ປອ ລືວວັນອານ, ຮອງຜູ້ອຳນວຍການສະຖາບັນໂຄສະນາຂ່າວສານ ແລະ ສື່ມວນຊົນ ກ່າວຄຳເຫັນທີ່ພິທີ
ພິທີສະເໜີຕົວສະມາຄົມມິດຕະພາບ ຫວຽດນາມ - ລາວ ສາຂາຢູ່ສະຖາບັນໂຄສະນາຂ່າວສານ ແລະ ສື່ມວນຊົນ ຈັດຕັ້ງໃນຕອນເຊົ້າວັນທີ 20/4, ຢູ່ຮ່າໂນ້ຍ, ໂດຍສະມາຄົມມິດຕະພາບ ຫວຽດນາມ - ລາວ ນະຄອນຫຼວງ ຮ່າໂນ້ຍ ສົມທົບກັບສະຖາບັນໂຄສະນາຂ່າວສານ ແລະ ສື່ມວນຊົນຈັດຕັ້ງ. ກ່າວຄຳເຫັນທີ່ພິທີ, ທ່ານຮອງສາດສະດາຈານ, ປອ ລືວວັນອານ, ຮອງຜູ້ອຳນວຍການສະຖາບັນໂຄສະນາຂ່າວສານ ແລະ ສື່ມວນຊົນ, ໃຫ້ຮູ້ວ່າ:“ໃນມູນເຊື້ອແຫ່ງການພັດທະນາຂອງສະຖານບັນໂຄສະນາຂ່າວສານ ແລະ ສື່ມວນຊົນ ໃນຕະຫຼອດ 20 ປີຜ່ານມາ, ແຕ່ລະປີ, ສະຖາບັນລ້ວນແຕ່ໄດ້ຮັບນັກສຶກສາ, ນັກສຳມະນາກອນ ແລະ ນັກຄົ້ນຄ້ວາຈາກ ສປປ ລາວ. ສະຖາບັນມີຄວາມເອກອ້າງທະນົງໃຈວ່າໃນຊຸມປີຜ່ານມາໄດ້ປະກອບສ່ວນບຳລຸງສ້າງນັກຮຽນ, ນັກສຶກສາ, ນັກສຳມະນາກອນລຸ້ນຕ່າງໆທີ່ມີຄຸນນະພາບສູງໃຫ້ແກ່ລາວ. ເມື່ອໄດ້ຮັບຂໍ້ຕົກລົງສ້າງຕັ້ງສະມາຄົມ ຫວຽດນາມ - ລາວ, ສາຂາຢູ່ສະຖາບັນ, ພວກຂ້າພະເຈົ້າຖືວ່າ ນີ້ແມ່ນກາລະໂອກາດໃໝ່ເພື່ອໃຫ້ພວກຂ້າພະເຈົ້າປະຕິບັດສຳເລັດພາລະໜ້າທີ່ ເພື່ອສືບຕໍ່ປະກອບສ່ວນເພີ່ມພຸນຄຸນສ້າງນ້ຳໃຈມິດຕະພາບ ຫວຽດນາມ - ລາວ.”
ການນຳສະມາຄົມສາຂາຢູ່ສະຖາບັນສະຖາບັນໂຄສະນາຂ່າວສານ ແລະ ສື່ມວນຊົນ ຮັບດອກໄມ້ອວຍພອນ
ເລື່ອງສະມາຄົມມິດຕະພາບ ຫວຽດນາມ - ລາວ ນະຄອນ ຮ່າໂນ້ຍ ຮັບຮູ້ ແລະ ມອບໃບຢັ້ງຢືນສ້າງຕັ້ງສະມາຄົມ ຫວຽດນາມ -ລາວ ສາຂາຢູ່ສະຖາບັນໂຄສະນາຂ່າວສານ ແລະ ສື່ມວນຊົນ ໄດ້ສະແດງຄວາມເອົາໃຈໃສ່ຂອງການນຳ 2 ປະເທດຕໍ່ວຽກງານບຳລຸງສ້າງພະນັກງານສື່ມວນຊົນ, ສື່ສານ ໃຫ້ແກ່ ສປປ ລາວ. ປອ ເກີ່ນວຽດແອງ, ຮອງປະທານຜູ້ປະຈຳການສະຫະພັນບັນດາອົງການມິດຕະພາບນະຄອນຫຼວງ ຮ່າໂນ້ຍ, ເນັ້ນໜັກວ່າ:“ສະມາຄົມມິດຕະພາບ ຫວຽດນາມ - ລາວ ສາຂາຢູ່ສະຖາບັນ ຈະຊ່ວຍໃຫ້ນັກສຶກສາ 2 ປະເທດມີເງື່ອນໄຂພົວພັນແລກປ່ຽນ, ເຂົ້າອົກເຂົ້າໃຈເຊິ່ງກັນ ແລະ ກັນ ແລະ ເຂົ້າຮ່ວມບັນດາການເຄື່ອນໄຫວຂອງສະມາຄົມມິດຕະພາບ ຫວຽດນາມ - ລາວ ນະຄອນຫຼວງ ຮ່າໂນ້ຍ. ຂ້າພະເຈົ້າເຊື່ອໝັ້ນວ່າ ສະມາຄົມຈະມີບັນດາການເຄື່ອນໄຫວແທດຈິງ ປະກອບສ່ວນເພີ່ມທະວີນ້ຳໃຈມິດຕະພາບ ຫວຽດນາມ - ລາວ ເຂົ້າໃນຜົນງານລວມຂອງສະມາຄົມມິດຕະພາບ ຫວຽດນາມ - ລາວ ນະຄອນຫຼວງ ຮ່າໂນ້ຍ.”
(ແຫຼ່ງຄັດຈາກ VOV)
