30/12/2014 15:04 GMT+7 Email Print Like 0

ນ້ຳໃຈມິດຕະພາບ ຫວຽດນາມ-ກຳປູເຈຍ ພັດທະນາໝັ້ນຄົງຕະຫຼອດການ

ທ່ານປະທານປະເທດ ເຈືອງເຕິນຊາງ ຫາກໍ່ສິ້ນສຸດການຢ້ຽມຢາມທາງລັດຖະກິດ ເຖິງລາຊະ ອານາຈັກ ກຳປູເຈຍ ໃນລະຫວ່າງວັນທີ 23-24/12/ 2014. ການຢ້ຽມຢາມ ໄຂຂຶ້ນໃນ ສະພາບການພົວພັນ ລະຫວ່າງສອງປະເທດ ພວມພັດທະນາຢ່າງດີງາມ ແລະ ສອງ ປະເທດພວມ ສະເຫຼີມສະຫຼອງ 35 ປີແຫ່ງວັນ ກຳປູເຈຍ ໄຊຊະນະ ລະບອບດັບສູນເຊື້ອຊາດ (7/1/1979 -7/1/2014).

 

ໃນໄລຍະທ່ານປະທານປະເທດຢູ່ຢ້ຽມຢາມ ກຳປູເຈຍ, ສອງຝ່າຍໄດ້ມີຫຼາຍການພົບປະຂັ້ນສູງ. ທີ່ບັນດາການພົບປະ, ການນຳສອງປະເທດ ໄດ້ແລກ ປ່ຽນຄວາມຄິດເຫັນຢ່າງເລິກເຊິ່ງ ຕໍ່ສາຍພົວພັນມິດຕະພາບ ແລະ ການຮ່ວມມືຮອບດ້ານ ລະຫວ່າງສອງປະເທດ ແລະ ບັນດາບັນຫາ ສາກົນ, ພາກພື້ນທີ່ສອງປະເທດມີຄວາມສົນໃຈ ແລະ ບັນລຸໄດ້ຫຼາຍ ຜົນສຳເລັດທີ່ສຳຄັນ.

ອົງກະສັດແຫ່ງລາຊະອານາຈັກ ກຳປູເຈຍ ພ້ອມບັນດາການນຳ ກຳປູເຈຍ ໄດ້ສະແດງຄວາມຂອບອົກຂອບໃຈຢ່າງເລິກເຊິ່ງ ຕໍ່ການສະໜັບ ສະໜູນ, ການຊ່ວຍເຫຼືອອັນຍິ່ງໃຫຍ່ ທີ່ການນຳ ແລະ ປະຊາຊົນ ຫວຽດນາມ ໄດ້ສະຫງວນໃຫ້ ກຳປູເຈຍ ໃນທຸກສະພາບການ, ເປັນຕົ້ນແມ່ນ ໃນໄລຍະທີ່ຫຍຸ້ງຍາກລຳບາກ. ຢືນຢັນຈະຈົດຈຳ ໄວ້ການຊ່ວຍເຫຼືອຂອງບັນດານັກຮົບອາສາສະໝັກ ຫວຽດນາມ ໄດ້ຊ່ວຍປະຊາຊົນ ກຳປູເຈຍ ຍາດໄດ້ໄຊຊະນະລະບອບ ດັບສູນເຊື້ອຊາດເມື່ອປີ 1979. 

ພະບາດສົມເດັດ ໂນໂຣດົມ ສີຫະໂມນີ ດີໃຈທີ່ໄດ້ພົບ ຄືນທ່ານປະທານປະເທດ ເຈືອງເຕິນຊາງ. ພາບ: ຫງວຽນຄາງ/VNA

ພິທີຕ້ອນຮັບທ່ານປະທານປະເທດ ເຈືອງເຕິນຊາງ ໄດ້ຮັບການຈັດຂຶ້ນ ຢູ່ພະລາຊະວັງຢ່າງສົມກຽດ. ພາບ: ຫງວຽນຄາງ/VNA

ພະບາດສົມເດັດ ໂນໂຣດົມ ສີຫະໂມນີ ຕ້ອນຮັບ ທ່ານປະທານປະເທດ ເຈືອງເຕິນຊາງ ທີ່ພະລາຊະວັງ. ພາບ: ຫງວຽນຄາງ/VNA

ທ່ານປະທານປະເທດ ເຈືອງເຕິນຊາງ ພົບປະກັບທ່ານ ນາຍົກລັດຖະມົນຕີ
 ລາຊະອານາຈັກ ກຳປູເຈຍ ສົມເດັດ ຮຸນແຊນ. ພາບ: ຫງວຽນຄາງ/VNA

ທ່ານປະທານປະເທດ ເຈືອງເຕິນຊາງ ພົບປະກັບທ່ານປະທານສະພາແຫ່ງຊາດ ກຳປູເຈຍ ສົມເດັດ ເຮັງ ຊຳຣິນ. ພາບ: ຫງວຽນຄາງ/VNA

ທ່ານປະທານປະເທດ ເຈືອງເຕິນຊາງ ຕ້ອນຮັບທ່ານ ຮອງປະທານຜູ້ທີໜຶ່ງຂອງສະພາສູງ ກຳປູເຈຍ ໄຊ ຈູມ. ພາບ: ຫງວຽນຄາງ/VNA

ທີ່ບັນດາການພົບປະແລກປ່ຽນຄວາມຄິດເຫັນ, ການນຳສອງປະເທດໄດ້ຢືນຢັນວ່າ ຈະສືບຕໍ່ປັບປຸງ ແລະ ຂະຫຍາຍ ການພົວພັນລະຫວ່າງ ສອງປະເທດຕາມຫຼັກນຳ “ປະເທດ ບ້ານໃກ້ເຮືອນຄຽງທີ່ດີງາມ, ຄວາມມິດຕະພາບມູນເຊື້ອ, ການຮ່ວມມືຮອບດ້ານ, ໝັ້ນຄົງຕະຫຼອດການ”.

ສອງຝ່າຍເປັນເອກະພາບຈະເພີ່ມທະວີບັນດາການພົບປະ, ແລກປ່ຽນຄະນະຜູ້ແທນຂັ້ນສູງ, ສົ່ງເສີມການເຄື່ອນໄຫວພົບປະແລກປ່ຽນສິລະປະ ວັດທະນະທຳ ລະຫວ່າງ ປະຊາຊົນສອງປະເທດ, ເພີ່ມທະວີວຽກງານເຜີຍແຜ່ໂຄສະນາໃຫ້ແກ່ປະຊາຊົນສອງປະເທດ ເຂົ້າໃຈກ່ຽວກັບມູນເຊື້ອ ສາມັກຄີມິດຕະພາບ, ການຊ່ວຍເຫຼືອເຊິ່ງກັນ ແລະ ກັນ ລະຫວ່າງສອງຊາດ, ຖືວ່າ ນີ້ເປັນປັດໃຈສຳຄັນ ທີ່ປະກອບສ່ວນປົກປັກຮັກສາ ແລະ ພາເຮັດໃຫ້ການພົວພັນລະຫວ່າງ ສອງປະເທດ ສືບຕໍ່ພັດທະນາຢ່າງໝັ້ນຄົງຕະຫຼອດການ.

ສອງຝ່າຍກໍ່ໄດ້ຖືສຳຄັນການຮ່ວມມືໃນຂົງເຂດເສດຖະກິດ, ການຄ້າ ແລະ ການລົງທຶນ, ຈະພິຈາລະນາເພື່ອດັດແກ້ບັນດານະໂຍບາຍ ທີ່ກ່ຽວ ຂ້ອງເພື່ອຊຸກຍູ້ ການລົງທຶນ ແລະ ມານະພະຍາຍາມພາເຮັດໃຫ້ມູນຄ່າການຄ້າສອງສົ້ນ ປັນລຸໄດ້ເປົ້າໝາຍ 5 ຕື້ USD ເມື່ອປີ 2015 ແລະ ສືບຕໍ່ເພີ່ມຂຶ້ນ ໃນຊຸມປີຕໍ່ໄປ. 

ທ່ານປະທານປະເທດ ເຈືອງເຕິນຊາງ ມາຢ້ຽມຢາມພະອາຈານ ແຕບວົງ ທີ່ວັດ ອຸນາລົມ. ພາບ: ຫງວຽນຄາງ/VNA

ທ່ານປະທານປະເທດ ເຈືອງເຕິນຊາງ ມາຢ້ຽມຢາມພະອາຈານ ບົວ ເກີຣີ ທີ່ວັດ ສະວາ ໂປເປ. ພາບ: ຫງວຽນຄາງ/VNA

ທ່ານປະທານປະເທດ ມາວາງພວງມາລາ ທີ່ອະນຸສາວະລີ ເອກະລາດ ທີ່ນະຄອນຫຼວງ ພະນົມເປັນ. ພາບ: ຫງວຽນຄາງ/VNA

ທ່ານປະທານປະເທດມາວາງພວງມາລາທີ່ອະນຸສາວະລີ ທະຫານອາສາສະໝັກ ຫວຽດນາມ
ເສຍສະຫຼະຊີວິດຢູ່ ກຳປູເຈຍ ທີ່ນະຄອນຫຼວງ ພະນົມເປັນ. ພາບ: ຫງວຽນຄາງ/VNA


ທ່ານປະທານປະເທດ ມາຢ້ຽມຢາມຄົນເຈັບທີ່ພວມໄດ້ຮັບ ການປິ່ນປົວພະຍາດທີ່ໂຮງໝໍ ເຈິໄຣ-ພະນົມເປັນ. ພາບ: ຫງວຽນຄາງ/VNA

ທ່ານປະທານປະເທດ ມາເຂົ້າຮ່ວມ ແລະ ມີບົດກ່າວປາໄສ ໃນການພົບປະກັບວິສາຫະກິດ ຫວຽດນາມ
ທີ່ລົງທຶນເຂົ້າ ກຳປູເຈຍ. ພາບ: ຫງວຽນຄາງ/VNA 
ສອງຝ່າຍໄດ້ຢືນຢັນຄືນວ່າ ຈະສືບຕໍ່ປະຕິບັດ ບັນດາສົນທິສັນຍາ, ສັນຍາ ແລະ ຂໍ້ຕົກລົງ ກ່ຽວກັບຊາຍແດນ ລະຫວ່າງສອງປະເທດຢ່າງມີ ປະສິດທິຜົນ ແລະ ມານະ ພະຍາຍາມສຳເລັດວຽກງານປັກຫຼັກໝາຍຊາຍແດນທາງບົກໂດຍໄວ ເພື່ອກໍ່ສ້າງເສັ້ນທາງຊາຍແດນລະຫວ່າງ ສອງ ປະເທດ ໃຫ້ກາຍເປັນເສັ້ນທາງແຫ່ງສັນຕິພາບ, ມິດຕະພາບ, ການຮ່ວມມື ແລະ ພັດທະນາ.

ສອງຝ່າຍເປັນເອກະສັນຈະສືບຕໍ່ສົມທົບ, ສະໜັບສະໜູນເຊິ່ງກັນ ແລະ ກັນບົນບັນດາເວທີຫຼາຍຝ່າຍ, ຕັ້ງໜ້າເຂົ້າຮ່ວມກໍ່ສ້າງປະຊາຄົມ  ອາຊຽນ ເມື່ອວັນທີ 31 ທັນວາ 2015 ແລະ ກຳນົດທິດໃຫ້ໄລຍະພັດທະນາຕໍ່ໄປ. ສອງຝ່າຍໄດ້ເນັ້ນໜັກວ່າ ຈະສະໜັບສະໜູນແກ້ໄຂ ຂໍ້ຂັດແຍ້ງໂດຍ ສັນຕິວິທີ, ເໝາະສົມກັບກົດໝາຍສາກົນ ແລະ ບັນດາຄຳໝັ້ນສັນຍາຂອງພາກພື້ນ.

ອາດສາມາດເວົ້າໄດ້ວ່າ ການຢ້ຽມຢາມສຳເລັດຢ່າງຈົບ ງາມ. ບັນດາຜົນງານບັນລຸໄດ້ແມ່ນສຳຄັນ ແລະ ເປັນການກຳນົດ ທິດໃຫ້ການພົວພັນ ລະຫວ່າງສອງປະເທດ ສືບຕໍ່ພັດທະນາ ຢ່າງໝັ້ນຄົງ ໃນເວລາຈະມາເຖິງ.
ໂດຍ: VNA/VNP
ບັນດາບົດທີ່ຖືກນຳສະເໜີ