28/12/2014 22:29 GMT+7 Email Print Like 0

GMS 5 - ທ່ານນາຍົກລັດຖະມົນຕີປະເທດຫວຽດນາມ ຮຽນຮ້ອງ ປົກປັກຮັກສາ ແຫຼ່ງນ້ຳ ຂອງແມ່ນ້ຳຂອງ

ວັນທີ 20 ທັນາ 2014, ທີ່ນະຄອນຫຼວງບາງກອກ ແຫ່ງປະເທດ ໄທ ໄດ້ມີການດຳເນີນໄປ ກອງປະຊຸມສຸດຍອດ ຮ່ວມມື ເຂດອະນຸພາກພື້ນແມ່ນ້ຳຂອງເປີດກວ້າງ ຄັ້ງທີ 5 (GMS 5) ໂດຍມີການເຂົ້າຮ່ວມ ຂອງບັນດາທ່ານ ນາຍົກລັດຖະມົນຕີ ປະເທດ ຕ່າງໆຄື: ຫວຽດນາມ, ລາວ, ກຳປູເຈຍ, ໄທ, ຈີນ; ທ່ານ ປະທານາທິບໍດີ ປະເທດ ມຽນມາ ແລະ ທ່ານປະທານ ທະນາຄານພັດທະນາ ອາຊີ.
 
ກ່າວປາໄສທີ່ກອງປະຊຸດ, ທ່ານນາຍົກລັດຖະມົນຕີ ຫງວຽນເຕິນຢຸງ ເນັ້ນໜັກວ່າ, ການເຄື່ອນເໜັງ ຢ່າງໄວວາ ຂອງເສດຖະກິດພາກພື້ນ ແລະ ໂລກ, ບັນດາສິ່ງທ້າທາຍເກີດຂຶ້ນໃໝ່ ແລະ ບົດຮຽນກ່ຽວກັບການພັດທະນາເສດຖະກິດ ຂອງບັນດາປະເທດສະມາຊິກ ໃນໄລຍະຜ່ານມາ ຮຽກຮ້ອງຕ້ອງມີ ວິທີສຳຜັດໃໝ່, ຮອບດ້ານ ແລະ ໄຫວພິບກວ່າ ໃຫ້ແກ່ ການຮ່ວມມື GMS.

ທ່ານນາຍົກລັດຖະມົນຕີ ຫງວຽນເຕິນຢຸງ ກໍຢືນຢັນວ່າ, ການຮ່ວມມື GMS ຫຼັງຈາກສອງທົດສະວັດຜ່ານມາ ບັນລຸ ໄດ້ໝາກຜົນຫຼາຍຢ່າງ ທີ່ ເປັນໜ້າຮອງຮັບ, ປະກອບສ່ວນຊຸກຍູ້ ພັດທະນາເສດຖະກິດ-ສັງຄົມ ຢູ່ບັນດາປະເທດສະມາຊິກ ກໍຄື ໃນຄວາມມານະພະຍາຍາມ ລົບລ້າງ ຄວາມອຶດຫີວ, ຫຼຸດຜ່ອນຄວາມທຸກຍາກ ແລະ ຍົກຄຸນນະພາບຊີວິດການເປັນຢູ່ຂອງປະຊາຊົນໃຫ້ດີຂຶ້ນ.

ທ່ານນາຍົກລັດຖະມົນຕີ ໄດ້ອ້າງຫຼັກຖານ ທີ່ຫວຽດນາມໄດ້ປະຕິບັດ ຫຼາຍໂຄງການ ພັດທະນາພື້ນຖານໂຄງລ່າງທີ່ສຳຄັນ ຢ່າງສຳເລັດຜົນຄື ໂຄງການເສັ້ນທາງດ່ວນ ຮ່າໂນ້ຍ-ລາວກາຍ ທີ່ຂຶ້ນກັບແລວເສດຖະກິດ ເໜືອ-ໃຕ້, ໂຄງການແລວ ແຄມທະເລທາງທິດໃຕ້ ເຊື່ອມຕໍ່ ລະຫວ່າງ ແຂວງ ກ່າເມົາ-ກຽນຢາງ ແລະ ເຄືຍຂ່າຍເສັ້ນທາງ ແລະ ຂົວແຫ່ງຕ່າງໆ ຊຶ່ງເຊື່ອມຕໍ່ການຄົມມະນາຄົມ ຢູ່ເຂດທົ່ງພຽງແມ່ນ້ຳຂອງ. 
 

ບັນດາທ່ານຫົວໜ້າຄະນະຖ່າຍຮູບຮ່ວມກັນ ທີ່ພິທີໄຂ ກອງປະຊຸມສຸດຍອດ ຮ່ວມມືເຂດອະນຸພາກພື້ນເປີດກວ້າງ
ຄັ້ງທີ 5 (GMS 5). ພາບ: ດຶກຕ໋າມ/VNA


ພາບໃນພິທີໄຂກອງປະຊຸມ. ພາບ: ດຶກຕ໋າມ/VNA

ທ່ານນາຍົກລັດຖະມົນຕີ ຫງວຽນເຕິນຢຸງ ກ່າວປາໄສ ທີ່ກອງປະຊຸມ. ພາບ: ດຶກຕ໋າມ/VNA

ວາລະປະຊຸມວົງແຄບ ທີ່ GMS 5. ພາບ: ດຶກຕ໋າມ/VNA
ໃນຂະບວນວິວັດແຫ່ງການພັດທະນາ, ເຂດອະນຸພາກພື້ນແມ່ນ້ຳຂອງ ພວມຖືກປະເຊີນໜ້າ ກັບສິ່ງທ້າທາຍໃຫຍ່ໆຫຼາຍຢ່າງ ທີ່ກ່ຽວພັນເຖິງ ສິ່ງແວດລ້ອມ, ການຄ້ຳປະກັນ ດ້ານສະບຽງອາຫານ, ແຫຼ່ງນ້ຳ, ພະລັງງານ; ການປ່ຽນແປງຂອງດິນຟ້າອາກາດ ແລະ ໄພທຳມະຊາດ. ເລື່ອງຍອມຮັບຢ່າງກົງໄປກົງມາ ແລະ ຈິງຈັງ ບັນດາສິ່ງທ້າທາຍດັ່ງກ່າວ ຈະຊ່ວຍໃຫ້ພວກເຮົາຊອກໄດ້ວິທີແກ້ໄຂຢ່າງເໝາະສົມ.

ຕາມທ່ານນາຍົກລັດຖະມົນຕີ, ໃນໄລຍະຈະມາເຖິງ, GMS ຕ້ອງ ຊຸກຍູ້ບັນດາລາຍການ/ໂຄງການ ວ່າດ້ວຍສິ່ງແວດລ້ອມ ແລະ ພັດທະນາ ມະນຸດ ເພື່ອເໝາະສົມກັບການເຄື່ອນໄຫວ ໃນບັນດາຂົງເຂດເສດຖະກິດ; ທີສອງແມ່ນ ຖືສຳຄັນ ການຊ່ວຍໜູນບັນດາປະເທດສະມາຊິກ ຫັນໄປສູ່ ຕົວແບບ ຈະເລີນເຕີບໂຕຂຽວ ແລະ ຟື້ນຟູການຮ່ວມມື ແລະ ແບ່ງປັນບົດຮຽນ ລະຫວ່າງບັນດາປະເທດ ໃນວຽກງານຄຸ້ມຄອງແຫຼ່ງນ້ຳ ຢູ່ຕົວເມືອງ, ຊົນນະບົດ ແລະ ນ້ຳປະປາ.

ພ້ອມກັບຄະນະກຳມາທິການແມ່ນ້ຳຂອງ (MRC), ການຮ່ວມມື GMS-ກົນໄກໜຶ່ງດຽວໃນປັດຈຸບັນ ມີການເຂົ້າຮ່ວມຂອງໝົດທຸກປະເທດ ຢູ່ ແຄມຝັ່ງແມ່ນ້ຳຂອງ ສາມາດຖືບົດບາດສຳຄັນ ໃນການຊ່ວຍໜູນບັນດາປະເທດສະມາຊິກ ຍົກສູງກຳລັງຄວາມສາມາດ ແລະ ປະສານສົມທົບ ນຳກັນ ໃນການຄຸ້ມຄອງ ແລະ ນຳໃຊ້ແຫຼ່ງນ້ຳ ແມ່ນ້ຳຂອງຢ່າງໝັ້ນຄົງຖາວອນ.

ທ່ານນາຍົກລັດຖະມົນຕີ ກໍໃຫ້ວ່າ, ຄວາມຈິງໃຈ ແລະ ຊື່ສັດ ໃນການຮ່ວມມື ລະຫວ່າງບັນດາປະເທດສະມາຊິກ ແມ່ນສິ່ງທີ່ບໍ່ອາດຂາດໄປໄດ້ ເພື່ອສ້າງ ນ້ຳໃຈປະຊາຄົມ GMS ແລະ ກໍ່ສ້າງການພົວພັນຢ່າງໝັ້ນຄົງຍາວນານ. ດ້ວຍເຫດນັ້ນ, GMS ຕ້ອງເພີ່ມທະວີ ການໂອ້ລົມ ສົນທະນາ ຢ່າງມີເນື້ອແທ້ ລະຫວ່າງບັນດາສະມາຊິກ ນັບທັງກ່ຽວກັບກາລະໂອກາດ ກໍຄືສິ່ງທ້າຍທາຍ, ທັງຈຸດຄ້າຍຄືກັນ ກໍຄືຄວາມແຕກຕ່າງ ເພື່ອຊ່ວຍຍົກສູງປະສິດທິຜົນການຮ່ວມມື ໃນໄລຍະຈະມາເຖິງ. 
 

ທ່ານນາຍົກລັດຖະມົນຕີ ຫງວຽນເຕິນຢຸງ ພົບປະກັບທ່ານ ນາຍົກລັດຖະມົນຕີໄທ ປຣາຢຸດ ຈັນໂອຈາ
ຢູ່ນອກກອງປະຊຸມ. ພາບ: ດຶກຕ໋າມ/VNA


ທ່ານນາຍົກລັດຖະມົນຕີ ຕ້ອນຮັບການເຂົ້າຢ້ຽມຄຳນັບ ຂອງ ທ່ານ ປີຍັດວັດຕິ ອຳລານນັນ,
ປະທານກຸ່ມບໍລິສັດ ນ້ຳມັນອາຍແກັສໄທ PTT. ພາບ: ດຶກຕ໋າມ/VNA


ທ່ານນາຍົກລັດຖະມົນຕີ ຕ້ອນຮັບການເຂົ້າຢ້ຽມຄຳນັບ ຂອງທ່ານ ປະຈົບ ໄຊຍະສານ,
ປະທານສະມາຄົມ ມິດຕະພາບ ໄທ-ຫວຽດນາມ. ພາບ: ດຶກຕ໋າມ/VNA


ທ່ານນາຍົກລັດຖະມົນຕີ ກັບພໍ່ແມ່ປະຊາຊົນ ຊາວຫວຽດນາມ ອາໄສຢູ່ໄທ ແລະ ພະນັກງານ ລັດຖະກອນ
 ຂອງສະຖານທູດ ຫວຽດນາມປະຈຳໄທ. ພາບ: ດຶກຕ໋າມ/VNA
 
ໃນສະຖານະການ ຄວາມ ຕ້ອງການພັດທະນານັບມື້ນັບສູງ, ຄວາມຮຽກຮ້ອງກ່ຽວກກັບແຫຼ່ງກຳລັງແຮງ ແລະ ເຕັກໂນໂລຢີນັບມື້ນັບສູງ, ທ່ານ ນາຍົກລັດຖະມົນຕີ ໄດ້ສະເໜີ ບັນດາປະເທດ ອະນຸພາກພື້ນ ຕ້ອງກໍ່ຮ່າງສ້າງຕົວ ກົນໄກຮ່ວມມືເປີດ ເພື່ອຍາດແຍ່ງທ່າແຮງ ຂອງບັນດາ ຄູ່ ຮ່ວມມືພັດທະນາ ແລະ ລະດົມແຫຼ່ງກຳລັງຄວາມສາມາດຕື່ມອີກ ໃຫ້ແກ່ບັນດາໂຄງການ GMS.

ເນັ້ນໜັກສາຍແມ່ນ້ຳຂອງ ແມ່ນການພົວພັນອັນສະໜິດແໜ້ນລະຫວ່າງ ໝົດທຸກສະມາຊິກ GMS ດ້ວຍກັນ, ທ່ານນາຍົກລັດຖະມົນຕີ ຫງວຽນເຕິນຢຸງ ໄດ້ຮຽກຮ້ອງທຸກໆປະເທດທີ່ມີການກ່ຽວພັນ ພ້ອມກັນມີຄວາມຮັບຜິດຊອບ ຄຸ້ມຄອງ, ນຳໃຊ້ແຫຼ່ງນ້ຳໃຫ້ໝັ້ນຄົງຖາວອນ ແລະ ອະນຸລັກຮັກສາ ບັນດາຄຸນຄ່າອັນດີງາມ, ຕິດພັນກັບແມ່ນ້ຳສາຍນີ້, ເພື່ອໃຫ້ສາຍແມ່ນ້ຳຂອງ ຍາມໃດກໍ່ເປັນສາຍເຊື່ອມຕໍ່ ແຫ່ງຄວາມໄມຕີຈິດ ມິດຕະພາບ, ການຮ່ວມມື ລະຫວ່າງປະຊາຊົນ ແລະ ບັນດາປະເທດຢູ່ແຄມແມ່ນ້ຳຂອງ ຢ່າງແໜ້ນແຟ້ນ.

ປະຕິບັດ: VNA/VNP
ບັນດາບົດທີ່ຖືກນຳສະເໜີ