳເລັດການປ້ອງກັນບົດວິທະຍານິພົນປະລິນຍາເອກຂະແໜງຄະນິດສາດ. ຖັດມາ, ເດືອນພະຈິກ 2006, ກໍຢູ່ມະຫາວິທະຍາໄລ Toulouse 3, ລາວສຳເລັດ ການປ້ອງກັນໃບປະກາດສະນີຍະບັດ Habilitation Diriger des Recherches, ເປັນໃບປະກາດຊະນິດໜຶ່ງຂອງລະດັບການສຶກສາຂັ້ນມະຫາວິທະຍາໄລທີ່ ຝຣັ່ງ ໄດ້ຖືເປັນມາດຕະຖານ ເພື່ອແຕ່ງຕັ້ງສາດສະດາຈານ, ຮັບຜິດຊອບນັກຄົ້ນຄວ້າກຸ່ມໜຶ່ງ, ແນະນຳ ຫຼື ຂຽນບົດຕີລາຄາຄຸນນະພາບຂອງບົດວິທະຍານິພົມປະລິນຍາເອກ. ທ້າຍປີ 2007, ລາວກັບຄືນປະເທດ ແລະ ໄດ້ຮັບການແຕ່ງຕັ້ງເປັນຮອງສາດສະດາຈານຂອງມະຫາວິທະຍາໄລສ້າງຄູ ຮ່າໂນ້ຍ. ແຕ່ເດືອນກັນຍາ 2007 ຫາເດືອນສິງຫາ 2009, ລາວຖືກເຊີນເປັນຜູ້ຮ່ວມງານດ້ານວິທະຍາສາດຢູ່ມະຫາວິທະຍາໄລແຫ່ງຊາດ ເຊອູນ ແລະ ມະຫາວິທະຍາໄລແຫ່ງຊາດຈຸງນາມ (ສ.ເກົາຫຼີ). ຢູ່ທີ່ນີ້ ລາວໄດ້ເອົາໃຈໃສ່ໃນການຄົ້ນຄວ້າ “ທິດສະດີຕົວຊີ້ບອກ ແລະ ແກ້ສົມຜົນ d ລວງຂວາງ ກັບການຕີລາຄາ”. ນີ້ເປັນຂົງເຂດທີ່ຍັງໃໝ່ຢູ່ຫວຽດນາມ ແລະ ລາວໄດ້ຮັບຖືວ່າເປັນຜູ້ທຳອິດທີ່ໄດ້ຮັບຜົນສຳເລັດໃນການ ຄົ້ນຄວ້າໃນຂົງເຂດດັ່ງກ່າວ. ໃນວິວັດການຄົ້ນຄວ້າ, ລາວຍັງມີບົດຂຽນ ວິທະຍາສາດ 35 ບົດ, ໃນນັ້ນ ມີ 4 ບົດໄດ້ລົງຢູ່ໃນ ບັນດາ ວາລະສານແຫ່ງຊາດ ແລະ 30 ບົດໄດ້ລົງຢູ່ໃນບັນດາວາລະສານວິທະຍາສາດແຖວໜ້າຂອງໂລກ ໃນຄໍລຳ SCI ແລະ SCIE. ນີ້ໄດ້ຮັບຖືວ່າເປັນຜົນງານທີ່ສ້າງສັນຍາລັກພິເສດໃຫ້ແກ່ຊຸດສຳເນົາສະເໜີເປັນສາດສະດາຈານຂອງລາວຕໍ່ສະພາກຳນົດນາມ ສາດສະດາຈານ ແຫ່ງລັດ. ສິ່ງທີ່ໜ້າຈັບໃຈແມ່ນທັງສອງເທື່ອໄດ້ຮັບນາມມະຍົດຮອງສາດສະດາຈານ ແລະ ສາດສະດາຈານ, ລາວກໍບໍ່ມາເຂົ້າຮ່ວມຍ້ອນກຳລັງຄາວຽກ ຢູ່ຕ່າງປະເທດ. ມື້ທີ່ໄດ້ຮັບນາມມະຍົດເປັນສາດສະດາຈານ, ລາວກໍກຳລັງໄປເຮັດວຽກຢູ່ສະຖາບັນຄົ້ນຄວ້າຄະນິດສາດ Max-Planck (ເຢຍລະມັນ) ສະນັ້ນ ຈຶ່ງບໍ່ທັນກັບມາເຂົ້າຮ່ວມ.
ສຈ. ຫງວຽນກວາງຢ້ຽວ ໃຫ້ຮູ້ວ່າ ລາວໂຊກດີຫຼາຍ ທີ່ໄດ້ຮັບການຊ່ວຍເຫຼືອຈາກອາຈານ ໂດ໋ດຶກຖາຍ ແລະ ຫງວຽນແທງເວີນ ໃນການສຳຜັດ ແລະ ຮູ້ຈັກກັບ ຄະນິດສາດສະໄໝປະຈຸບັນ. ພິເສດ, ສຈ. Pascal Thomas ຢູ່ມະຫາວິທະຍາໄລ Toulouse 3 ແນະນຳລາວ ຂຽນບົດວິທະຍານິພົນປະລິນຍາເອກ ຂະແໜງຄະນິດສາດຢູ່ ຝຣັ່ງ ຢ່າງສຸດອົກສຸດໃຈ, ເພິ່ນຍັງສອນໃຫ້ລາວຮູ້ວິທີແກ້ເລກທີ່ດີ, ແບບ ທັນສະໄໝ, ນັ້ນຄືຕັ້ງຄຳຖາມນ້ອຍໆ ຕໍ່ບັນຫາໜຶ່ງ ທີ່ໃຫຍ່ ແລະ ຮູ້ເຮັດໃຫ້ສິ່ງທີ່ສັບສົນກາຍເປັນ ສິ່ງທີ່ງ່າຍດາຍ ແລະ ລະອຽດ, ສິ່ງດັ່ງກ່າວ ແມ່ນລາວ ນຳໃຊ້ຢ່າງມີປະສິດພິຜົນໃນເວລາສອນນັກຮຽນຂອງຕົນຢູ່ມະຫາວິທະຍາໄລຫຼາຍແຫ່ງ. ສຳລັບ ສຈ. ຫງວຽນກວາງຢ້ຽວ, ຜູ້ທີ່ຮຽນເລກຕ້ອງ “ຢາກຊອກຮູ້ຊອກເຫັນ” ແລະ ສະສົມຄວາມຮູ້ໃຫ້ຕົນເອງເພື່ອເອົາມາໃຊ້ໃນເວລາທີ່ຕ້ອງການ. ອາດຈະແມ່ນອາໄສ ສິ່ງດັ່ງກ່າວນັ້ນ, ໃນຄັ້ງທີ່ທຳການຄົ້ນຄວ້າກັບສາດສະດາຈານຍີ່ປຸ່ນຄົນໜຶ່ງ, ລາວໄດ້ນຳໃຊ້ບົດຮຽນເກົ່າເພື່ອແກ້ບັນດາບົດເລກຍາກ, ໃນເວລານັ້ນ ສາດສະດາຈານຄົນນັ້ນ ກະວົນກະວາຍຍ້ອນບໍ່ຮູ້ຕ້ອງແກ້ຄືແນວໃດ.
ປະຈຸບັນ, ສຈ. ຫງວຽນກວາງຢ້ຽວ ເປັນຮອງຫົວໜ້າ ວິຊາທິດສະດີຕຳລາ, ຂະແໜງຄະນິດສາດ-ຄອມພິວເຕີ, ມະຫາວິທະຍາໄລສ້າງຄູ ຮ່າໂນ້ຍ. ດ້ວຍຄວາມສາມາດ, ການເຮັດວຽກຢ່າງສຸດອົກສຸດໃຈຂອງຕົນ, ສຈ. ຫງວຽນກວາງຢ້ຽວ ໝັ້ນໝາຍຈະສືບຕໍ່ປະກອບສ່ວນໃຫ້ແກ່ ຂະແໜງຄະນິດສາດຫວຽດນາມ, ເປັນຕົ້ນແມ່ນໃນເວລານາຍົກລັດຖະມົນຕີແຫ່ງ ສສ. ຫວຽດນາມ ຮັບຮອງໃຫ້ຂະແໜງຄະນິດສາດຫວຽດນາມ ເປັນແຜນການພັດທະນາສຳຄັນຂອງປະເທດຊາດ.
ບົດ: ຖາວວີ - ພາບ: ຫວຽດເກື່ອງ
|
