10/03/2015 11:32 GMT+7 Email Print Like 0

ຂີດໝາຍ 25 ປີແຫ່ງການພົວພັນ ລະຫວ່າງ ຫວຽດນາມ-ອີຢູ

ປີ 2015 ນີ້ ແມ່ນຂີດໝາຍ 25 ປີ ແຫ່ງການສ້າງຕັ້ງສາຍ ພົວພັນ ທາງການທູດ ລະຫວ່າງຫວຽດນາມ ແລະສະຫະພາບເອີຣົບ (EU). ເນື່ອງໃນໂອກາດດັ່ງກ່າວນີ້, ນັກຂ່າວ ຈາກສໍານັກຂ່າວສານຫວຽດນາມ ທີ່ປະຈໍາປະເທດເບນຊິກ ໄດ້ມີການພົບປະສົນທະນາ ກັບ ທ່ານ ເວືອງເທື່ອ ຟອງ  ເອກອັກຄະລັດຖະທູດຫວຽດນາມ ປະຈຳລາຊະອາ ນາຈັກ ເບນຊິກ, ຫົວໜ້າຄະນະຜູ້ແທນ ຫວຽດນາມ ທີ່ເຮັດວຽກຄຽງຂ້າງ ກັບສະຫະພາບເອີຣົບ. 

ທ່ານເອກອັກຄະລັດຖະທູດ ເວືອງເທື່ອຟອງ ຕອບສຳພາດ ນັກຂ່າວຂອງ ຂ່າວສານຫວຽດນາມ. ພາບ: VNA

ຕາມທ່ານເອກອັກຄະລັດຖະທູດ ເວືອງເທື່ອຟອງແລ້ວ, ອີຢູແມ່ນຄູ່ຮ່ວມມືທີ່ສຳຄັນ ແລະ ຈັດຢູ່ໃນອັນດັບແຖວໜ້າ ໃນນະໂຍບາຍ ການຕ່າງປະເທດຂອງຫວຽດນາມ. ໃນໄລ ຍະຜ່ານມາ, ທັງສອງຝ່າຍໄດ້ມີບາດກ້າວພັດທະນາຕ່າງໆທີ່ສຳຄັນທີ່ສຸດ.

ໃນຂົງເຂດການເມືອງ, ພາຍຫຼັງທັງສອງຝ່າຍໄດ້ລົງນາມເຊັນສັນຍາ ວ່າດ້ວຍ ຄູ່ຮ່ວມມື ແລະ ການຮ່ວມມື ເພື່ອ ພັດ ທະນາ (PCA) ແລ້ວ, ການພົວພັນສອງຝ່າຍ ໄດ້ມີບາດ ກ້າວ ພັດທະນາກະໂດດຂັ້ນ. ໃນຊຸມປີມໍ່ໆນີ້ ທັງສອງຝ່າຍ ໄດ້ມີການແລກປ່ຽນ ຄະນະຜູ້ແທນຂັ້ນສູງເຊິ່ງກັນ ແລະ ກັນ. 

ທ່ານເລຂາທິການໃຫຍ່ພັກຄອມມູນິດຫວຽດນາມ, ທ່ານ ນາຍົກລັດຖະມົນຕີ ແລະ ທ່ານປະທານສະພາແຫ່ງຊາດ ຫວຽດນາມ ໄດ້ເດີນທາງມາຢ້ຽມຢາມ ອີຢູ ຢ່າງເປັນທາງການຕາມລຳດັບ. ສ່ວນຝ່າຍອີຢູ, ທ່ານປະທານຄະນະ ກຳ ມະການ ເອີຣົບ, ທ່ານປະທານສະພາ ເອີຣົບ ຜູ້ຕາງໜ້າຂັ້ນສູງຂອງອີຢູກ່ຽວກັບຄວາມສະຫງົບ ແລະ ການຕ່າງປະເທດ ກໍໄດ້ໄປຢ້ຽມຢາມຫວຽດນາມຢ່າງເປັນທາງການ.

ຄຽງຄູ່ກັນນັ້ນ, ທັງສອງຝ່າຍກໍຍັງໄດ້ມີການແລກປ່ຽນ ຄະ ນະຜູ້ແທນລະດັບອື່ນໆອີກເຊັ່ນ: ຂັ້ນກະຊວງ, ຂະແໜງ ການ ແລະ ທ້ອງຖິ່ນ. ການຮ່ວມມືສອງຝ່າຍໃນຂົງເຂດຕ່າງໆໄດ້ມີການຂະຫຍາຍກວ້າງ, ນັບແຕ່ຂົງເຂດ ປ້ອງກັນຄວາມສະຫງົບ, ການເມືອງ, ການສຶກສາ, ວັດທະນະ ທຳ ຮອດ ປົກປັກຮັກສາສິ່ງແວດລ້ອມ ແລະ ຕ້ານການປ່ຽນ ແປງ ຂອງດິນຟ້າອາກາດ…

ໃນຈຳນວນ 13 ປະເທດຄູ່ຮ່ວມມືຍຸດທະສາດ ຂອງ ຫວຽດນາມໃນປັດຈຸບັນ, ອີຢູມີ ຫ້າປະເທດມະຫາອຳນາດ ທີ່ສຳຄັນທີ່ສຸດຄື: ອັງກິດ, ຝຣັ່ງ, ເຢຍລະມັນ, ອີຕາລີ ແລະ ແອັສປາຍ. ຄຽງຄູ່ກັນນັ້ນ, ບັນດາປະເທດສະມາຊິກ ອີຢູ ກໍຍັງເປັນຄູ່ຮ່ວມມືຍຸດທະສາດຂອງຫວຽດນາມ ໃນຫຼາຍຂົງເຂດອີກດ້ວຍ.

ໃນຕໍ່ໜ້າອັນໃກ້ນີ້, ທັງສອງຝ່າຍຈະລົງນາມໃນສັນຍາການ ຄ້າເສລີ ລະຫວ່າງ ຫວຽດນາມ ແລະ ອີຢູ (EVFTA). ນີ້ແມ່ນ ບາດກ້າວຂະຫຍາຍຕົວທີ່ສຳຄັນ ທີ່ສຸດ ໃນການພົວພັນຮ່ວມມື ແລະ ແລກປ່ຽນ ລະຫວ່າງສອງຝ່າຍ ໃນຕະຫຼອດ 25 ປີ ຜ່ານມາ.


ທ່ານນາຍົກລັດຖະມົນຕີ ຫງວຽນເຕິນຢຸງ ແລະ ທ່ານປະທານຄະນະກຳມະການເອີຣົບ José Manuel Barroso
ເປັນສັກຂີພິຍານໃນພິທີລົງນາມ ປະກາດການອຸປະຖຳຂອງສະຫະພາບເອີຣົບ
ໃຫ້ແກ່ຫວຽດນາມ. ພາບ: VNA


ທ່ານນາຍົກລັດຖະມົນຕີ ຫງວຽນເຕິນຢຸງ ໃນການແລກປ່ຽນຄຳຄິດຄຳເຫັນກັບທ່ານປະທານສະພາເອີຣົບ Herman Van Rompuy
ທີ່ສຳນັກງານສະພາເອີຣົບ ຢູ່ ນະຄອນຫຼວງ ບຣຸກແຊນ. ພາບ: VNA


ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຟ້າມບິ່ງມິນ ໃນການຕ້ອນຮັບທ່ານນາງ  Catherine Ashton ,
ຮອງປະທານຄະນະກຳມະການເອີຣົບ(EC), ຜູ້ຕາງໜ້າຂັ້ນສູງຂອງສະຫະພາບເອີຣົບ(EU)
ກ່ຽວກັບນະໂຍບາຍການຕ່າງປະເທດ ແລະ ຄວາມສະຫງົບ. ພາບ: VNA


ປຶກສາຫາລື ແລະ ຮັບຟັງຄວາມຄິດເຫັນດ້ານການເມືອງລະດັບລັດຖະມົນຕີຊ່ວຍ ຄັ້ງທີ 3 ລະຫວ່າງຫວຽດນາມ-ອີຢູ. ພາບ: VNA

ອີຢູ ຈັດການປະຊຸມຂ່າວປະກາດລາຍງານ ຕີລາຄາການ ເຄື່ອນໄຫວຮ່ວມມືພັດທະນາ(ODA)
ລະຫວ່າງສະຫະພາບ ເອີຣົບ ແລະ ຫວຽດນາມ. ພາບ: VNA

ທ່ານເອກອັກຄະລັດຖະທູດ ເວືອງເທື່ອຟອງ ໄດ້ເນັ້ນໜັກ ກ່ຽວກັບດ້ານເສດຖະກິດການຄ້າວ່າ, ອີຢູ ເປັນຕະຫຼາດ ແຖວໜ້າ ກ່ຽວກັບສິນຄ້າສົ່ງອອກ ຂອງຫວຽດນາມ. ປີ 2014, ລວມຍອດມູນຄ່າການຄ້າສອງສົ້ນຂອງຫວຽດນາມ ແລະ ອີຢູ ບັນລຸເຖິງ 35 ຕື້ USD, ໃນນັ້ນ ຫວຽດນາມ ສົ່ງ ອອກ ຫຼາຍກວ່າການນຳເຂົ້າ 10 ກວ່າຕື້ USD.

ບັນດາສິນຄ້າ ແລະ ບໍລິການຂອງຫວຽດນາມ ກັບ ອີຢູ ແມ່ນມີລັກສະນະເພີ່ມເຕີມໃຫ້ກັນ ແລະ ກັນ, ບໍ່ຄ່ອຍມີລັກ ສະນະແກ້ງແຍ່ງໂດຍກົງ. ເພາະສະນັ້ນ, ມີກາລະໂອກາດໃຫຍ່ຫລວງ ເພື່ອໃຫ້ທັງສອງຝ່າຍຂະຫຍາຍການຮ່ວມມື ເສດຖະກິດ, ການຄ້ານໍາກັນ.

ກ່ຽວກັບຂົງເຂດການລົງທຶນ, ໃນຈຳນວນ 28 ປະເທດສະ ມາຊິກ ອີຢູ, ມາຮອດປັດຈຸບັນ ໄດ້ມີ 23 ປະເທດ ລົງທຶນ ໂດຍກົງ ສູ່ຫວຽດນາມ ດ້ວຍມູນຄ່າການ ລົງທຶນທັງໝົດ ຫລາຍກວ່າ 18 ຕື້ USD.

ໃນຂົງເຂດ ODA, ອີຢູເປັນຄູ່ຮ່ວມມືທີ່ ສະໜອງ ODA ໃຫ້ແກ່ຫວຽດນາມລາຍໃຫຍ່ທີ່ສຸດ. ໃນໄລຍະແຕ່ 2014-2020, ອີຢູ ຍົກລະດັບການ ຊ່ວຍເຫຼືອ ODA ໃຫ້ແກ່ ຫວຽດນາມ ຂຶ້ນຫລາຍກວ່າ 30% ດ້ວຍມູນຄ່າທັງໝົດແມ່ນ 400 ລ້ານ ເອີໂຣ.

ໃນສະພາບການໄລຍະໃໝ່, ອີຢູຈະເປັນຄູ່ຮ່ວມມືສຸດທີ່ສຳຄັນ ໃນນະໂຍບາຍການຕ່າງປະເທດ ຫັນເປັນຫຼາຍທິດ, ຫັນເປັນຫຼາຍຮູບແບບ ຂອງຫວຽດນາມ.

ທ່ານ ຫງວຽນເທື່ອຟອງໃຫ້ຮູ້ວ່າ, ເພື່ອຂ່ຳນັບຮັບຕ້ອນ 25 ປີ ແຫ່ງວັນສ້າງຕັ້ງ ສາຍພົວພັນດ້ານການທູດ ລະຫວ່າງຫວຽດນາມ-ອີຢູ, ນອກຈາກ ເພີ່ມທະວີ ການພົບປະແລກປ່ຽນຄະນະຜູ້ແທນຂັ້ນສູງແລ້ວ, ຫວຽດນາມ ແລະ ອີຢູຈະຈັດຕັ້ງ ການສຳມະນາ, ກອງປະຊຸມ, ແລກປ່ຽນ ວັດທະນະ ທຳ, ສິລະປະວັນນະຄະດີຫລາຍຂຶ້ນ. ພິເສດ, ອີຢູ ຈະຈັດຕັ້ງ ການແຂ່ງຂັນ ຊອກຮູ້ກ່ຽວກັບອີຢູ ສະຫງວນໃຫ້ແກ່ຊາວ ຫວຽດນາມ.

ສ່ວນຝ່າຍຫວຽດນາມ, ທ່ານເອກອັກຄະລັດຖະທູດຫວຽດນາມ, ຄະນະຜູ້ແທນຫວຽດນາມຮ່ວມເຮັດວຽກ ຢູ່ຄຽງຂ້າງ ອີຢູ ຈະຈັດຕັ້ງໃຫ້ມີ ສອງການເຄື່ອນໄຫວຄື: ຈັດພິທີ ສະເໜີຕົວ ການຈັດຕັ້ງຜູ້ແທນລາຊະດອນມິດຕະພາບອີຢູ-ຫວຽດນາມປະຈໍາສະພາທະວີບເອີຣົບ ແລະ ລົງນາມວ່າດ້ວຍ EVFTA.

ທ່ານເອກອັກຄະລັດຖະທູດ ເວືອງເທື່ອຟອງ ກໍຍັງໃຫ້ຮູ້ອີກ ວ່າ, ຫວຽດນາມ ແລະ ອີຢູ ພະຍາຍາມເຮັດໃຫ້ສຳເລັດການເຈລະຈາ ເພື່ອສາມາດເຊັນສັນຍາ EVFTA ທີ່ຮ່າໂນ້ຍ ໃນເວລາຫົກເດືອນຕົ້ນປີ 2015 ນີ້.


ຈັດງານວັນ ວັດທະນະທຳເອີຣົບ ຄັ້ງທີ 4 ທີ່ຫວຽດນາມ. ພາບ: VNA

ງານມະໂຫລານດົນຕີເອີຣົບ ທີ່ຫວຽດນາມ, ປີ 2014. ພາບ: VNA

ນັກທ່ອງທ່ຽວຊາວເອີຣົບມາຢ້ຽມຢາມແຂວງແຄ໋ງຮວ່າ, ຫວຽດນາມ ດ້ວຍກໍາປັ່ນທາງທະເລ. ພາບ: VNA

ອີຢູເປັນຕະຫຼາດຕົ້ນຕໍຂອງຂະແໜງການຕຳ່ແຜ່ນຕັດຫຍິບຫວຽດນາມ. ພາບ: VNA

ປຸງແຕ່ງສິນທະເລເພື່ອສົ່ງອອກໄປຕະຫຼາດເອີຣົບ. ພາບ: VNA

ປະຕິບັດ: VNA/VNP

ບັນດາບົດທີ່ຖືກນຳສະເໜີ