20/03/2015 00:01 GMT+7 Email Print Like 0

ເສັ້ນລ້ອນ ຂອງບ້ານຊໍ

ຜະລິດຕະພັນເສັ້ນລ້ອນຂອງບ້ານຊໍ, ຂຶ້ນກັບຕາແສງ ກົງຮ່ວາ, ເມືອງ ກວກອວາຍ, ຮ່າໂນ້ຍ ທີ່ຜະລິດຈາກແປ້ງມັນສະຄູຂາວ 100% ແຕ່ໃດໆມາແມ່ນໄດ້ມີຊື່ສຽງໂດ່ງດັງວ່າເປັນເສັ້ນລ້ອນ ທີ່ຫອມແຊບ ແລະ ອ່ອນນວນ. ປະຈຸບັນທົ່ວຕາແສງ ກົງຮ່ວາ ມີ 100 ກວ່າຄອບຄົວ ທຳການຜະລິດເສັ້ນລ້ອນດ້ວຍກຳລັງການຜະລິດໃນມື້ໜຶ່ງປະມານ 3 ໂຕນຕໍ່ຄອບຄົວ ເພື່ອສະໜອງເສັ້ນລ້ອນໃຫ້ບັນດາແຂວງ ແລະ ນະຄອນໃນທົ່ວປະເທດ. 
ຊາວ​ຕາ​ແສງ ກົງ​ຮ່ວາ ບໍ່​ມີ​ຜູ້​ໃດ​ຈື່​ໄດ້​ຢ່າງ​ຊັດ​ເຈນວ່າ ອາຊີບ​ຜະລິດ​ເສັ້ນ​ລ້ອນ ​ປະກົດ​ຂຶ້ນ​ຢູ່​ໃນ​ບ້ານ​ນີ້ຕັ້ງ​ແຕ່​ປານ​ໃດ, ພຽງ​ແຕ່​ຮູ້​ວ່າ ນີ້​ແມ່ນ​ອາຊີບທີ່​ເປັນ​ມູນ​ມໍລະດົກ​ຕົກ​ທອດ​ທີ່​ບັນ​ພະ​ບຸລຸດ​ປະ​ໄວ້​​ໃຫ້. ຊາວບ້ານໃຫ້​ຮູ້​ວ່າ ຊື່​ເສັ້ນ​ລ້ອນບ້ານ ຊໍ ຕິດ​ພັນ​ກັບ​ສາລາ​ບ້ານ ຊໍ, ​ເປັນ​ສາລາ​ຫຼັງ​ໜຶ່ງ​ທີ່​ສວຍ​ງາມ, ​ມີ​ຊື່ສຽງ​ໂດ​ງດັ່ງ ຖືກ​ຂະໜານ​ນາມ​ວ່າ “ເປັນທີ​ໜຶ່ງ​ຂອງ​​ເຂດ​ດ່ວາຍ​ໃນ​ສະ​ໄໝ​ກ່ອນ”.

ພວກ​ຂ້າພະ​ເຈົ້າ​ມາ​ຢ້ຽມຢາມ​ບ້ານ ຊໍ ພໍດີຖືກກັບ​ລະດູ​ການຜະລິດ​ເສັ້ນ​ລ້ອນ​ເພື່ອຮັບ​ໃຊ້​ບຸນປີ​ໃໝ່​ປະຈ​​ຳຊາດ. ສະ​ນັ້ນ, ຈຶ່ງ​ໄດ້​ເຫັນ​ກັບ​ຕາ​ບັນຍາກາດ​ການ​ເຮັດ​ວຽກ​ທີ່​ຄຶກຄັກ​ຂອງ​ຜູ້​ຜະລິດ​ເສັ້ນ​ລ້ອນຢູ່​ທີ່​ນີ້ ດ້ວຍ​ການ​ຜະລິດ​ທີ່​ຜ່ານຫຼາຍ​ຂັ້ນ​ຕອນ​ແຕກ​ຕ່າງ​ກັນ, ນັບ​ແຕ່​ການຜະລິດ​ແປ້ງ, ຜະລິດ​ເສັ້ນ​, ຕາກ​ເສັ້ນລ້ອນ ​ແລະ ອື່ນໆ.  ການ​ອອກ​ແຮງ​ງານ​ຂອງ​ຊາວບ້ານຊໍ​ ໃນ​​ແຕ່​ລະ​ມື້​ແມ່ນເລີ່​ມ​ແຕ່​ເຊົ້າຕູ່, ປົກກະ​ຕິ​​​ເລີ່​ມ ແຕ່ 5 ​ໂມງ​ເຊົ້​າ ​ແລະ ສິ້ນ​ສຸດ​ໃນ​ເວລາ 7 ​ໂມງ​ຄໍ່າ. ​ແຕ່​ເຊົ້າໆ ທຸກ​ເຕົາ​​ຜະລິດ​ເສັ້ນ​ລ້ອນລ້ວນ​ແຕ່ຮຸ່ງ​ຂຶ້ນ​ພ້ອມໆ ​ກັນ, ຕໍ່​ຈາກ​ນັ້ນ​ແມ່ນ​ສຽງ​ຈັກ​ບົດ​ແປ້ງ, ຈັກ​ລ້າງ​ເສັ້ນ​ລ້ອນ​​ເລີ່​ມດັງ​ວໍ​ໆ, ຄຶກຄັກໆ ​ເປັນ​ຍັນ​ຍານ​ບົ່ງ​ບອກ ວັນ​ໃໝ່ວຽກ​ງານ​ຂອງ​ຊາວ​ບ້ານຊໍ​ຜະລິດ​ເສັ້ນ​ລ້ອນ​ເລີ່​ມ​ຂຶ້ນແລ້ວ.

ດ້ວຍ​ປະລິມານ​ແປ້ງ​​ແຕ່ 4 ຫາ 5 ​ໂຕນ​ຕໍ່​ວັນ​ ​ໃນ​ໄລຍະ​ໃກ້​ບຸນປີ​ໃໝ່​ປະຈ​ຳຊາດ, ​ເອື້ອຍ ຫງວຽນ​ທິຮ່າ, ​ເຈົ້າ​ຂອງ​​ໂຮງ​ຜະລິດ​ເສັ້ນ​ລ້ອນ ຮ່າ​ຕ້ຽນ (​ຄຸ້ມດິ່ງ, ບ້ານ 5, ຕາ​ແສງ ກົງ​ຮ່ວາ) ​ຈໍາ​ເປັນ​ຕ້ອງເລີ່​ມ​ການ​ເຮັດ​ວຽກ​ໃນ​ວັນ​ໜຶ່ງຂອງ​ຕົນ​​ ​​ເລີ່​ມແຕ່ 3 ​ໂມງ​ເຊົ້າ.

 

ອາຊີບ​ຜະລິດ​ເສັ້ນ​ລ້ອນຢູ່​ບ້ານ ຊໍ ​​ໄດ້​ສືບ​ທອດຈາກ​ບັນດາ​​ເຊ່ັນ​ຄົນ​ໃນ​ບ້ານ. 

ຊາວບ້ານ ຊໍ ຕາກ​ເສັ້ນ​ລ້ອນ ​​ໃນ​ເດີ່ນ​ສາລາ​ບ້ານ.

ເສັ້ນ​ລ້ອນຂອງ​ບ້ານ ຊໍ ​ໄດ້​ຖອກ​ເປັນ​ປ່ຽງ​ບາງ, ຫຼັງ​ຈາກ​ນັ້ນ ຈະ​ຕັດ​ເປັນ​ເສັ້ນ ​ແລະ ​ເອົາ​ໄປ​ຕາກ​ແດດ.

ບໍ່​ນຳ​ໃຊ້​ວິທີ​ການ​ອົບ​​ແຫ້ງ​ດ້ວຍ​ຄວາມ​ຮ້ອນ, ​ເສັ້ນ​ລ້ອນ ບ້ານ ຊໍ ​ໄດ້​ຕາກ​ແຫ້ງ​ດ້ວຍ​​​ແສງ​ແດດ ​ແລະ ລົມ​ທຳ​ມະ​ຊາດ.

ເກັບ​ເສັ້ນ​ລ້ອນສຳ​ເລັດ​ຮູບ ຫຼັງ​ຈາກ​ທີ່​ໄດ້​ຕາກ​​ແຫ້ງ​ດ້ວຍ​ແສງ​ແດດ ​ແລະ ລົມ​ທຳ​ມະ​ຊາດ.

  
ທ່ີບ້ານ ຊໍ ມີ​​ໂຮງ​ຜະລິດ​ເສັ້ນ​ລ້ອນປະມານ 70-80 ​ແຫ່ງ, ​
ແຕ່ລະ​ແຫ່ງ​ສາມາດ​ສ້າງ​ວຽກ​ເຮັດ​ງານ​ທຳ​ໃຫ້​​ແກ່ແຮງ​ງານ​ໃນພື້ນ​ທີ່​ແຕ່ 7-8 ຄົນ.


ຕາມ​ເອື້ອຍ ຫງວຽນ​ທິຮ່າ, ​ສາຍເຫດ ລູກ​ຄ້າ​ມັກ​ນິຍົມ ຊື້​ເສັ້ນ​ລ້ອນຂອງ​ບ້ານ ຊໍ
ຍ້ອນ​ເສັ້ນ​ລ້ອນຢູ່​ທີ່​ນີ້ ໄດ້​ຮັບ​ການ ຜະລິດ​ຕາມ​ແບບ​ມູນ​ເຊື້ອ.


ຫຸ້ມ​ຫໍ່​ເສັ້ນ​ລ້ອນສຳ​ເລັດ​ຮູບຢູ່​ທີ່​ພື້ນຖານ​ຜະລິດ​ເສັ້ນ​ລ້ອນ​ແຫ່ງ​ໜຶ່ງ.

ເອື້ອຍ ຮ່າ​ ໄດ້​​ໄຂ​ຄວາມ​ໃນ​ໃຈ​ກັບ​ພວກ​ຂ້າພະ​ເຈົ້າ​ວ່າ, ​​ເລີ່​ມ​ແຕ່​ມື້​​ໄດ້​ສືບທອດ​ອາຊີບ​ຜະລິດ​ເສັ້ນ​ລ້ອນ​ຈາກ​ປູ່ຍ່າ​ຕາ​ຍາຍ ປະ​ໄວ້​ໃຫ້ມາ​ເຖິງ​ປະຈຸ​ບັນ, ປະລິມານ​ຜະລິດ​ພັນ​ເສັ້ນ​ລ້ອນ ທີ່​ຂາຍ​ອອກ​ຂອງ​ຄອບຄົວ​​ ແມ່ນນັບ​ມື້​ນັບ​ເພີ່ມ​ສູງ​ຂຶ້ນ​.  ຫວນຄືນ​ກ່ອນ​ນີ້ 10 ກວ່າປີ​, ຄອບຄົວ​ເອື້ອຍ ຮ່າ ​​ຜະລິດ ​ແລະ ຈຳໜ່າຍ​ເສັ້ນ​ລ້ອນ​ໄດ້ ພຽງ 2 ຫາ 3 ຮ້ອຍ​ກິ​ໂລກຣາມ ຕໍ່​ມື້​ເທົ່າ​ນັ້ນ, ​ແຕ່​ມາ​​ເຖິງ​ປະຈຸ​ບັນ, ຈຳ​ນວນ​ເສັ້ນ​ລ້ອນທີ່​ຜະ​ລິດ​ໄດ້ປະມານ 4 ​ໂຕນ​ຕໍ່​ມື້. ຜະລິດ​ເທົ່າ​ໃດ​ຈໍາໜ່າຍ​ໝົດ​ເທົ່າ​ນັ້ນ. ​ຍິ່ງ​ກວ່າ​ນັ້ນ, ໃນ​ໄລຍະ​ບຸນປີ​ໃໝ່ປະຈຳ​ຊາດ, ​ເສັ້ນ​ລ້ອນສໍາ​ເລັດ​ຮູບຂອງ​ຄອບຄົວ​ລາວ ບໍ່ພໍ​ເພື່ອ​ສະໜອງ​ອອກ​ສູ່​ຕະຫຼາດ​. 

ປະຈຸ​ບັນ, ​ເຕັກ​ໂນ​ໂລ​ຢີອົບ​ແຫ້ງ​ໄດ້​ຮັບ​ການ​ນິຍົມ​ຊົມໃຊ້ ຢ່າງ​ແພ່​ຫຼາຍ​ໃນ​ໝູ່​ບ້ານອາຊີບ​ຕ່າງໆ, ​ແຕ່​ສຳລັບ​ເສັ້​ນ ລ້ອນບ້ານ ຊໍ ​ແມ່ນຍັງ​ຮັກສາ​ວິທີ​ການ​​ເຮັດ​ແຫ້ງ​ແບບ​ດັ້ງ​ເດີມ​ທີ່ເປັນມູນ​ເຊື້ອຄື​ເກົ່າ​ຄື​ຕາກ​ແດດ​ຕາກ​ລົມ​ທຳ​ມະ​ຊາດ. ​ເພາະ​ສະ​ນັ້ນ, ​​ຕາມ​ຄັນ​ຄູ​ແມ່​ນ້ຳ​ໄດ້ໄປ​ຜ່ານ​ບ້ານ ຊໍ, ທຸກ​ຮ່ອມ​ທຸກຊອຍຂອງ​ບ້ານ​ລ້ວນ​ແຕ່​ຈະ​​ພົບ​ເຫັນ​ບັນດາ​ຮ້ານ​ຕາກ​ເສັ້ນ​ລ້ອນ ​ເຕັມ​ໄປ​ໝົດ. 

ເຫດຜົນ​ທີ່ ຊາວບ້ານ ຊໍ ບໍ່​ນຳ​ໃຊ້​ເຕັກ​ໂນ​ໂລ​ຢີ​ເພື່ອອົບ​ແຫ້ງ​ເສັ້ນ​ລ້ອນ, ​ແຕ່ຫາກ​​ເລືອກ​ເອົາ​ວິທີ​ການ​​ອົບ​ແຫ້ງ​ແບບ​ທຳ​ມະ​ຊາດ ກໍ່​ຍ້ອນວ່າ​ນີ້​ແມ່ນ​ເຂັດ​ລັບໜຶ່ງ​ ທີ່​ຊ່ວຍ​ເຮັດ​ໃຫ້​ເສັ້ນ​ລ້ອນຂອງ​ບ້ານ ຊໍ ມີ​ຄວາມ​ໜຽວ ​ແລະ ຫອມ​ແຊບ​ກວ່າ ລ້ອນບ່ອນ​ອື່ນ. ​ເອື້​ອຍ ຫງວຽນ​ທິຮ່າ ​ໃຫ້​ຮູ້​ວ່າ: “ການ​ອົບ​ແຫ້ງ​ແບບ​ນີ້ ລ້ວນ​ແຕ່​ຂຶ້ນ​ກັບ​ທຳ​ມະ​ຊາດ. ສະ​ນັ້ນ, ພວກ​ຂ້າ​ພະ​ເຈົ້າ​ຕ້ອງ​ຕິດຕາມ​ຂ່າວ​ພະຍາກອນ​ອາກາດ​ເປັນ​​ເວລາ 24/24 ຊົ່ວ​ໂມ​ງ”.
ບົດ: ວີ​ຖາວ - ພາບ: ຫວຽດ​ເກື່ອງ
ບັນດາບົດທີ່ຖືກນຳສະເໜີ