10/12/2014 10:59 GMT+7 Email Print Like 0

ກອງປະຊຸມ ສະໄໝສາມັນ ເທື່ອທີ 8, ສະພາແຫ່ງຊາດ ຫວຽດນາມຊຸດທີ XIII
ຄວາມປະທັບໃຈ ຢຽນຮົ່ງ

ພາຍຫຼັງການເຮັດວຽກເປັນເວລາກວ່າໜຶ່ງເດືອນ, ໃນຕອນບ່າຍ ວັນທີ 28 ພະຈິກ 2014, ທີ່ສະໂມສອນຢຽນຮົ່ງ-ສະໂມສອນ ບາດິ່ງ ແຫ່ງໃໝ່, ກອງ ປະຊຸມສະໄໝສາມັນ ເທື່ອທີ 8, ສະພາແຫ່ງຊາດ ຊຸດທີ XIII ໄດ້ອັດລົງ ຢ່າງເປັນທາງການ, ສຳເລັດທຸກແຜນການ ເຮັດວຽກຢ່າງຈົບງາມ ດ້ວຍ ບັນດາ ເນື້ອໃນອັນສຳຄັນ ແລະ ປະລິມານ ວຽກງານທີ່ໃຫຍ່ໆ ໃນທຸກດ້ານ ວ່າດ້ວຍວຽກງານນິຕິບັນຍັດ, ຕິດຕາມກວດກາ ແລະ ຕັດສິນບັນດາບັນຫາ ສຳຄັນຂອງ ປະເທດຊາດ.
 
ກ່າວປະໄສທີ່ກອງປະຊຸມດັ່ງກ່າວ, ທ່ານປະທານ ສະພາ ແຫ່ງຊາດ ຫງວຽນຊິງຮຸ່ງ ໄດ້ຍົກໃຫ້ເຫັນແຈ້ງວ່າ, ສະໄໝ ປະຊຸມສາມັນເທື່ອທີ 8 ໄດ້ຮັບຜົນສຳເລັດ, ສ້າງຄວາມປະທັບໃຈອັນດີງາມກ່ຽວກັບຄວາມສາມັກຄີ, ການເຮັດວຽກ ຢ່າງມີປະຊາທີປະໄຕ, ມີ ພູມປັນຍາ ແລະ ຄວາມຮັບຜິດຊອບ ຂອງບັນດາ ສະມາຊິກ ສະພາແຫ່ງຊາດ; ກ່ຽວກັບຄວາມເອົາຈິງເອົາຈັງ ໃນການຮັບເອົາ ຄວາມຄິດເຫັນ, ຂໍ້ສະເໜີແນະ ຂອງ ຜູ້ມີສິດເລືອກຕັ້ງ ແລະ ບັນດາ ຜູ້ແທນຂອງສະມາຊິກສະພາແຫ່ງຊາດ; ກ່ຽວກັບການຊີ້ນຳ ນຳພາ ຢ່າງ ເດັດຂາດ, ທັນການ, ສະພາແຫ່ງຊາດ ໄດ້ນຳມາ ແລະ ຕົກລົງບັນດາເນື້ອໃນອັນສຳຄັນ ຂອງປະເທດຊາດ ກໍຄືບັນດາບັນຫາ ສຸດທີ່ຮ້ອນເຮັ່ງ ຊຶ່ງໄດ້ສະເໜີອອກ ຢູ່ສະໂມສອນນີ້ ກ່ຽວກັບການຮັບເອົາ ຜູ້ຕິດ ຢາເສບຕິດ ເຂົ້າບັນດາຮາກຖານ ຮັບເອົາເປົ້າໝາຍສັງຄົມ; ກ່ຽວກັບ ການເພີ່ມເງິນເດືອນ ໃຫ້ແກ່ບັນດາ ເປົ້າໝາຍ ຊົມໃຊ້ເງິນເດືອນ ຈາກງົບປະມານ ທີ່ຍັງປະສົບກັບຄວາມຫຍຸ້ງຍາກ… ຕອບສະໜອງຕາມ ຄວາມມຸ່ງມາດປາດຖະໜາ ຂອງຜູ້ມີສິດເລືອກຕັ້ງ ແລະ ບັນດາສະມາຊິກສະພາແຫ່ງຊາດ.

ສະພາແຫ່ງຊາດກຳນົດ ແລະ ຮຽກຮ້ອງປະຕິບັດ ຈຸດໝາຍ ສັງລວມ ຂອງປີ 2015 ແມ່ນສືບຕໍ່ ເຮັດໃຫ້ ເສດຖະກິດ ມະຫາພາກໝັ້ນຄົງ, ສຸມໃສ່ປົດປ່ອຍຄວາມຫຍຸ້ງຍາກ ໃນການ ຜະລິດ ແລະ ດຳເນີນທຸລະກິດ; ຜັນຂະຫຍາຍຢ່າງຂ້ຽວຂາດ ແລະ ມີປະສິດທິຜົນ ບັນດາບາດກ້າວກະໂດດຂັ້ນ ຂອງຍຸດທະສາດ; ຍົກສູງ ຄຸນນະພາບ ປະສິດທິຜົນ ແລະ ກຳລັງແກ່ງແຍ້ງ ຂອງ ຜະລິດຕະພັນ, ວິສາຫະກິດ ແລະ ພື້ນຖານເສດ ຖະກິດ; ຍົກສູງ ປະສິດທິຜົນການລົງທຶນໃຫ້ແກ່ກິດຈະກຳສາທາລະນະ, ຮັບປະກັນ ໜີ້ສາທາລະນະ, ໜີ້ ລັດຖະບານ, ໜີ້ຕ່າງປະເທດຂອງຊາດ ໃນຂີດຂັ້ນປອດໄພ; ຊຸກຍູ້ປະຕິຮູບບໍລິຫານ, ປະຕິຮູບຍຸຕິທຳ, ກັນ ແລະ ຕ້ານໄພສໍ້ລາດບັງຫຼວງ, ປະຕິບັດການ ປະຢັດມັດທະຍັດ, ຕ້ານການຟຸມເຟືອຍ ຢ່າງແຂງແຮງ; ຍົກສູງ ປະສິດທິຜົນໃນວຽກງານການຕ່າງປະເທດ ແລະ ຮ່ວມມື ກັບສາກົນ; ເພີ່ມທະວີຄວາມສາມາດ ບົ່ມຊ້ອນ ດ້ານປ້ອງກັນຊາດ, ປ້ອງກັນຄວາມສະຫງົບ ຂອງປະເທດຊາດ, ປົກປັກຮັກສາ ຄວາມເປັນ ເອກະລາດ, ອະທິປະໄຕແຫ່ງຊາດ, ຄວາມສະຫງົບດ້ານການເມືອງ, ຄວາມປອດໄພ ແລະ ຄວາມເປັນ ລະບຽບຮຽບຮ້ອຍຂອງສັງຄົມຢ່າງແໜ້ນແຟ້ນ.
ທ່ານປະທານສະພາແຫ່ງຊາດ ຫງວຽນຊິງຮຸ່ງ ບັນຊາວາລະປະຊຸມ ຂອງສະພາແຫ່ງຊາດ. ພາບ: ຍານຊ໋າງ/VNA

ພາບໃນວາລະປະຊຸມໜຶ່ງ ທີ່ສະໂມສອນຢຽນຮົ່ງ. ພາບ: ດຶກຕ໋າມ/VNA

ທ່ານປະທານປະເທດ ເຈືອງເຕິນຊາງ ລາຍງານຕໍ່ໜ້າກອງປະຊຸມ ກ່ຽວກັບເລື່ອງອະນຸມັດຜ່ານ ສົນທິສັນຍາຂອງສະຫະປະຊາດ
ວ່າດ້ວຍຕ້ານການທໍລະມານ ແລະ ບັນດາຮູບການປະພຶດ ຫຼື ລົງໂທດຢ່າງໂຫດຮ້າຍສາມານ, ໄຮ້ມະນຸດສະທຳ
ຫຼື ເຮັດໃຫ້ອັບອາຍຂາຍໜ້າມະນຸດ. ພາບ: ຍານຊ໋າງ/VNA


ທ່ານນາຍົກລັດຖະມົນຕີ ຫງວຽນເຕິນຢຸງ ຕອບຄຳຊັກຖາມ ຂອງຜູ້ແທນສະພາແຫ່ງຊາດ. ພາບ: ຟ້າມກຽນ/VNA

ຜູ້ແທນສະພາແຫ່ງຊາດ ເຂົ້າຮ່ວມການອອກຄວາມເຫັນ ແລະ ຊັກຖາມທີ່ສະພາ. ພາບ: ຢ໊ວານເຕິນ/VNA

ວົງການສື່ຂ່າວ ເຂົ້າຮ່ວມການປະຕິບັດງານທີ່ວາລະປະຊຸມ. ພາບ: ຈ້ອງດຶກ/VNA

ບັນດາຜູ້ແທນກົດປຸ່ມລົງຄະແນນສຽງ ຮັບຮອງເອົາກົດໝາຍສະບັບປັບປຸງ, ປະກອບເພີ່ມເຕີມ ຂໍ້ຄວາມຈຳນວນໜຶ່ງ
ຂອງກົດໝາຍພາສີອາກອນຈຳໜ່າຍພິເສດ. ພາບ: ເຟືອງຮວາ/VNA


ຫຼາຍບັນຫາທີ່ໃຫຍ່ໆ ໄດ້ສະພາແຫ່ງຊາດລົງຄະແນນສຽງຮັບຮອງເອົາ
ດ້ວຍຈຳນວນບັດເຫັນດີສູງ. ພາບ: ຫງວຽນເຢີນ/VNA
ພາຍຫຼັງກອງປະຊຸມສະໄໝສາມັນສິ້ນສຸດລົງ, ສະພາແຫ່ງຊາດຈະມອບໜ້າທີ່ໃຫ້ແກ່ ຄະນະກຳມະການ ປະຈຳສະພາແຫ່ງຊາດ, ບັນດາອົງການຂອງສະພາແຫ່ງຊາດ ແລະ ອົງການຈັດຕັ້ງທີ່ກ່ຽວຂ້ອງ ກະກຽມ ບັນດາເງື່ອນໄຂ ຮັບປະກັນປະຕິບັດ ບັນດາຂໍ້ຄວາມກົດໝາຍ ທີ່ສະພາແຫ່ງຊາດອະນຸມັດຜ່ານ ຢ່າງ ທັນການ ແລະ ມີປະສິດທິຜົນ; ພ້ອມກັນນັ້ນ ຕ້ອງສືບຕໍ່ ກວດຄືນທັງລະບົບກົດໝາຍ ເພື່ອປັບປຸງ, ປະກອບ ເພີ່ມເຕີມ, ລົບລ້າງ ຫຼືປະກາດໃຊ້ອັນໃໝ່ໆຢ່າງທັນການ ໃຫ້ສອດຄ່ອງກັບລັດຖະທຳມະນູນ; ກວດກາ, ຊຸກຍູ້, ຄວບຄຸມການກໍ່ສ້າງ, ປະກາດໃຊ້ ຂໍ້ມູນເອກະສານກຳນົດລາຍລະອຽດ, ແນະນຳການປະຕິບັດ ກົດໝາຍ, ດຳລັດກົດໝາຍ; ຊຸກຍູ້ວຽກງານໂຄສະນາເຜີຍແຜ່, ສຶກສາດ້ານກົດໝາຍ, ປະກອບສ່ວນ ນຳລັດຖະທຳມະນູນ ແລະ ກົດໝາຍເຂົ້າສູ່ຊີວິດຕົວຈິງ.

ຂີດໝາຍຕ່າງໆ ທີ່ກອງປະຊຸມສະໄໝສາມັນ ເທື່ອທີ 8, ສະພາແຫ່ງຊາດຫວຽດນາມຊຸດທີ XIII 
          - ສະພາແຫ່ງຊາດໄດ້ດຳເນີນການລົງຄະແນນໄວ້ວາງໃຈ ໃຫ້ແກ່ 50 ຕຳແໜ່ງ ໂດຍສະພາ ແຫ່ງຊາດເລືອກຕັ້ງ ແລະ ອະນຸມັດຜ່ານ.
          - ສະພາແຫ່ງຊາດໄດ້ດຳເນີນການຊັກຖາມ ທ່ານນາຍົກລັດຖະມົນຕີ ແລະ ສະມາຊິກ 4 ທ່ານ ຂອງລັດຖະບານ ຄື: ລັດຖະມົນຕີກະຊວງພາຍໃນ, ລັດຖະມົນຕີກະຊວງອຸດສາຫະກຳ-ການຄ້າ, ກະຊວງ ການຄົມມະນາຄົມຂົນສົ່ງ ແລະ ລັດຖະມົນຕີກະຊວງແຮງງານ, ທະຫານເສຍອົງຄະ ແລະ ສັງຄົມ.
          - ສະພາແຫ່ງຊາດໄດ້ໃຫ້ອະນຸຍາດ ຢ່າງເປັນທາງການ ກ່ຽວກັບ ເລື່ອງເພີ່ມເງິນເດືອນ ໃຫ້ 6,3 ລ້ານຄົນ ທີ່ນອນໃນເປົ້າໝາຍ ລາຍຮັບຕຳ່ ແຕ່ຕົ້ນປີ 2015, ດ້ວຍອັດຕາເພີ່ມ 8%, ທຽບເທົ່າກັບ ຈຳນວນ ເງິນປະມານ 90.000 ດົ່ງຕໍ່ເດືອນ.
          - ສະພາແຫ່ງຊາດ ໄດ້ຮັບຮອງເອົາກົດໝາຍ 18 ສະບັບ, ມະຕິ 11 ສະບັບ ແລະ ໃຫ້ຄວາມເຫັນ ແກ່ຮ່າງກົດໝາຍອື່ນໆ 12 ສະບັບ.
 
ປະຕິບັດ: VNA/VNP 
ບັນດາບົດທີ່ຖືກນຳສະເໜີ