ດ້ວຍແນວຄວາມຄິດປະດິດສ້າງຂອງຕົນ, ເຈົ້າຂອງຮ້ານກາເຟ ເຕື້ອງໄດ້ສ້າງໃຫ້ຮ້ານຂອງຕົນມີບັນຍາກາດເປັນເອກະລັກເໝືອນດັ່ງສະຖານທີ່ພັກຜ່ອນຢ່ອນກາຍແຫ່ງໜຶ່ງສໍາລັບແຂກພາຍຫຼັງອາທິດໜຶ່ງ ເຮັດວຽກຢ່າງເຄັ່ງຕຶງ. ດ້ວຍສານທີ່ສວຍງາມ ແລະ ນໍາໃຊ້ວັດຖຸທີ່ຜ່ານການໃຊ້ງານແລ້ວ ເພື່ອເປັນການປະຢັດ ໃຫ້ແກ່ຕົນເອງ ແລະ ກ່ໍເພື່ອຮັກສາ ສິ່ງແວດລ້ອມ, ຮ້ານກາ ເຟ ເຕື້ອງ ປາດຖະໜາສ້າງຄວາມປະທັບໃຈ, ດຶງດູດຄວາມສົນໃຈຂອງທຸກຄົນ ຈາກສິ່ງທີ່ເປັນທໍາມະດາສາມັນຊົນທີ່ສຸດ. ໂດຍຜ່ານສິ່ງດັ່ງກ່າວ, ເຕື້ອງຍັງສະແດງອອກໃຫ້ເຫັນເຖິງ ກະແສຄວາມນິຍົມຂອງການອອກແບບໃໝ່, ຄົ້ນຫາສິ່ງໃໝ່ໆທີ່ ເປັນປະໂຫຍດຈາກ ສິ່ງຂອງເຄື່ອງໃຊ້ທີ່ຄິດວ່າ ໄຮ້ຄຸນຄ່າແລ້ວ. ແບບວິ ທີການປະດັບປະດາຂອງຮ້ານ ກາເຟ ເຕື້ອງກ່ໍມີການປ່ຽນແປງເລື້ອຍໆ ຕາມແຕ່ລະຫົວຂໍ້, ຕາມຮູບກ້ອນພື້ນຖານຕ່າງໆຄື: ຮູບ 4 ສີ່ແຈ, ຮູບຈະຕຸລັດ, ຮູບວົງມົນ…

ໂດຍຊ່ອນຕົວຢູ່ໃນຮ່ອມນ້ອຍໆທີ່ສະຫງົບງຽບຂອງຖະໜົນ ແທ່ັງທ້າຍ, ເມືອງ 10 , ສິ່ງທີ່ແນມເຫັນທໍາອິດຂອງ ຮ້ານນີ້ ແມ່ນ ທາງໜ້າຮ້ານເຮັດດ້ວຍຮົ້ວໄມ້, ປ້າຍຊື່ຮ້ານເຮັດດ້ວຍເສັ້ນເຊືອກແບບລຽບງ່າຍແຕ່ປະທັບໃຈທີ່ສຸດ. ຈາກຈຸດທີ່ເປັນໜ້າປະທັບໃຈໃນເບື້ອງຕົ້ນນັ້ນມັນໄດ້ສ້າງໃຫ້ມີທໍາເລສະເພາະຕາມວິທີການ ສະເພາະຂອງເຕື້ອງ, ດັ່ງທີ່ເຈົ້າຂອງຮ້ານໄດ້ ເຜີຍອອກມາວ່າ, ສິ່ງຕ່າງໆທີ່ລຽບງ່າຍ, ເປັນທໍາມະດາສາມັນຊົນນີ້ ມັນງ່າຍໃນການເຕືອນສະຕິໃຫ້ພວກເຮົາຄິດເຖິງກັນ, ມີການເຄົາລົບ ຈິງໃຈຕໍ່ກັນໃນຊີວິດປະຈໍາວັນ. ນີ້ກໍ່ແມ່ນສິ່ງໜຶ່ງທີ່ຮ້ານກາເຟເຕື້ອງຕ້ອງການຢາກມອບແດ່ລູກຄ້າຂອງຕົນ.

ໝາກນ້ຳເຕົ້າແຫ້ງຫລາຍໜ່ວຍແຂວນໂຕ່ງເຕ່ງຢ່ັງຢາຍຢູ່ເທິງຫົວໂດຍບໍ່ຕາມກົດເກນໃດໆ ກໍ່ຍິ່ງສືບຕໍ່ເຮັດໃຫ້ແຂກປະທັບໃຈຫລາຍເມື່ອກ້າວບາດຢ່າງເຂົ້າໃນຮ້ານ. ພາຍໃນຮ້ານ, ຕໍ່ໜ້າແຂກເວລານີ້ແມ່ນການຈັດວາງ ສັບຊ້ອນຢ່າງເໝາະສົມໂຕະຕັ່ງໄມ້ທີ່ເກົ່າແກ່, ທີ່ໃດໜຶ່ງມີຍອຍໃບໄມ້ແຫ້ງເຫລືອງຢ່ອນລົງມາ… ຢູ່ພາຍໃນຮ້ານທີ່ແສນອົບອຸ່ນ ປະກອບມີຊັ້ນລຸ່ມ ແລະ ຊັ້ນເຄິ່ງກາງ ເຈົ້າຂອງຮ້ານໄດ້ນໍາໃຊ້ ໜັງສືພິມເກົ່າເພື່ອປະດັບປະດາຝາ ຫ້ອງ ຫຼື ໃຊ້ກະແຕະໄມ້ເພື່ອຂັ້ນຫ້ອງເປັນແຕ່ລະລອກ; ລົດຖີບ ເກົ່າ, ໂຖດອກໄມ້, ຮູບປັ້ນຕ່າງໆທີ່ເຕັມໄປດ້ວຍຮ່ອງຮອຍຂອງ ການເວລາ ກໍ່ຖືກ ນຳມາຕົບແຕ່ງພາຍໃນຮ້ານ. ສະເພາະເທິງເພດານ ກໍ່ຍັງສົ່ງແສງສະຫວ່າງລົງມາດ້ວຍມັງຊົງຊຶ່ງເປັນໂຄມໄຟທີ່ເຄີຍໃຊ້ແຕ່ສະໄໝກ່ອນພຸ້ນ… ທັງໝົດສິ່ງເຫລົ່ານີ້ຍິ່ງເຮັດໃຫ້ບັນຍາກາດງຽບສະຫງົບ ແລະ ຄິດເຖິງອະດີດຕະການ, ພາໃຫ້ແຂກງ່າຍຕໍ່ການເປັນສ່ວນຕົວຫລາຍຂຶ້ນ. ນອກນັ້ນ, ເຕື້ອງ  ຍັງມີຕູ້ແກ້ວໜ່ວຍໜຶ່ງໄດ້ວາງສະແດງກ້ອງຖ່າຍຮູບປະເພດ ຕ່າງໆ ທີ່ເຈົ້າຂອງຮ້ານສະສົມມາໄດ້; ຈັກດີດພິມເກົ່າແກ່ແຕ່ສະໄໝກ່ອນ; ພາບແຕ້ມໂດຍນັກສຶກສາວິຈິດສິນແຕ້ມແຕ່ງໃນຂະ ນະທີ່ເຂົາເຈົ້ານັ່ງກິນກາເຟ ຢູ່ຮ້ານ ພ້ອມດ້ວຍປຶ້ມສໍ, ຮູບແຕ້ມ ອອກແບບສະຖາປັດຕະຍະກຳທີ່ລູກຄ້າ ສາມາດສຶກສາທາບ ທາມກັບທີ່…

ເກືອບວ່າທັງໝົດລູກຄ້າໄວໜຸ່ມທີ່ມາຮ້ານແຫ່ງນີ້ ລ້ວນແຕ່ຈະແນມເຫັນຂັ້ນໄດໄມ້ ທີ່ກ່າຍຂຶ້ນຫ້ອງຊັ້ນເຄິ່ງກາງຂອງຮ້ານທີ່ມີປ່ອງຢ້ຽມ ສາມາດແນມລົງມາຫາຊັ້ນລຸ່ມ ຊຶ່ງເປັນຈຸດເນັ້ນຂອງພາຍໃນຮ້ານແຫ່ງນີ້. ສິ່ງດັ່ງກ່າວຊ່ວຍເຮັດໃຫ້ການເປັນສ່ວນຕົວຂອງລູກຄ້າບໍ່ຖືກປ່ຽວພອຍ. ຄຽງຄູ່ກັນນັ້ັ້ນ, ເຕື້ອງຍັງເຮັດໃຫ້ຄົນຮູ້ຈັກ ຍ້ອນມີສັນຍາລັກພິເສດຈາກ Paint wall ຫລື ຝາຜະໜັງ ຈົ່ງໄວ້ ເພື່ອໃຫ້ລູກຄ້າໄດ້ສະແດງບຸກຄະລິກສ່ວນຕົວອອກຢ່າງເສລີ ແລະ ແຕ້ມແຕ່ງລົງຕາມໃຈມັກ. ນັ້ນອາດຈະເປັນຄຳອວຍ ພອນວັນເກີດ, ພາບແຕ້ມໄວ້ເປັນອະນຸສອນ, ສັນຍະລັກໃດໜຶ່ງ ຫຼື ຄຳຂວັນຂອງກຸ່ມຄົນ, ແບ່ງປັນປະສົບການຊີວິດ, ຮູບແຕ້ມ ບັນທຶກຄວາມຮູ້ສຶກເກີດຂຶ້ນໃນຊົ່ວພິບຕາ ແລະ ອື່ນໆ. ແນ່ນອນ, ເຕື້ອງຈະຕ້ອງກຽມພ້ອມຢ່າງຄົບຖ້ວນ ຝອຍແຕ້ມ ແລະ ສີປະເພດຕ່າງໆ ຕາມຄວາມນິຍົມໃຊ້ຂອງລູກຄ້າຕົນ.

ສຳລັບລູກຄ້າສ່ວນຫຼາຍ, ນອກຈາກຈຸດປະສົງ ຢາກມີມູມໜຶ່ງທີ່ ງຽບໆ ເພື່ອພັກຜ່ອນຢ່ອນກາຍແລ້ວ, ຮ້ານກາເຟເຕື້ອງຍັງ ຊ່ວຍ ໃຫ້ເຂົາເຈົ້າສາມາດຄົ້ນຫາ, ສຳຜັດກັບບັນຍາກາດ ແຫ່ງການປະ ດິດຄິດສ້າງທີ່ໄດ້ຈັດສັນຢ່າງເປັນເອກະລັກ, ປະທັບໃຈ. ທຸກວັນ ສຸກຂອງແຕ່ລະທິດ, ຮ້ານກາເຟເຕື້ອງເປັນຈຸດນັດໝາຍຂອງ ການພົບປະສົນທະນາກັນ ສະເພາະຫົວຂໍ້ກ່ຽວກັບສະຖາປັດຕະ ຍະກຳ ແນໃສ່ສ້າງບັນຍາກາດແລກປ່ຽນຄໍາຄິດເຫັນຢ່າງສະໜິດ ສະໜົມລະຫວ່າງນັກສຶກສາ ແລະ ບັນດານັກສະຖາປານິກ ຫຼື ບໍລິສັດສະຖາປັດຕະຍະກຳ; ຫລືບາງຄໍ່າຄືນກໍ່ມີການເສບສະແດງດົນຕີສົດໆພາຍໃຕ້ຫົວຂໍ້ຕ່າງໆທີ່ເຫັນວ່າເໝາະສົມກັບຄວາມນິຍົມຂອງໄວໜຸ່ມ.
 

ບົດ: ຫງວຽນຫວູ້ແທ່ັງດາດ - ພາບ: ເລມິນ