31/12/2014 07:47 GMT+7 Email Print Like 0

ອາເປັກ 22: ຫວຽດນາມເພີ່ມທະວີການຮ່ວມສຳພັນ

ດ້ວຍຖານະເປັນແຂກຮັບເຊີນພິເສດ, ທ່ານປະທານປະເທດ ເຈືອງເຕິນຊາງ ໄດ້ມີການໂອ້ລົມສົນທະນາ ຢ່າງໜ້າສົນໃຈ ກ່ຽວກັບຫົວເລື່ອງ “ເພີ່ມທະວີ ການຮ່ວມສຳພັນຢູ່ໃນພາກພື້ນ: ບັນດາການບຸລິມະສິດ ວ່າດ້ວຍການ ລົງທຶນ, ພື້ນຖານໂຄງລ່າງ ແລະ ນະໂຍບາຍ” ກັບຜູ້ຕາງໜ້າຂອງ ກວ່າ 1.500 ກຸ່ມບໍລິສັດ ແຖວໜ້າ ຂອງພາກພື້ນ ທີ່ກອງປະຊຸມສຸດຍອດ ວິສາຫະກິດ ອາເປັກ 2014(APEC-2014) ຊຶ່ງໄດ້ຮັບການດຳເນີນໄປ ທີ່ ນະຄອນຫຼວງ ປັກກິ່ງ ແຫ່ງປະເທດຈີນ ໃນຫວ່າງມໍ່ໆນີ້.
 
ກອງປະຊຸມສຸດຍອດວິສາຫະກິດ ອາເປັກ ເປັນເຫດການ ສຳຄັນ ທີ່ສຸດ ຂອງປະຊາຄົມວິສາຫະກິດ ອາຊີ-ປາຊີຟິກ ແລະ ໄດ້ຮັບການ ຈັດຕັ້ງເປັນປະຈຳປີ ໃນສັບປະດາຂັ້ນສູງ ອາເປັກ, ແນໃສ່ ສ້າງ ໂອກາດໃຫ້ແກ່ ບັນດາວິສາຫະກິດ ໄດ້ພົບປະ, ແລກປ່ຽນນຳກັນ ໂດຍກົງ ກໍຄືຍົກຂໍ້ສະເໜີຂຶ້ນຕໍ່ ບັນດາທ່ານຜູ້ນຳຂັ້ນສູງ ອາເປັກ.

ທີ່ນະຄອນຫຼວງປັກກິ່ງຄັ້ງນີ້, ກອງປະຊຸມ ໄດ້ດຶງດູດການເຂົ້າຮ່ວມ ຂອງຜູ້ນຳອາເປັກຫຼາຍທ່ານ ພ້ອມດ້ວຍ ຜູ້ຕາງໜ້າ ຂອງກວ່າ 1.500 ກຸ່ມບໍລິສັດແຖວໜ້າ ຂອງພາກພື້ນ ອາຊີ-ປາຊີຟິກ. 
 

ທ່ານປະທານປະເທດ ເຈືອງເຕິນຊາງ ໄດ້ມີການເຂົ້າຮ່ວມ ແລະ ກ່າວປາໄສ ທີ່ກອງປະຊຸມສຸດຍອດ ວິສາຫະກິດ ອາເປັກ 2014 ທີ່ ປັກກິ່ງ(ຈີນ) ດ້ວຍຖານະເປັນແຂກຮັບເຊີນພິເສດ. ພາບ: ຫງວຽນຄາງ/VNA

ກອງປະຊຸມໄດ້ດຶງດູດຄວາມສົນໃຈຂອງຜູ້ນຳ ອາເປັກ ຫຼາຍທ່ານ ພ້ອມກັບຜູ້ຕາງໜ້າຂອງ ກວ່າ 1.500 ກຸ່ມບໍລິສັດແຖວໜ້າ
ຂອງ ພາກພື້ນອາຊີ-ປາຊີຟິກ. ພາບ: ຫງວຽນຄາງ/VNA


ທ່ານປະທານປະເທດ ເຈືອງເຕິນຊາງ ພົບປະກັບບັນດາກຸ່ມບໍລິສັດ ຂອງອາເມລິກາ
ຢູ່ນອກກອງປະຊຸມ ອາເປັກ 22. ພາບ: ຫງວຽນຄາງ/VNA
ກ່າວປາໄສທີ່ກອງປະຊຸມ, ທ່ານປະທານປະເທດ ເຈືອງເຕິນຊາງ ເນັ້ນໜັກວ່າ, ອາຊີ-ປາຊີຟິກ ພວມຢືນ ຢູ່ຕໍ່ໜ້າ ບັນດາ ກາລະໂອກາດໃໝ່ ແລະ ໃຫຍ່ຫຼວງ ກັບການສ້າງໂຄງປະກອບ ອາຊຽນໃຫ້ເປັນຕົວຕົນ ແລະ ບັນດາສັນຍາການຄ້າເສລີສະໄໝໃໝ່ ຄື: ສັນຍາ ຄູ່ຮ່ວມມືເສດຖະກິດຮອບດ້ານພາກພື້ນ(RCEP), ສັນຍາ ຄູ່ຮ່ວມມື ລະຫວ່າງບັນດາປະເທດຕິດກັບ ມະຫາສະໝຸດ ປາຊີຟິກ(TPP), ບັນດາການເຊື່ອມຕໍ່ ລະຫວ່າງ ອາຊີຕາເວັນອອກສຽງເໜືອ ແລະ ສຳພັນທະພາບປາຊີຟິກ.

ທ່ານປະທານປະເທດ ໄດ້ຍົກໃຫ້ເຫັນແຈ້ງ ບັນດາ ຄວາມມານະພະຍາຍາມ ແລະ ການປະກອບສ່ວນ ຂອງ ອາຊຽນ ໃນເລື່ອງລິເລີ່ມ ແລະ ຊຸກຍູ້ການຫັນເປັນ ການຄ້າເສລີ, ການລົງທຶນ, ເພີ່ມທະວີການເຊື່ອມຕໍ່ ໃນຂອບເຂດ ອາເປັກ ແລະ ຢູ່ ອາຊີ-ປາຊີຟິກ. ພົ້ນເດັ່ນຂຶ້ນໃນນັ້ນ ແມ່ນເລື່ອງບັນດາສະມາຊິກ ອາຊຽນ ໄດ້ສະເໜີ “ບັນດາເປົ້າໝາຍ Bogo” ປີ 1994 ທີ່ປະເທດອິນໂດເນເຊຍ, ຄວາມຄິດສ້າງສັນ ສ້າງ ໂຄງປະກອບ “ພາກພື້ນ ການຄ້າເສລີ ອາຊີ-ປາຊີຟິກ” ທີ່ຮ່າໂນ້ຍ ປີ 2006, ຂໍ້ລິເລີ່ມ “ພັດທະນາແບບ ຍືນຍົງ ແລະ ເຊື່ອມຕໍ່ພາກພື້ນ” ທີ່ສິງກະໂປ ປີ 2009 ແລະ “ແຜນການໄລຍະຍາວ ອາເປັກກ່ຽວກັບ ພັດທະນາ ພື້ນຖານໂຄງລ່າງ ແລະ ການລົງທຶນ” ທີ່ບາລີ, ອິນໂດເນເຊຍ ປີ 2013.

ທ່ານປະທານປະເທດ ເນັ້ນໜັກວ່າ, ເວລາແຕ່ນີ້ຮອດປີ 2020 ແມ່ນໄລຍະພັດທະນາໃໝ່ ແລະ ຂະຫຍັນ ຂັນແຂງ ຂອງອາຊີ ຕາເວັນອອກສຽງໃຕ້ ກັບເລື່ອງປະຊາຄົມອາຊຽນ ສ້າງຕັ້ງຂຶ້ນ ເປັນຮູບເປັນຮ່າງ, ສ້າງ ຕະຫຼາດລວມແຫ່ງໜຶ່ງດຽວ, ສະພາບແວດລ້ອມທາງເສດຖະກິດລວມເປັນເອກະພາບ ຂອງ ທົ່ວພາກພື້ນ. ເກືອບທັງໝົດ ບັນດາຂໍ້ໝັ້ນໝາຍ ຫັນເປັນ ການຄ້າ, ລົງທຶນ ແລະ ບໍລິການແບບເສລີ ໃນບັນດາຂໍ້ຕົກລົງ ວ່າດ້ວຍການຄ້າເສລີ ຂອງ ອາຊຽນ ກັບບັນດາ ຄູ່ຮ່ວມມື ແຖວໜ້າ ຈະໄດ້ສຳເລັດເສັດສິ້ນ, ພິເສດແມ່ນ ສັນຍາ ຄູ່ຮ່ວມມື ເສດຖະກິດຮອບດ້ານ ພາກພື້ນ (RCEP), ເປີດກວ້າງ ແລະ ຍົກລະດັບ ບັນດາຂໍ້ສັນຍາ ການຄ້າເສລີ ຂອງ ອາຊຽນ ກັບ ຈີນ, ຍີ່ປຸ່ນ ແລະ ອິນເດຍ.

ຕີລາຄາສູງບົດບາດນຳໜ້າ ຂອງບັນດາວິສາຫະກິດ ໃນການ ເຊື່ອມຕໍ່ ແລະ ຮ່ວມສຳພັນໃນພາກພື້ນ, ທ່ານ ປະທານປະເທດ ສະເໜີ ໃຫ້ບັນດາວິສາຫະກິດ ພ້ອມກັນມານະພະຍາຍາມ ປະຕິບັດ ຂອບເຂດ ແລະ ເສັ້ນ ທາງເຊື່ອມຕໍ່ ອາເປັກ ຊຶ່ງໄດ້ອະນຸມັດຜ່ານ ທີ່ບັນດາກອງປະຊຸມຂັ້ນສູງ ຢູ່ບາລີ ແລະ ປັກກິ່ງ, ພິເສດແມ່ນ ໃນການລະດົມແຫຼ່ງເງິນລົງທຶນ ແລະ ຜ່ານບັນດາຮູບແບບພົວພັນ ຄູ່ຮ່ວມມືສາທາລະນະ-ເອກະຊົນ(PPP).

ພ້ອມກັນນັ້ນ, ບັນດາວິສາຫະກິດ ກໍຕ້ອງສືບຕໍ່ ຊ່ວຍໜູນ ດ້ານ ເຕັກນິກ, ຍົກສູງກຳລັງຄວາມສາມາດ ເຊື່ອມຕໍ່ ໃຫ້ແກ່ ບັນດາ ພື້ນຖານເສດຖະກິດສະມາຊິກທີ່ພວມພັດທະນາ, ໂດຍສະເພາະ ຢ່າງຍິ່ງ ແມ່ນ ໃນດ້ານການສຶກສາ, ກໍ່ສ້າງ ແຫຼ່ງຊັບພະຍາກອນມະນຸດ ແລະ ຮັບມືກັບບັນດາສິ່ງທ້າທາຍ ທົ່ວໜ່ວຍພິພົບ ຄື ການປ່ຽນແປງຂອງດິນຟ້າອາກາດ ແລະ ໄພທຳມະຊາດ.

ທ່ານປະທານປະເທດ ສະເໜີໃຫ້ບັນດາວິສາຫະກິດ ເພີ່ມທະວີ ຊ່ວຍໜູນບັນດາສະມາຊິກ ອາຊຽນ ໃນການ ຜັນຂະຫຍາຍ ແຜນການສັງລວມ ກ່ຽວກັບການເຊື່ອມຕໍ່ກັບ ອາຊຽນ, ບັນດາ ໂຄງການອະນຸພາກພື້ນ ວ່າດ້ວຍ ພື້ນຖານໂຄງລ່າງ, ລົດໄລຍະຫ່າງໃນການພັດທະນາ ລະຫວ່າງບັນດາປະເທດ ອາຊຽນ ແລະ ອະນຸ ພາກພື້ນແມ່ນ້ຳຂອງ. 
 

ທີ່ກອງປະຊຸມ, ທ່ານປະທານປະເທດ ໄດ້ຮຽກຮ້ອງປະຊາຄົມ ວິສາຫະກິດ ອາເປັກ ສືບຕໍ່ເປັນເພື່ອນຮ່ວມທາງ ແລະ ຊ່ວຍໜູນ ຫວຽດນາມ
ໃນຂົງເຂດຕ່າງໆ ໃນນັ້ນມີທັງຂົງເຂດເຕັກໂນໂລຢີ. ພາບ: VNP


ກໍ່ສ້າງພື້ນຖານໂຄງລ່າງ, ພັດທະນາແລວເສດຖະກິດ ທາງທິດ ຕາເວັນອອກ-ຕາເວັນຕົກ, ເໜືອ-ໃຕ້… ກໍແມ່ນໜຶ່ງໃນບັນດາ
ຄວາມບຸລິມະສິດແຖວໜ້າ ເພື່ອຮຽກຮ້ອງການລົງທຶນຂອງ ຫວຽດນາມ. ພາບ: VNP

ຄຽງຂ້າງນັ້ນ, ບັນຫາລົງທຶນກໍ່ສ້າງ, ພັດທະນາບັນດາຈຸດທ່ອງທ່ຽວ, ເຂດເສດຖະກິດ, ອຸດສາຫະກຳ, ເສດຖະກິດ
ດ່ານຊາຍແດນ… ກໍເປັນການເຈາະຈີ້ມທີ່ໜ້າດຶງດູດໃຈ ສຳລັບບັນດານັກລົງທຶນ ໃນພາກພື້ນ
ຊຶ່ງທ່ານປະທານປະເທດໄດ້ເຕື້ອງເຖິງ ຢູ່ກອງປະຊຸມ. ພາບ:VNP
ແລກປ່ຽນກັບບັນດາວິສາຫະກິດ ກ່ຽວກັບຄວາມສົນໃຈຂອງ ຫວຽດນາມ, ທ່ານປະທານປະເທດໄດ້ຍົກ ໃຫ້ ເຫັນແຈ້ງວ່າ, ເຊື່ອມຕໍ່ ພາກພື້ນ ທີ່ມີລັກສະນະລວມ ຊຶ່ງໄດ້ສະແດງອອກ ໃນຂໍກຸນແຈ ຂອງການປ່ຽນແປງ ໃໝ່ ຢ່າງເລິກເຊິ່ງ, ກວ້າງຂວາງ ແລະ ການ ເຊື່ອມໂຍງເຂົ້າກັບສາກົນຢ່າງຮອບດ້ານ ທີ່ ຫວຽດນາມ ໄດ້ ແລະ ພວມ ມານະນະຍາຍາມຜັນຂະຫຍາຍ. ທ່ານ ປະທານປະເທດ ສະເໜີໃຫ້ບັນດາວິສາຫະກິດ ສືບຕໍ່ ເປັນ ເພື່ອນຮ່ວມທາງ ແລະ ຊ່ວຍໜູນຫວຽດນາມ ໃນການ ພັດທະນາ ພື້ນຖານໂຄງລ່າງ, ພິເສດແມ່ນ ກ່ຽວກັບແຫຼ່ງທຶນ, ເຕັກໂນໂລຢີ ແລະ ຍົກສູງ ກຳລັງຄວາມສາມາດ.

ທ່ານປະທານປະເທດເນັ້ນໜັກ ບັນດາບຸລິມະສິດຂອງຫວຽດນາມ ໃນປັດຈຸບັນຄື ກໍ່ສ້າງແລວເສດຖະກິດ ຕາເວັນອອກ-ຕາເວັນຕົກ ຂອງອະນຸພາກພື້ນແມ່ນ້ຳຂອງ ເປີດກວ້າງ ແລະ ເຂດ ສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ, ແລວ ເສດຖະກິດທາງທິດໃຕ້ ແລະ ແລວເສດຖະກິດທາງທິດເໜືອ-ໃຕ້, ພື້ນຖານໂຄງລ່າງທ່າກຳປັ່ນ, ອານາເຂດ, ຈຸດທ່ອງທ່ຽວ; ບັນດາ ເຂດເສດຖະກິດ, ອຸດສາຫະກຳ ແລະ ເສດຖະກິດດ່ານຊາຍແດນ…
 
ບັນດາວິສາຫະກິດຕ່າງກໍຕີລາຄາສູງ ຜົນສຳເລັດ ຢ່າງ ຂະຫຍັນຂັນແຂງ ຂອງຫວຽດນາມ ໃນຄວາມ ມານະພະຍາຍາມ ປ່ຽນໃໝ່ ຢ່າງກວ້າງຂວາງ ເລິກເຊິ່ງ, ເຮັດໃຫ້ສະຖຽນລະພາບ ເສດຖະກິດມະຫາພາກ ແລະ ປັບປຸງໂຄງປະກອບເສດຖະກິດ ຄືນໃໝ່. ບັນດາວິສາຫະກິດສະແດງຄວາມເຊື່ອໝັ້ນວ່າ, ດ້ວຍ ຄວາມມານະພະຍາຍາມເຂົ້າຮ່ວມ ບັນດາການຮ່ວມສຳພັນ ເສດຖະກິດຢູ່ພາກພື້ນ, ຫວຽດນາມຈະສືບຕໍ່ ເປັນຈຸດນັດໝາຍ ທີ່ດຶງດູດ ສຳລັບບັນດາວິສາຫະກິດ ແລະ ຢືນຢັນ ເພີ່ມທະວີ ບັນດາ ການເຄື່ອນໄຫວ ດຳເນີນທຸລະກິດ ແລະ ລົງທຶນຢູ່ຫວຽດນາມ ເພື່ອ ພ້ອມກັນຮັບເອົາກາລະໂອກາດ ແລະ ຄວາມສາມາດ ບົ່ມຊ້ອນໃໝ່ ໃນການຮ່ວມມື.

ເນື່ອງໃນໂອກາດນີ້, ບັນດາວິສາຫະກິດກໍມີຂໍ້ສະເໜີຈຳນວນໜຶ່ງ ຕໍ່ທ່ານປະທານປະເທດ ເຈືອງເຕິນຊາງ ກ່ຽວກັບມາດຕະການ ແລະ ນະໂຍບາຍຕ່າງໆ ແນໃສ່ສ້າງເງື່ອນໄຂ ອຳນວຍຄວາມສະດວກກວ່າເກົ່າ ໃຫ້ແກ່ບັນດາວິສາຫະກິດ ທີ່ພວມດຳເນີນທຸລະກິດຢູ່ຫວຽດນາມ. 
 
ປະຕິບັດ: VNA/VNP
ບັນດາບົດທີ່ຖືກນຳສະເໜີ