08/12/2014 08:29 GMT+7 Email Print Like 0

ຂີດໝາຍສຳຄັນ ໃນການພົວພັນ ລະຫວ່າງ ຫວຽດນາມ-ລັດເຊຍ ແລະ ເບລາຣຸດ

ການຢ້ຽມຢາມປະເທດສະຫະພັນລັດເຊຍ ແລະ ສ.ເບລາຣຸດ ຂອງທ່ານ ເລຂາທິການໃຫຍ່ພັກກອມມູນິດ ຫວຽດນາມ ຫງວຽນຝູ໋ຈ້ອງ (ແຕ່ວັນທີ 23-27 ພະຈິກ 2014) ເປັນຂີດໝາຍສຳຄັນໜຶ່ງ, ນຳການພົວພັນ ລະຫວ່າງ ຫວຽດນາມ ກັບສອງ ປະເທດດັ່ງກ່າວ ຂຶ້ນສູ່ລະດັບສູງໃໝ່, ເປັນກຳລັງແຮງ ຊຸກຍູ້ ການພົວພັນຄູ່ຮ່ວມມືຍຸດທະສາດ ແລະ ຮອບດ້ານ ລະຫວ່າງ ຫວຽດນາມ-ສະຫະພັນລັດເຊຍ; ປັບປຸງ ແລະ ພັດທະນາການພົວພັນ ມິດຕະພາບ ອັນເປັນມູນເຊື້ອ, ການຮ່ວມມືຮອບດ້ານ ລະຫວ່າງ ຫວຽດນາມ ແລະ ເບລາຣຸດ ໃຫ້ ແຂງແຮງ ແລະເລິກເຊິ່ງຍິ່ງກວ່າອີກ.
 
ບັນດາທ່ານຜູ້ນຳ ຂອງລັດເຊຍ ແລະ ເບລາຣຸດ ຕ່າງກໍຖືສຳຄັນ ແລະ ຕີລາຄາສູງການຢ້ຽມຢາມດັ່ງກ່າວ ແລະ ສະຫງວນ ການຕ້ອນຮັບສຸດທີ່ມີຄວາມເຄົາລົບນັບຖື ແລະ ສະໜິດສະໜົມໃຫ້ແກ່ທ່ານ ເລຂາ ທິການໃຫຍ່ ພ້ອມຄະນະ; ຈັດພິທີການຕ້ອນຮັບສູງສຸດ ໃຫ້ແກ່ທ່ານເລຂາທິການໃຫຍ່ ຫງວຽນຝູ໋ຈ້ອງ ພ້ອມກັນນັ້ນ ມີທັງຈຸດພິເສດກ່ຽວກັບພິທີການ.

ທ່ານເລຂາທິການໃຫຍ່ ຫງວຽນຝູ໋ຈ້ອງ ໄດ້ມີການພົບປະກັບ ບັນດາທ່ານຜູ້ນຳຂອງລັດ, ລັດຖະບານ, ສະພາແຫ່ງຊາດ ແລະ ພັກການເມືອງຂອງສອງປະເທດ. ພິເສດແມ່ນ, ຢູ່ສະຫະພັນລັດເຊຍ, ທ່ານ ປະທານາທິບໍດີ Vladimir Putin ແລະ ທ່ານນາຍົກລັດຖະມົນຕີ Dmitry Medvedev ໄດ້ຕ້ອນຮັບ ທ່ານເລຂາທິການໃຫຍ່ ພ້ອມຄະນະຜູ້ແທນຂັ້ນສູງຫວຽດນາມ ທີ່ເຂດທຳນຽບສ່ວນຕົວ ຢູ່ນະຄອນ ໂຊຈີ ຊຶ່ງເປັນແຫ່ງຕ້ອນຮັບພຽງ ບັນດາທ່ານປະມຸກລັດແຖວໜ້າຂອງໂລກ ແລະ ຄູ່ຮ່ວມມືສຳຄັນພິເສດ ຂອງ ສະຫະພັນລັດເຊຍ; ຈັດຕັ້ງການ ສວນສະໜາມຫຼາຍເທື່ອ ແລະ ເປີດປະຕູສຸສານເລນິນໃນວັນພັກ ເພື່ອໃຫ້ ຄະນະເຂົ້າຢ້ຽມຄຳນັບ. ທ່ານປະທານ Gennady Ziuganov ພ້ອມດ້ວຍຄະນະການນຳ ພັກກອມມູນິດ ສະຫະພັນລັດເຊຍ ກໍໄດ້ມີການເຂົ້າຢ້ຽມຄຳນັບ ແລະ ພົບປະ ແລກປ່ຽນກັບທ່ານເລຂາທິການໃຫຍ່ ຫງວຽນຝູ໋ຈ້ອງ.

ທີ່ເບລາຣຸດ, ທ່ານນາຍົກລັດຖະມົນຕີ ແລະ ທ່ານລັດຖະມົນຕີຂອງ ປະເທດເພື່ອນມິດ ຫຼາຍຄົນ ໄດ້ອອກ ສະໜາມບິນ ເພື່ອການຕ້ອນຮັບ ແລະ ສ່ົງທາງທ່ານເລຂາທິການໃຫຍ່ ແລະ ຄະນຜູູ້ແທນຂັ້ນສູງ ຫວຽດນາມ. ບັນດາການພົບປະເຈລະຈາ, ພົບປະແລກປ່ຽນຄຳຄິດຄຳເຫັນ ໄດ້ຮັບການດຳເນີນໄປ ໃນບັນຍາກາດອົບອຸ່ນ, ເປີດອົກເປີດໃຈ ແລະ ເຊື່ອໝັ້ນເຊີ່ງກັນ ແລະ ກັນ ກັບເນື້ອໃນຫຼາຍຢ່າງ ທີ່ສຳຄັນ, ລະອຽດ ແລະ ເໝາະກັບຄວາມເປັນຈິງ ກ່ຽວກັບການພົວພັນສອງຝ່າຍ ແລະ ບັນດາບັນຫາທີ່ຕ່າງຝ່າຍຕ່າງ ມີຄວາມສົນໃຈ.

ທ່ານຮວ່າງບ່ິງກວນ, ຫົວໜ້າຄະນະການຕ່າງປະເທດສູນກາງພັກ ໄດ້ສັງເກດວ່າ: “ການຢ້ຽມຢາມ ສະຫະພັນລັດເຊຍ ແລະ ສ.ເບລາຣຸດ ຂອງທ່ານເລຂາທິການໃຫຍ່ ພັກຄອມມູນິດຫວຽດນາມ ໄດ້ປະສົບ ຜົນສຳເລັດຢ່າງຈົບງາມ.

ການຢ້ຽມຢາມດັ່ງກ່າວໄດ້ປະກອບສ່ວນຮັດແໜ້ນ ສາຍພົວພັນດ້ານການເມືອງຢ່າງດີງາມ ແລະ ເພີ່ມທະວີ ຄວາມໄວ້ເນື້ອເຊື່ອໃຈ ລະຫວ່າງຫວຽດນາມ ກັບສະຫະພັນ ລັດເຊຍ ແລະ ເບລາຣຸດ. ດ້ວຍການຢ້ຽມຢາມ ດັ່ງກ່າວ, ການນຳສອງປະເທດເພື່ອນມິດ ຍິ່ງເຫັນແຈ້ງ ແຜນນະໂຍບາຍມີຄວາມເປັນເອກະສັນກັນ, ການຖື ສຳຄັນ ແລະ ຄວາມຫວັງຢ່າງຈິງໃຈ ຂອງພັກ ແລະ ລັດເຮົາ ກ່ຽວກັບ ຊຸກຍູ້ ການພົວພັນ ຄູ່ຮ່ວມມື ຍຸດທະສາດຮອບດ້ານ ກັບສະຫະພັນ ລັດເຊຍ ແລະ ການພົວພັນມິດຕະພາບອັນເປັນມູນເຊື້ອ ກັບ ເບລາຣຸດ ຢ່າງແຮງ. ທັງລັດເຊຍ ແລະ ເບລາຣຸດ ລ້ວນແຕ່ຕີລາຄາສູງບົດບາດຂອງຫວຽດນາມ, ຢືນຢັນ ຖືສຳຄັນເລື່ອງພັດທະນາການພົວພັນ ກັບຫວຽດນາມ ແລະ ເນັ້ນໜັກ ຫວຽດນາມມີຈຸດທີ່ຕັ້ງສຳຄັນ ໃນ ນະໂຍບາຍການຕ່າງປະເທດຂອງເຂົາເຈົ້າ ທີ່ພາກພື້ນອາຊີ ຕາເວັນອອກສຽງໃຕ້ເວົ້າສະເພາະ ແລະ ອາຊີເວົ້າລວມ. ທັງ ຫວຽດນາມ, ລັດເຊຍ ແລະ ເບລາຣຸດ ລ້ວນແຕ່ຕີລາຄາສູງ ແລະ ຢືນຢັນ ບັນດາກົນໄກ ສົນທະນາການເມືອງຂັ້ນສູງ, ປັບປຸງ ການພົວພັນ ຜ່ານການຕິດຕໍ່ຜ່ານທາງການພົວພັນຂອງພັກ, ສະພາ ແຫ່ງຊາດ, ບັນດາກະຊວງ, ຂະແໜງການ, ທ້ອງຖິ່ນ ແລະ ປະຊາຊົນສອງປະເທດ. 

ທ່ານປະທານາທິບໍດີ Vladimir Putin ຕ້ອນຮັບ ທ່ານເລຂາທິການໃຫຍ່ພັກຄອມມູນິດຫວຽດນາມ
 ຫງວຽນຝູ໋ຈ້ອງ ທີ່ເຂດທຳນຽບສ່ວນຕົວຢູ່ນະຄອນໂຊຈີ. ພາບ: ຈີ້ຢຸງ/VNA


ທ່ານເລຂາທິການໃຫຍ່ ຫງວຽນຝູ໋ຈ້ອງ ພົບປະເຈລະຈາກັບ ທ່ານປະທານາທິບໍດີ ລັດເຊຍ Vladimir Putin. ພາບ: ຈີ້ຢຸງ/VNA

ທ່ານເລຂາທິການໃຫຍ່ ຫງວຽນຝູ໋ຈ້ອງ ແລະ ທ່ານ ປະທານາທິບໍດີ ລັດເຊຍ Vladimir Putin ເປັນ ສັກຂີພິຍານ
ໃນພິທີລົງນາມ ບັນດາເອກະສານ ວ່າດ້ວຍ ການຮ່ວມມືລະຫວ່າງສອງປະເທດ. ພາບ: ຈີ້ຢຸງ/VNA


ທ່ານ​ເລຂາທິການ​ໃຫຍ່​ ຫງວຽນ​ຝູ໋ຈ້ອງ ແລະ ທ່ານປະທານາທິບໍດີ ລັດເຊຍ Vladimir Putin
ພົບປະກັບວົງການໜັງສືພິມ. ພາບ: ຈີ້​ຢຸງ/VNA


ທ່ານນາຍົກລັດຖະມົນຕີ ລັດເຊຍ D.Medvedev ພົບປະແລກປ່ຽນ ຄຳຄິດເຫັນ ກັບທ່ານເລຂາທິການໃຫຍ່
ຫງວຽນຝູ໋ຈ້ອງ ທີ່ເຂດ ທຳນຽບສ່ວນຕົວຢູ່ນະຄອນ ໂຊຈີ. ພາບ: ຈີ້ຢຸງ/VNA


ທ່ານເລຂາທິການໃຫຍ່ ຫງວຽນຝູ໋ຈ້ອງ ພົບປະກັບທ່ານປະທານ ສະພາສະຫະພັນ ລັດເຊຍ
Valentina Matviyenko. ພາບ: ຈີ້ຢຸງ/VNA


ທ່ານເລຂາທິການໃຫຍ່ ຫງວຽນຝູ໋ຈ້ອງ ພົບປະແລກປ່ຽນ ຄຳຄິດເຫັນ ກັບທ່ານ ປະທານ
ດູມາແຫ່ງຊາດລັດເຊຍ I.Melnikov. ພາບ: ຈີ້ຢຸງ/VNA


ທ່ານເລຂາທິການໃຫຍ່ ຫງວຽນຝູ໋ຈ້ອງ ຕ້ອນຮັບທ່ານປະທານ ພັກ ກອມມູນິດສະຫະພັນລັດເຊຍ
Gennady Zyuganov. ພາບ: ຈີ້ຢຸງ/VNA


ທ່ານເລຂາທິການໃຫຍ່ ຢ້ຽມຢາມກຸ່ມບໍລິສັດ ນ້ຳມັນອາຍແກັສ Zarubezhneft. ພາບ: ຈີ້ຢຸງ/VNA
ທ່ານເລຂາທິການໃຫຍ່ ພົບປະກັບບັນດາອະດີດນັກຮົບ ລັດເຊຍ, ຜູ້ທີ່ເຄີຍເຂົ້າຮ່ວມ
ການສູ້ຮົບຢູ່ຫວຽດນາມ. ພາບ: ຈີ້ຢຸງ/VNA

ທ່ານເລຂາທິການໃຫຍ່ໄດ້ແລກປ່ຽນ ແລະ ເປັນເອກະສັນກັນ ກັບ ການນຳສອງປະເທດ ກ່ຽວກັບການ ກຳນົດທິດ, ຈຸດໝາຍ ແລະ ມາດຕະການໃຫຍ່ໆ ຢ່າງເລິກເຊິ່ງ, ກວ້າງຂວາງ ແນໃສ່ ເປີດກວ້າງ ການຮ່ວມມືສອງຝ່າຍ ບົນຂົງເຂດອື່ນໆ ເພື່ອໃຫ້ສົມກັບ ຄວາມ ສາມາດບົ່ມຊ້ອນ ແລະ ການພົວພັນ ດ້ານການເມືອງອັນດີງາມ ລະຫວ່າງສອງຝ່າຍ. ສຳລັບ ສະຫະພັນລັດເຊຍ, ສອງຝ່າຍໄດ້ ມີການ ພິຈາລະນາ 12 ບັນຫາຕົ້ນຕໍ ແລະ ເປັນເອກະສັນກັນ ຊຸກຍູ້ ການຮ່ວມມື ຢ່າງແຮງ, ໂດຍສະເພາະແມ່ນ ເສດຖະກິດ, ການຄ້າ, ລົງທຶນ, ປ້ອງກັນຊາດ-ປ້ອງກັນຄວາມສະຫງົບ, ສຶກສາ-ກໍ່ສ້າງ, ວິທະຍາສາດ-ເຕັກໂນໂລຢີ, ວັດທະນະທຳ, ທ່ອງທ່ຽວ; ພ້ອມກັນນັ້ນ ກໍ່ຖືສຳຄັນໃນການຜັນຂະຫຍາຍ ບັນດາໂຄງການ ຮ່ວມມື ຈຸດສຸມ ລະຫວ່າງ ສອງປະເທດ, ພິເສດແມ່ນກ່ຽວກັບ ການຮ່ວມມື ໃນດ້ານ ນ້ຳມັນ ອາຍແກັສ ແລະ ພະລັງງານ. ສອງຝ່າຍກໍເປັນເອກະສັນກັນ ຍົກ ວົງເງິນການຄ້າສອງສົ້ນ ຂຶ້ນເຖິງ 10 ຕື້ USD ໃນປີ 2020. ສ່ວນສຳລັບ ເບລາຣຸດ, ບັນດາການພົບປະເຈລະຈາ, ພົບປະ ແລກປ່ຽນຄຳຄິດຄຳເຫັນ ສຸມໃສ່ໃນ 9 ບັນຫາຕົ້ນຕໍ; ສອງຝ່າຍ ຢືນຢັນ ຄວາມສາມາດ ບົ່ມຊ້ອນຢ່າງໃຫຍ່ຫຼວງ ໃນການພົວພັນ ລະຫວ່າງ ສອງ ຊາດ, ເອກະພາບກັນ ຈະສ້າງເງື່ອນໄຂ ອຳນວຍ ຄວາມສະດວກ ເພື່ອຊຸກຍູ້ການຮ່ວມມືໃນຂົງເຂດຕ່າງໆ ຄື: ເສດຖະກິດ-ການຄ້າ, ລົງທຶນ, ປະດິດເຄື່ອງຈັກ, ກະສິກຳ, ເຕັກໂນໂລຢີກັ່ນຕອງ ນ້ຳມັນ, ອຸດສາຫະກຳເບົາ, ເຕັກໂນໂລຢີ ຂ່າວສານ, ເອເລັກຕໂຣນິກ ແລະ ຂຸດຄົ້ນບໍ່ແຮ່; ເຫັນດີ ຄົ້ນຄວ້າ ຄວາມ ສາມາດ ຈັດຕັ້ງສາຍທາງບິນ ໂດຍກົງ ລະຫວ່າງ ສອງ ປະເທດ ແລະ ສ້າງຕັ້ງລະບອບຍົກເວັ້ນ ວີຊາ ໃຫ້ແກ່ ບັນດາການ ປະຕິບັດງານໄລຍະສັ້ນ. ຫວຽດນາມ ໄດ້ເປັນ ເອກະສັນກັນ ກັບ ລັດເຊຍ, ເບລາຣຸດ ເລື່ອງຊຸກຍູ້ ການເຈລະຈາ ຢ່າງໄວ ເພື່ອ ລົງນາມໃນສັນຍາການຄ້າເສລີ ລະຫວ່າງຫວຽດນາມ ແລະ ສຳພັນທະພາບດ້ານພາສີ ໃນປີ 2015 ຊຶ່ງເປັນປັດໃຈສຳຄັນ, ສ້າງເງື່ອນໄຂອຳນວຍຄວາມສະດວກ ໃຫ້ແກ່ວິສາຫະກິດ ຫວຽດນາມ, ລັດເຊຍ ແລະ ເບລາຣຸດ ຮ່ວມມືນຳກັນ ຢ່າງມີ ປະສິດທິຜົນ ໃນໄລຍະ ຈະມາເຖິງ.

ກ່ຽວກັບບັນຫາສາກົນ, ຜ່ານການພົບປະແລກປ່ຽນ ຢ່າງ ກົງໄປ ກົງມາ ແລະ ນຳ້ໃສໃຈຈິງ, ຫວຽດນາມ ແລະ ປະເທດເພື່ອນມິດ ໄດ້ເຂົ້າໃຈ ກ່ຽວກັບຫຼັກໝັ້ນຂອງກັນ ຢ່າງຈະແຈ້ງກວ່າ ແລະ ໄດ້ມີການແບ່ງປັນ ກ່ຽວກັບບັນດາບັນຫາທີ່ຕ່າງຝ່າຍມີຄວາມ ສົນໃຈ; ພ້ອມກັນນັ້ນ ກໍເປັນເອກະພາບກັນ ເພີ່ມທະວີ ການ ປະສານສົມທົບ ແລະ ຮ່ວມມື ຢ່າງແໜ້ນແຟ້ນ, ມີປະສິດທິຜົນ, ສະໜັບສະໜູນເຊີ່ງກັນ ແລະ ກັນ ທີ່ບັນດາ ເວທີຫຼາຍຝ່າຍ. ຫວຽດນາມ ແລະ ລັດເຊຍ, ເບລາຣຸດ ໄດ້ແບ່ງປັນ ຫຼັກໝັ້ນ ໃກ້ຊິດ ແລະ ຄ້າຍຄືກັນ ໃນຫຼາຍບັນຫາ ຄື ການຮັກສາ ຄວາມເປັນ ສັນຕິພາບ ແລະ ຄວາມສະຫງົບສາກົນ, ຄວາມເປັນລະບຽບ ຂອງໂລກ, ບົດບາດຂອງສະຫະປະຊາຊາດ ແລະ ກົດໝາຍສາກົນ, ແລະ ການຮ່ວມສຳພັນໃນພາກພື້ນ. ຜູ້ນຳ ຫວຽດນາມ ແລະ ສອງປະເທດເພື່ອນມິດ ຕ່າງກໍເນັ້ນໜັກ ຄວາມຈຳເປັນຕ້ອງ ແກ້ໄຂ ບັນດາ ຂໍ້ຂັດແຍ່ງຢູ່ ທະວີບອາຊີ-ປາຊີຟິກ ກໍຄືຢູ່ທະເລຕາເວັນອອກ ໂດຍສັນຕິວິທີ, ບໍ່ນຳໃຊ້ ກຳລັງອາວຸດ ຫຼື ນາບຂູ່ ການນຳໃຊ້ກຳລັງອາວຸດ ບົນພື້ນຖານກົດໝາຍສາກົນ ຊຶ່ງລວມມີສົນທິສັນຍາຂອງ ສະຫະ ປະຊາຊາດ ວ່າດ້ວຍກົດໝາຍ ທະເລປີ 1982; ສະໜັບສະໜູນ ເລື່ອງຜັນຂະຫຍາຍ ຖະແຫຼງການກ່ຽວກັບ ການປະພຶດຕໍ່ ຂອງຝ່າຍຕ່າງໆ ຢ່າງຄົບຖ້ວນ ແລະ ມີປະສິດທິຜົນ ຢູ່ທະເລຕາເວັນອອກ (DOC) ແລະ ບັນລຸໄດ້ ປະມວນ ກົດລະບຽບ ຢູ່ທະເລຕາເວັນອອກ (COC) ໂດຍໄວ.

ເນື່ອງໃນໂອກາດນີ້, ຫວຽດນາມ ໄດ້ມີການລົງນາມ ໃນສັນຍາ ແລະ ຂໍ້ຕົກລົງການຮ່ວມມື 9 ສະບັບກັບ ສະຫະພັນ ລັດເຊຍ ກ່ຽວກັບ ຂໍ້ມູນຂ່າວສານ, ວິທະຍາສາດ-ເຕັກໂນໂລຢີ, ສຶກສາ-ກໍ່ສ້າງ, ພາສີ ຊາຍແດນ, ກິລາ ກາຍຍະກຳ, ນ້ຳມັນອາຍແກັສ; ແລະ ລົງນາມ ກັບ ເບລາຣຸດ ສັນຍາ ແລະ ຂໍ້ຕົກລົງ 3 ສະບັບ ກ່ຽວກັບ ການຮ່ວມມື ບົນຊ່ອງພັກ, ຂໍ້ມູນສື່ສານ ແລະ ຮ່ວມມືລະຫວ່າງທ້ອງຖິ່ນຂອງ ສອງ ປະເທດ. 
 

ທ່ານປະທານາທິບໍດີ ປະເທດ ສ.ເບລາຣຸດ A.Lukashenko ໃນການຕ້ອນຮັບ ທ່ານເລຂາທິການໃຫຍ່
ຫງວຽນຝູ໋ຈ້ອງທີ່ທຳນຽບ ປະທານາທິບໍດີ. ພາບ: ຈີ້ຢຸງ/VNA


ທ່ານປະທານາທິບໍດີ A.Lukashenko ໃນການພົບປະເຈລະຈາ ກັບທ່ານ ເລຂາທິການໃຫຍ່ ຫງວຽນຝູ໋ຈ້ອງ. ພາບ: ຈີ້ຢຸງ/VNA

ທ່ານເລຂາທິການໃຫຍ່ ຫງວຽນຝູ໋ຈ້ອງ ແລະ ທ່ານປະທານາທິບໍດີ A.Lukashenko
ພົບປະກັບວົງການໜັງສືພິມ. ພາບ: ຈີ້ຢຸງ/VNA


ທ່ານເລຂາທິການໃຫຍ່ ຫງວຽນຝູ໋ຈ້ອງ ແລະ ທ່ານນາຍົກ ລັດຖະມົນຕີ ເບລາຣຸດ Mikhail Myasnikovich ເປັນສັກຂີພິຍານໃນພິທີ ລົງນາມໃນບັນດາເອກະສານວ່າດ້ວຍການຮ່ວມມື ລະຫວ່າງ ສອງຊາດ. ພາບ: ຈີ້ຢຸງ/VNA

ທ່ານເລຂາທິການໃຫຍ່ ຫງວຽນຝູ໋ຈ້ອງ ພົບປະແລກປ່ຽນຄຳຄິດເຫັນ ກັບທ່ານ ປະທານສະພາ
ສ.ເບລາຣຸດ Anatoly N. Rubinov. ພາບ: ຈີ້ຢຸງ/VNA


ທ່ານເລຂາທິການໃຫຍ່ ຫງວຽນຝູ໋ຈ້ອງ ຢ້ຽມຢາມໂຮງງານຜະລິດ ລົດຍົນ Misk-Maz. ພາບ: ຈີ້ຢຸງ/VNA

ທ່ານເລຂາທິການໃຫຍ່ ພົບປະກັບບັນດາອະດີດນັກຮົບ ເບລາຣຸດ, ຜູ້ທີ່ເຄີຍເຂົ້າຮ່ວມການສູ້ຮົບຢູ່ຫວຽດນາມ. ພາບ: ຈີ້ຢຸງ/VNA 
ປະຕິບັດ: VNA/VNP
ບັນດາບົດທີ່ຖືກນຳສະເໜີ