09/08/2017 08:34 GMT+7 Email Print Like 0

ອາຊຽນ+3 EAS ແລະ ARF: ເລັ່ງໃສ່ບັນດາບັນຫາພາກພື້ນ ແລະ ສາກົນ

      ໃນວັນທີ 7/8, ສືບຕໍ່ລາຍການເຮັດວຽກໃນຂອບເຂດກອງປະຊຸມລັດຖະມົນຕີການຕ່າງປະເທດ ອາຊຽນ ຄັ້ງທີ 50 ແລະ ບັນດາກອງປະຊຸມກ່ຽວຂ້ອງ, ໄດ້ດຳເນີນກອງປະຊຸມລັດຖະມົນຕີການຕ່າງປະເທດ ອາຊຽນ+3 ຄັ້ງທີ 18

(ພາບປະກອບ)
      ກອງປະຊຸມລັດຖະມົນຕີການຕ່າງປະເທດ ບັນດາປະເທດເຂົ້າຮ່ວມກອງປະຊຸມຂັ້ນສູງອາຊີຕາເວັນອອກ (EAS) ຄັ້ງທີ 7 ແລະ ເວທີປາໄສພາກພື້ນອາຊຽນ (ARF) ຄັ້ງທີ 24. ຈຸດສຸມຂອງບັນດາກອງປະຊຸມແມ່ນສຳຫຼວດກວດຄືນການພົວພັນ ແລະ ການຮ່ວມມືລະຫວ່າງບັນດາຝ່າຍໃນໄລຍະຜ່ານມາ, ກຳນົດທິດການຮ່ວມມືໃນໄລຍະຈະມາເຖິງ, ແລກປ່ຽນກ່ຽວກັບບັນດາບັນຫາພາກພື້ນ ແລະ ສາກົນເຊິ່ງຕ່າງຝ່າຍມີຄວາມສົນໃຈ, ພ້ອມທັງກະກຽມໃຫ້ແກ່ກອງປະຊຸມຂັ້ນສູງ ອາຊຽນ ກັບບັນດາຄູ່ຮ່ວມມືໃນເດືອນ 11/2017.
ກອງປະຊຸມ ອາຊຽນ+3 ຮັບຮອງເອົາແຜນການປະຕິບັດງານ ໄລຍະ 2018 – 2022 ເພື່ອກຳນົດທິດໃຫ້ແກ່ການຮ່ວມມື ອາຊຽນ+3 ໃນ 5 ປີ ຈະມາເຖິງ; ກອງປະຊຸມ ARF ຮັບຮອງເອົາບັນຊີລາຍຊື່ບັນດາການເຄື່ອນໄຫວໃຫ້ປີກາງສະໄໝ 2017 – 2018, ໃນນັ້ນ ຫວຽດນາມ ຈະເປັນເຈົ້າພາບ 2 ກອງປະຊຸມສຳມານະກ່ຽວກັບບັນດາຫົວຂໍ້ການຮ່ວມມືລະຫວ່າງບັນດາອົງການປະຕິບັດກົດໝາຍບົນທະເລ ແລະ ສ້າງກຳລັງຄວາມສາມາດໃຫ້ແກ່ກຳລັງຮັກສາສັນຕິພາບ.
       ຢູ່ນອກບັນດາບັນຫາພາກພື້ນ ແລະ ສາກົນ, ທີ່ບັນດາກອງປະຊຸມ ອາຊຽນ+3, EAS ແລະ ARF, ບັນດາລັດຖະມົນຕີປຶກສາຫາລືບັນດາບັນຫາທີ່ຕ່າງຝ່າຍມີຄວາມສົນໃຈ, ສົ່ງຜົນສະທ້ອນໂດຍກົງເຖິງເລື່ອງຮັກສາສັນຕິພາບ, ຄວາມໝັ້ນຄົງ ແລະ ສະຖຽນລະພາບຂອງພາກພື້ນ, ໃນນັ້ນພົ້ນເດັ່ນແມ່ນສະພາບຢູ່ທະເລຕາເວັນອອກ, ແຫຼມເກົາຫຼີ ແລະ ບັນດາການທ້າທາຍຄວາມໝັ້ນຄົງໃໝ່ຄື: ກໍ່ການຮ້າຍ ແລະ ການໃຊ້ຄວາມຮຸນແຮງ, ຄວາມປອດໄພທາງເຄືອຂ່າຍອິນເຕີແນດ. ບັນດາລັດຖະມົນຕີເນັ້ນໜັກວ່າ: ສັນຕິພາບ ແລະ ປ້ອງກັນຄວາມສະຫງົບ ແມ່ນເງື່ອນໄຂຕັດສິນຊີ້ຂາດຊຸກຍູ້ການຮ່ວມມື, ພັດທະນາ ແລະ ວັດຖະນາຖາວອນລວມຂອງທຸກປະເທດໃນພາກພື້ນ ແລະ ນອກພາກພື້ນ. ກອງປະຊຸມຢືນຢັນເຖິງຄວາມສຳຄັນຂອງການຮັກສາສັນຕິພາບ, ສະຖຽນລະພາບ, ຄວາມໝັ້ນຄົງຄວາມປອດໄພໃນການເດີນທະເລ ແລະ ການບິນ ຢູ່ທະເລຕາເວັນອອກ ແລະ ຊົມເຊີຍເລື່ອງ ອາຊຽນ ແລະ ຈີນ ເຫັນດີເປັນເອກະພາບຮັບຮອງເອົາຮ່າງກົດແຫ່ງການປະພຶດຂອງບັນດາຝ່າຍ ຢູ່ທະເລຕາເວັນອອກ (COC) ເປັນພື້ນຖານຊຸກຍູ້ການເຈລະຈາກໍ່ສ້າງ COC ຢ່າງມີຄວາມປະສິດທິຜົນ ແລະ ແທດຈິງ.
       ກ່າວຄຳເຫັນທີ່ບັນດາກອງປະຊຸມ, ທ່ານ ຟ້າມບີງມີງ, ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຫວຽດນາມ ສະເໜີ ອາຊຽນ+3 ສຸມໃສ່ການຮ່ວມມືດ້ານການຄ້າ, ການເງິນ, ຍົກສູງກຳລັງຄວາມສາມາດ ແລະ ການເຊື່ອມຕໍ່ພາກພື້ນ, ສະຫງວນບຸລິມະສິດໃຫ້ແກ່ການພັດທະນາວິສາຫະກິດນ້ອຍທີສຸດ, ນ້ອຍ ແລະ ກາງ (MSMEs). ທີ່ກອງປະຊຸມ EAS, ທ່ານ ຮອງນາຍົກລັດຖະມົນຕີ ສະເໜີວ່າ ອາຊຽນສືບຕໍ່ເສີມຂະຫຍາຍບົດບາດໄຈກາງ, ພິຈາລະນາເພີ່ມເຕີມການຮ່ວມມືບົນທະເລເປັນຂົງເຂດຮ່ວມມືບຸລິມະສິດໃໝ່ຂອງ EAS ຢ່າງຕັ້ງໜ້າ, ເໝາະສົມກັບຜົນປະໂຫຍດ ແລະ ຄວາມສົນໃຈຂອງທຸກປະເທດ. ໃນກອງປະຊຸມ ARF, ທ່ານ ຮອງນາຍົກລັດຖະມົນຕີສະເໜີເຖິງການປັບປຸງ ແລະ ເປິດກວ້າງບັນດາມາດຕະການເຈລະຈາ ແລະ ສ້າງຄວາມໄວ້ເນື້ອເຊື້ອໃຈ, ສ້າງສະຕິຄວາມຮັບຮູ້ລວມ ແລະ ກຳລັງຄວາມສາມາດຜັນຂະຫຍາຍການການທູດສະກັດກັ້ນ.
 (ແຫຼ່ງຄັດຈາກ VOV)

ບັນດາບົດທີ່ຖືກນຳສະເໜີ