10/02/2014 16:23 GMT+7 Email Print Like 0

ອາຊີບ ປູກຕົ້ນດອກຈຳປາ ຢູ່ບິ່ງແຈ໋ງ

ບັນດາ​ຕົ້ນດອກ​ຈຳປາ​​ສີສັນ​ຫຼາກ​ຫຼາຍ​​ ໄດ້​ຮັບ​ການ​ປູກ​​​ໃສ່ໂຖໜ່ວຍຕ່າງໆ​ດ້ວຍ​ຂະໜາດ​ໃຫຍ່​ນ້ອຍທີ່​ແຕກ​ຕ່າງ​ກັນ​ເຮັດ​ໃຫ້​ຫຼົງ​ໄຫຼ​ຈິດ​ໃຈ​ຜູ້​ຮັກ​ມັກ​ດອກ​​ໄມ້ ແມ່ນ​ຜົນ​ຂອງ​ຕົວ​​ແບບ​ເສດຖະກິດ​ໜຶ່ງ ນຳ​ມາ​ເຊິ່ງປະສິດທິ​ຜົນ​​ໃນເກືອບ 10 ປີຜ່ານມາ​ ຂອງ​ບັນດາຊາວ​ກະສິກອນ​ຢູ່ “ສະ​ໂມ​ສອນ​ດອກ​ຈຳປາ” ​ຕາ​ແສງຮື​ງລອງ, ​​ເມືອງ​ບິ່ງ​ແຈ໋ງ, ນະຄອນ​​ໂຮ່ຈີ​ມິນ.

 

ຕັ້ງຢູ່ເຂດຊານກຳແພງນະຄອນໂຮ່ຈີມິນ, ບິ່ງແຈ໋ງເປັນທ້ອງຖິ່ນມີດິນແດນທີ່ແຫ້ງແລ້ງ, ຫຼາຍບ່ອນ ພັດຖືກ ນ້ຳຖ້ວມ, ປູກເຂົ້າກໍບໍ່ໄດ້ທໍ່ໃດ. ມີຊາວກະສິກອນຫຼາຍຄົນ ໄດ້ ຊອກຫາທິດທາງໄປໃໝ່ທີ່ເໝາະສົມໃຫ້ແກ່ຕົນເອງ, ໃນນັ້ນມີທ່ານ ເຈືອງວັນເຟື້ອງ. ໃນຄັ້ງໜຶ່ງທີ່ມາຢາມເຂດປູກດອກໄມ້ຊາແດັກ(ແຂວງໂດ່ງ ທາບ),ທ່ານເຟື້ອງ ໄດ້ຮັບ ການແນະນຳຈາກບັນດາ ຜູ້ຊຳນານງານໃນດ້ານປູກດອກໄມ້ປະດັບ, ໃນນັ້ນມີທັງປະເພດຕົ້ນດອກຈຳປາ ແລະ ຄຸນຄ່າເສດຖະກິດຂອງມັນ. ເມື່ອກັບເມືອເຮືອນ, ທ່ານ ເຟືອງໄດ້ໝູນໃຊ້ວິທີປູກຕົ້ນດອກຈຳປາຢູ່ສວນຂອງຕົນ ແລະ ຮຽກຮ້ອງຊາວກະສິກອນອື່ນໆ ພ້ອມກັນເຮັດນຳລາວ. ເມື່ອເດືອນສິງຫາ ປີ 2008, “ສະໂມສອນ ດອກ ຈຳປາ” ໄດ້ຮັບການສ້າງຕັ້ງຂຶ້ນ.
ດ້ວຍຈຳນວນສະມາຊິກພຽງ 11 ຄົນໃນເບື້ອງຕົ້ນ, ພາຍຫຼັງ 7 ປີແຫ່ງການພັດທະນາ, “ສະໂມສອນດອກຈຳປາ” ມາບັດນີ້ ໄດ້ມີສະມາຊິກກວ່າ 40 ຄົນ, ປູກຕົ້ນດອກ ຈຳປາ 100 ແນວພັນ ຢູ່ເທິງເນື້ອທີ່ດິນ 3 ເຮັກຕາ, ໃນນັ້ນປູກຕົ້ນດອກຈຳປາແນວພັນຂອງໄທເປັນຕົ້ນຕໍ. 
 

ສວນຕົ້ນດອກຈຳປາຂອງສະມາຊິກຜູ້ໜຶ່ງ ຂອງສະໂມສອນ.

ຕົ້ນດອກຈຳປາອ່ອນທີ່ໄດ້ຮັບກ້າເບ້ຍຈາກເມັດ.

ຕົ້ນດອກຈຳປາເຕີບໃຫຍ່ຕົ້ນໜຶ່ງສາມາດອອກດອກໄມ້ປະມານ 8 ເດືອນ ຮອດ 1 ປີ.

ເຕັກນິກປະສົມເກສອນທຽມໃຫ້ຕົ້ນດອກຈຳປາເຖິງວ່າງ່າຍດາຍ ແຕ່ຮຽກຮ້ອງມີປະສົບການ
ຈຶ່ງໃຫ້ກຳເນີດແນວພັນຕົ້ນດອກຈຳປາຕາມຄວາມມັກໄດ້.


ຫຼັງຈາກໄດ້ຮ່ວມເກສອນສຳເລັດຜົນ, ຕົ້ນດອກຈຳປາຈະຖືກຂີດໝາຍໄວ້ຕາມບັນຊີວົງຕະກຸນຂອງຕົ້ນໄມ້ພໍ່ແມ່.

ເຕັກນິກປະສົມແນວພັນຢູ່ເທິງລຳຕົ້ນຂອງຕົ້ນດອກຈຳປາ.

ຕົ້ນດອກຈຳປາຍິ່ງມີ “ຫົວ“ ໃຫຍ່, ມີຮູບຊົງແປກໆ ແລະ ເປັນເອກະລັກ ຈະຍິ່ງມີຄຸນຄ່າສູງ.

ຕົວແບບປູກຕົ້ນດອກຈຳປາປະດັບເອ້ຢູ່ເທິງຊັ້ນດາດຟ້າຂອງນາຍຊ່າງ ຫງວຽນວັນຕຸກ,
ສະມາຊິກຜູ້ໜຶ່ງຂອງ “ສະໂມສອນດອກຈຳປາ” ຢູ່ຕາແສງຮືງລອງ.


ພົ່ນຝຸ່ນໃຫ້ແກ່ຕົ້ນດອກຈຳປາ.
 
ຕົ້ນດອກຈຳປານອນຢູ່ໃນກຸ່ມຕົ້ນໄມ້ເບັງນ້ຳ, ລຳຕົ້ນອ່ອນ, ບໍ່ເລືອກປະເພດດິນປູກຝັງ ແລະ ເງື່ອນໄຂພູມອາກາດ. ຕົ້ນໄມ້ສາມາດປູກຢູ່ໃນຫຼາຍພູມສັນຖານທີ່ແຕກຕ່າງກັນ ແລະ ບໍ່ຕ້ອງລົງທຶນບົວລະບັດຫຼາຍ. ຕົ້ນໄມ້ຂະຫຍາຍຕົວໄວ, ປະມານ 8-10 ເດືອນ ສາມາດອອກດອກ, ດອກໄມ້ບານໃນໜຶ່ງເດືອນຈຶ່ງຫ່ຽວແຫ້ງ.
ເພື່ອປະດິດສ້າງບັນດາປະເພດດອກໄມ້ໃໝ່ກັບສີສັນຫຼາກຫຼາຍ, ຜູ້ປູກດອກໄມ້ເຄີຍຕັດ ແລະ ຕໍ່ກິ່ງຕໍ່ງ່າໃສ່ບັນດາປະເພດດອກຈຳປາທີ່ໄດ້ຮັບຄວາມນິຍົມຊົມຊອບຈາກ ຕະຫຼາດ, ໂດຍສະເພາະຢ່າງຍິ່ງແມ່ນບັນດາປະເພດຂອງໄທ.
ເຕັກນິກປະສົມແນວພັນ, ບົວລະບັດບໍ່ຍາກ ແລະ ກໍງ່າຍດາຍໃນການໝູນໃຊ້. ທ່ານ ເຈືອງວັນເຟື້ອງ, ຫົວໜ້າ “ສະໂມສອນດອກຈຳປາ” ຕາແສງຮືງລອງ, ຜູ້ມີປະສົບການ 10 ປີ ໃນການປູກຕົ້ນດອກຈຳປາໄດ້ເວົ້າວ່າ: “ຕົ້ນດອກຈຳປາປູກງ່າຍ ແລະ ບໍ່ຈຳເປັນຕ້ອງບົວລະບັດຫຼາຍ, ຖ້າຫາກວ່າດູແລຫຼາຍ, ຕົ້ນໄມ້ອາດຈະຕາຍ. ຄວນປະສົມ ແນວພັນຕົ້ນໄມ້ໃນຍາມອົບອຸ່ນ ແລະ ມີແສງແດດ ຍ້ອນອາກາດໜາວ ແລະ ມີຝົນຕົກຫຼາຍຈະກໍ່ຜົນສະທ້ອນບໍ່ດີເຖິງຕົ້ນໄມ້. ປະຈຸບັນ, ທ່ານເຟື້ອງໄດ້ປູກຕົ້ນດອກຈຳປາກວ່າ 3000 ຕົ້ນຢູ່ໃນເຂດສວນມີເນື້ອທີ່ 3000 ແມັດມົນທົນ ຂອງຕົນ.
ຕາມທ່ານອຸດແອ໋ງ, ສະມາຊິກຜູ້ໜຶ່ງທີ່ມີປະສົບການກ່ຽວກັບຕົ້ນດອກຈຳປາຂອງສະໂມສອນໄດ້ແບ່ງປັນວ່າ: ຕົ້ນດອກຈຳປາຕົ້ນໜຶ່ງທີ່ງາມຫຼືບໍ່ງາມກໍຕ້ອງຂຶ້ນກັບຄວາມ ນິຍົມຂອງຜູ້ຊື້, ມີຄົນມັກຍ້ອນຮູບຊົງທີ່ແປກໆ ຂອງຕົ້ນໄມ້, ມີຄົນນິຍົມຍ້ອນສີສັນ ຫຼືວ່າກໍສົນໃຈເຖິງຈຳນວນກີບດອກໄມ້… ແຕ່ວ່າ ມີຄວາມຊົມຊອບຫຼາຍກວ່າໝູ່ ນັ້ນແມ່ນ ບັນດາປະເພດດອກຈຳປາແນວພັນຂອງໄທ.
ໂດຍກຳໄດ້ຄວາມຕ້ອງການຂອງຕະຫຼາດ, ທາງສະໂມສອນໄດ້ແຕ່ງຕັ້ງຄົນໄປປະເທດໄທ ເພື່ອຊອກຮູ້ກ່ຽວກັບເຕັກນິກການປູກ, ປະສົມແນວພັນຕົ້ນໄມ້ ແລະ ຊື້ເບ້ຍໄມ້ ຈຳປາຫຼາຍຊະນິດຂອງໄທມາປູກຢູ່ຫວຽດນາມ. ຜ່ານເວລາຫຼາຍປີແຫ່ງການເຮັດວຽກດ້ວຍຄວາມພະຍາຍາມ, ບັນດາສະມາຊິກຂອງສະໂມສອນໄດ້ໃຫ້ກຳເນີດ ຕົ້ນດອກ ຈຳປາຫຼາຍຊະນິດ ກັບຊື່ເອີ້ນທ່ີເປັນຕາຟັງຄື: ເຕີນແບກ, ແທງເຟືອງ, Baby Girl, Lasting Kiss ແລະ ອື່ນໆ...
ເນື່ອງຈາກຕົ້ນດອກຈຳປາຂະຫຍາຍຕົວຕະຫຼອດປີ ດັ່ງນັ້ນສາມາດຕອບສະໜອງໄດ້ທຸກຄວາມຮຽກຮ້ອງຕ້ອງການຂອງຕະຫຼາດ. ຕົ້ນດອກຈຳປາສາມາດນຳໃຊ້ໃນການ ປະດັບປະດາເຂດເມືອງໃຫຍ່, ຂອບເຂດບໍລິເວນ ສາລາ ວັດວາອາຮາມ, ປະຕູໂຂງເຮືອນ, ສວນຕົ້ນໄມ້ປະດັບເອ້ເອກະຊົນ, ລະບຽງ ເຮືອນ ຕະຫຼອດຮອດໃນງານ ວາງ ສະແດງດອກໄມ້ ເນື່ອງໃນໂອກາດມີງານບຸນຕ່າງໆ.
ປະຈຸບັນ, ຕົ້ນດອກຈຳປາໄດ້ມີໜ້າຢູ່ຫຼາຍທ້ອງຖິ່ນ ແຕ່ນະຄອນໂຮ່ຈີມິນ ເຖິງແຂວງຈຳນວນໜຶ່ງຢູ່ພາກກາງ ແລະ ພາກຕາເວັນຕົກ. ແຕ່ລະປີສາມາດສົ່ງອອກຕະຫຼາດ ຕົ້ນດອກຈຳປາປະມານ 50.000 ຕົ້ນ ດ້ວຍລາຄາແຕ່ຫຼາຍແສນດົ່ງ ເຖິງ ຫຼາຍຮ້ອຍລ້ານດົ່ງ. ຕົ້ນໄມ້ມີອາຍຸສູງຈະຍິ່ງມີຄຸນຄ່າສູງ. ມີສະມາຊິກຫຼາຍຄົນຂອງສະໂມສອນ ສາມາດຫາລາຍໄດ້ ເຖິງ 200 ລ້ານດົ່ງຕໍ່ປີ. ອາຊີບປູກຕົ້ນດອກຈຳປາໄດ້ຊ່ວຍໃຫ້ຫຼາຍຄອບຄົວຫຼຸດພົ້ນອອກຈາກຄວາມອຶດຫີວ ແລະ ບືນຂຶ້ນສ້າງຮັ່ງຄູນມີ. 
 
ຕົ້ນດອກຈຳປາໄທປະເພດຈຳນວນໜ່ຶງຂອງສະມາຊິກ ສະໂມສອນດອກຈຳປາ ຕາແສງຮືງລອງ








ໃນໄລຍະມໍ່ໆມານີ້, ທາງສະໂມສອນໄດ້ສົ່ງຕົ້ນດອກຈຳປາ 1000 ຕົ້ນໄປປະເທດຍີ່ປຸ່ນ ແລະ ພວມມີແຜນການສົ່ງອອກໄປບັນດາປະເທດຢູທະວີບອາຊີໃນໄລຍະທີ່ຈະ ມາເຖິງ. ສູນປຶກສາກະສິກຳນະຄອນໂຮ່ຈີມິນໄດ້ແຕ່ງຕັ້ງນັກວິສະວະກອນມາແນະນຳວິທີຕັດ, ປະສົມແນວພັນ ແລະ ບົວລະບັດ ເພື່ອຊ່ວຍໃຫ້ອາຍຸຂອງຕົ້ນດອກຈຳປາສູງຂຶ້ນ ກໍຄືສ້າງໜ້າເວັບ ແນໃສ່ແນະນຳຜະລິດຕະພັນຂອງສະໂມສອນເຖິງລູກຄ້າຢູ່ພາຍໃນ ແລະ ຕ່າງປະເທດອີກດ້ວຍ.
                                                                                                                          ບົດ: ເຊີນເຫງຍ - ພາບ: ຫງວຽນລວນ
ບັນດາບົດທີ່ຖືກນຳສະເໜີ