ចរន្តអគ្គីសនីឆ្លងកាត់បាតសមុទ្រ
ក្នុងរយៈពេល ៤ ឆ្នាំថ្មីៗនេះ ខ្ញុំបានទៅបំពេញការងារ ៤ ជើងដល់កោះលីសើនចំណុះខេត្តក្វាងង៉ាយ។ ខ្ញុំបានគិតជាមុនថា ប្រជាជនរស់នៅលើស្រុកកោះមានទំហំមិនទាន់ពេញ ៥ គីឡូម៉ែត្រការេនេះប្រកបមុខរបរស្នូលតែពីរគឺ៖ ទៅសមុទ្រ និងដាំខ្ទឹមក្រហម ខ្ទឹមស។ ប៉ុន្តែក្នុងលើកទៅបំពេញការងារនេះ នៅពិធីជ្រើសរើសប្រជាជនចូលក្នុងក្រុមកងទ័ពហ្វាងសានាឆ្នាំ ២០១៣ ទើបខ្ញុំដឹងថែមថា លើកោះនេះ ក៏មានមុខរបរចំឡែកមួយ នេះគឺជារបរទាញម៉ាស៊ីនភ្លើង។ មុខរបរទាញម៉ាស៊ីនភ្លើងមានតែគ្រួសារលោក វ៉ហៀនលីញ នៅឃុំអានហាយ ទទួលបន្ទុក និងដោយសារមានម៉ាស៊ីនភ្លើងរបស់លោក ទើប អគ្គីសនីបានបំភ្លឺក្នុងរយៈពេល ៣ យប់ ប្រពឹ្រត្តិឡើងពិធីជ្រើសរើសប្រជាជនចូលក្នុងក្រុមទ័ពហ្វាងសានាឆ្នាំនេះ។
ស្វែងយល់ទើបដឹងថា របរទាញម៉ាស៊ីនភ្លើង ទោះបីមានតែគ្រួសារលោកលីញប្រកបមុខរបរនេះតែប៉ុណ្ណោះ ប៉ុន្តែវាសំខាន់ខ្លាំងណាស់ចំពោះជីវភាពរស់នៅរបស់ប្រជាជននៅលើកោះ។ តាមការរៀបរាប់របស់លោកលីញ៖ “ខ្ញុំបានប្រកបមុខរបរទាញម៉ាស៊ីនភ្លើងជួលលើកោះនេះ រយៈពេល ២៧ ឆ្នាំហើយ។ បងគិតទៅ ស្រុកប្រជុំ ក៏ជួលខ្ញុំយកម៉ាស៊ីនភ្លើងមក ដើម្បីបំភ្លឺ ហើយពិធីបុណ្យសព ពិធីអាពាហ៍ពិពាហ៍ ខ្ញុំក៏ជាអ្នកដំបូងបានប្រជាជននឹកដល់…” ម៉្លោះហើយ ទើបដឹងថាការបំភ្លឺអគ្គីសនីលើកោះឆ្ងាយដាច់ស្រយាលមានអត្ថន័យសំខាន់យ៉ាងណា ចំពោះជីវភាពរស់នៅរបស់ប្រជាជន។
នាខែកញ្ញាឆ្នាំ២០១៤នេះ ខ្ញុំមានឱកាសទៅដល់កោះលីសើន។ ទៅដល់កន្លែងណាក៏ឃើញប្រជាជនរំភើបចិត្ត និងសប្បាយរីករាយរៀបរាប់រឿងកោះជិតមានអគ្គីសនី ពីបណ្តាញជាតិហើយ។ តាមទូកនេសាទមួយ របស់អ្នកនេសាទលើកោះ ខ្ញុំទៅមើលក្រុមដំឡើងខ្សែកាប បង្កប់ដែលកំពុងធ្វើការនៅសមុទ្រ។ ក្រុមដំឡើងខ្សែកាបលើសមុទ្ររួមមាន៖ សាឡង់មួយពង្រាយខ្សែកាប និងនាវាធំពីរគ្រឿងរត់តាមសងខាង ដើម្បីកំណត់ខ្សែកាបនៅក្រោមបាតសមុទ្រ។
ក្រុមហ៊ុនសាជីវកម្មម៉ៅការ Prysmian - Thái Dươngបានចាត់វិស្វករ កម្មករចំនួន ៨០នាក់ រួមនឹងម៉ាស៊ីន ឧបករណ៍ទំនើបជាច្រើន ដើម្បីកសាងខ្សែកាបបង្កប់ ឆ្លងកាត់សមុទ្រទៅដល់កោះលីសើន។ រូបថត៖ ថុងធៀន បណ្តាម៉ែត្រខ្សែកាបចុងក្រោយ ក៏បានតភ្ជាប់ត្រើយដោយសុវត្ថិភាពនៅលើកោះលីសើន។ រូបថត៖ ថុងធៀន |
| «គម្រោងផ្តល់អគ្គីសនីពីប្រព័ន្ធបណ្តាញអគ្គីសនីជាតិ ឲ្យស្រុកកោះលីសើនមានដើមទុនវិនិយោគសរុប ៦២៥ ពាន់លានដុង។ ទ្រង់ទ្រាយនៃគម្រោងរួមមានពីរផ្នែក៖ កំណាត់ខ្សែកាប២២ kv លើអាកាសចំណុះ ស្រុកប៊ិញសើន មានប្រវែង ៨,៧ គីឡូម៉ែត្រ តភ្ជាប់ចូលក្នុងស្ថានីយ៍ប្តូរកម្លាំងអគ្គីសនី ១១០ kv E ១ ៧ យុងក្វឹត។ កំណាត់ខ្សែកាបក្រោមបាតសមុទ្រពីដីគោកទៅដល់កោះលីសើនប្រវែង ២៦,៦ គីឡូម៉ែត្រ។ ទន្ទឹមនឹងចរន្តអគ្គីសនីឆ្លងកាត់បាតសមុទ្រ ក្រុមហ៊ុនអគ្គីសនីវៀតណាមគ្រុប បានទាញបន្ថែមខ្សែកាបអ៊ីនធឺណិត (internet) មានល្បឿនបញ្ជូនទិន្នន័យខ្ពស់ និងទំហំផ្សាយផ្សព្វធំទៅដល់កោះលីសើន។» |
បានដឹងថា អង្គភាពកសាងការដ្ឋាននេះគឺក្រុមហ៊ុនសាជីវកម្មម៉ៅការPrysmia - Thái Dương។ បណ្តាវិស្វករ កម្មករនៃការដ្ឋាននេះសុទ្ធតែជាមនុស្ស ដែលមានបទពិសោធន៍ច្រើន មកពីបណ្តាប្រទេសកោះដូចជា ឥណ្ឌូនេស៊ី និងហ្វីលីពីន។
នៅទីនេះខ្ញុំបានជួបបង Ronald Dolocsaribu វិស្វករអគ្គីសនី ជនជាតិឥណ្ឌូនេស៊ី។ បងនេះ គឺជាអ្នកជំនាញការឈានមុខគេរបស់ប្រទេសឥណ្ឌូនេស៊ី ក្នុងវិស័យទាញខ្សែកាបក្រោមបាត សមុទ្រ ហើយក៏ជាអ្នកដែលបានចូលរួមដោយផ្ទាល់ក្នុងការដ្ឋានទាញខ្សែកាបបង្កប់ពីដីគោកទៅដល់កោះកូតូចំណុះខេត្តក្វាងនីញ កាលពីមុននេះ។
Ronald Dolocsaribu អាចនិយាយភាសាវៀតណាម បងរីករាយឲ្យដឹងថា៖ “ ខ្ញុំបានស្តាប់ព័ត៌មានពិភពលោកនិយាយច្រើនអំពីកោះលីសើន និងបណ្តារឿងរំជួលចិត្តអំពីក្រុមវីរៈកងទ័ព លីសើននាសម័យមុន ដែលបានក្លាហានប្រើទូកតូចឆ្លងកាត់សមុទ្រទៅដល់កោះហ្វាងសា ដើម្បីនេសាទរកស៊ីផង ការពារអធិបតេយ្យភាពរបស់ខ្លួនផង។ ដូច្នេះ ខ្ញុំឆ្ងល់ផង និងរំភើបចិត្តផង នៅពេលទទួលភារកិច្ចកសាងខ្សែកាបបង្កប់ទៅដល់កោះចំឡែកនេះ។”
វិលមកការងារទាញខ្សែកាបបង្កប់ វិស្វករ Ronald Dolocsaribu ឲ្យដឹងថា នាចុងខែកញ្ញា គឺជិតដល់រដូវភ្លៀងព្យុះដូច្នេះសមុទ្រមានរលកធំ ការដំណើរការកាន់តែឆ្ងាយច្រាំង គឺជំរៅកាន់តែកើនឡើង ហើយសណ្ឋាបាតសមុទ្រកាន់តែស្មុគស្មាញ។ មានកន្លែងខ្លះ បាតសមុទ្រជ្រៅជាង ១០០ ម៉ែត្រ ដូច្នេះពិបាកខ្លាំងណាស់សំរាប់អ្នកមុជទឹកកំណត់ទីតាំងខ្សែកាប។ ប៉ុន្តែជាមួយការបេ្តជ្ញារបស់ក្រុមហ៊ុនសាជីវកម្មម៉ៅការ Prysmia - Thái Dương និងបទពិសោធន៍របស់វិស្វករឥណ្ឌូនេស៊ីជាច្រើននាក់ ការងារបានអនុវត្តយ៉ាងត្រឹមត្រូវតាមនឹងផែនការដែលដាក់ចេញ។
នៅពេលបណ្តាម៉ែត្រខ្សែកាបអគ្គីសនីបង្កប់ដំបូងមកដល់វាលស្មៅសមុទ្រ លើកោះលីសើន លោក ង្វៀនហុងថាយ - អគ្គនាយកក្រុមហ៊ុនសាជីវកម្មម៉ៅការ Prysmia - Thái Dương ទើបដកដង្ហើមធូរស្រាលចិត្ត។ លោក ថាយឲ្យដឹងថា៖ “ តាមផែនការ ក្រុមហ៊ុនម៉ៅការយើងខ្ញុំនឹងតភ្ជាប់អគ្គីសនីនៅកោះលីសើននាចុងខែកញ្ញា មុនរដូវភ្លៀងព្យុះឆ្នាំនេះ។ គិតដល់បច្ចុប្បន្ននេះ យើងខ្ញុំជឿជាក់អាចផ្តល់ព័ត៌មានឲ្យអ្នកកាសែតថា ការដ្ឋានទាញខ្សែកាបបង្កប់បញ្ជូនអគ្គីសនីទៅដល់កោះលីលើនសម្រេចជោគជ័យបាន៩៩%។
លីសើនប្រែប្រួល
១% ដែលនៅសល់ តាមសម្តីរបស់លោក ង្វៀនហុងថាយ និយាយ បានសម្រចនៅថ្ងៃទី២៨ ខែកញ្ញា។ ចំពោះការមើលឃើញផ្ទាល់ភ្នែករបស់លោកនាយករដ្ឋមន្ត្រី ង្វៀនតឹនយុង អគ្គក្រុមហ៊ុនអគ្គីសនីភាគកណ្តាល ( EVN CPC –ក្រុមហ៊ុនវិនិយោគការកសាង) សហការជាមួយគណៈកម្មាធិការប្រជាជនខេត្តក្វាងង៉ាយ បានរៀបចំពិធីសម្ពោធគម្រោងផ្តល់អគ្គីសនីដោយខ្សែកាបបង្កប់ឲ្យស្រុកកោះលីសើន។
“អគ្គីសនីមកដល់ហើយ” គឺជាពាក្យ ដែលប្រជាជនរស់នៅកោះលីសើនចំនួនជាង ២២ ពាន់នាក់ និយាយច្រើនបំផុតក្នុងថ្ងៃនេះ។ ប្រជាជនរស់លើកោះ អ្នកណាក៏សប្បាយចិត្ត និងអ្នកណាក៏មានគម្រោងសំរាប់រៀងៗខ្លូន។ លោកស្រី ផាមធីហឿង អនុប្រធានគណៈកម្មា ធិការប្រជាជនស្រុកកោះលីសើនឲ្យដឹងថា៖ “មុនពេលគ្មានបណ្តាញអគ្គីសនីជាតិ ប្រជាជនលីសើនយើងខ្ញុំ “ស្រេក” ច្រើនមុខណាស់ ! អ្នកនេសាទ “ស្រេក” ទីកន្លែងកែច្នៃជលផល កសិករ“ស្រេក” ទឹក និងមធ្យោបាយស្រោចស្រពឲ្យដើមខ្ទឹមក្រហម ខ្ទឹមស។ កូនសិស្ស “ស្រេក” បច្ចេកវិទ្យាព័ត៌មាន។ បុគ្គលិក “ស្រេក” អ៊ីនធឺណិត (internet) ដើម្បីបំរើការងារ។ រីឯប្រជាជនទូទាំងស្រុកកោះ “ស្រេក” ទឹកនៅរដូវប្រាំង។ មានអគ្គីសនី យើងខ្ញុំដោះស្រាយបាន ចំណោទ “ស្រេក” របស់ស្រុកកោះនេះ។”
ក្តីសប្បាយរីករាយនៅពេលអគ្គីសនីមកដល់ សម្តែងឲ្យឃើញលើទឹកមុខរបស់លោក ត្រឹនភុកស៊ីញ ប្រធានមន្ទីរអប់រំនិងបណ្តុះបណ្តាលស្រុកកោះលីសើន។ លោក ស៊ីញឲ្យដឹងថា ខ្វះអគ្គីសនី បានជះឥទ្ធិពលយ៉ាងខ្លាំងដល់ការបង្ហាត់បង្រៀន និងការរៀនសូត្ររបស់គ្រូនិងកូនសិស្ស ជាពិសេសគឺមុខវិជ្ជាបច្ចេកវិទ្យាព័ត៌មាន។ តាំងពីមុន រហូតដល់បច្ចុប្បន្ននេះ កូនសិស្សនៅលើស្រុកកោះលីសើនរៀនតម មានន័យថារៀនតែទ្រឹស្តីប៉ុណ្ណោះ គឺមិនអាចអនុវត្តលើកុំព្យូទ័រ ។ មានបណ្តាញអគ្គីសនីជាតិ ផ្នែកអប់រំនៅស្រុកលីសើននឹងអនុវត្ត និងប្រើប្រាស់យ៉ាងទូលាយបច្ចេកវិទ្យាព័ត៌មានក្នុងសាលារៀន។
លោកនាយករដ្ឋមន្ត្រី ង្វៀនតឹនយុង អញ្ជើញចូលរួមពិធីសម្ពោធគម្រោងផ្តល់អគ្គីសនីពីប្រព័ន្ធអគ្គីសនីជាតិ ដោយខ្សែកាបបង្កប់ ឲ្យស្រុកកោះលីសើន។ រូបថត៖ ដាំងឡឹម អគ្គីសនីជួយប្រជាជនធានាការស្រោចស្រព ខ្ទឹមក្រហម ខ្ទឹមសជាង ៤០០ហិកតា នៅលើកោះលីសើន។ រូបថត៖ ថុងធៀន
|
នាចុងថ្ងៃ លោក វ៉ហៀនលីញ បានហៅទូរស័ព្ទចល័តអញ្ជើញយើងខ្ញុំមកដល់ផ្ទះគាត់ ដើម្បីចូលរួមពិធីមហោឡារិកមួយ។ តាមពិត នាយប់នេះ គ្រួសារគាត់រៀបចំគ្រឿងសំណែន ដើម្បីថ្វាយទីសក្ការបូជាវង្សត្រកូល វ៉ រាយការណ៍ជូនបុព្វបុរសអំពីការដំណើរជើងនេសាទដំបូងនៅសមុទ្រ បន្ទាប់ពី ២៧ ឆ្នាំ ប្រកបមុខរបរទាញម៉ាស៊ីនភ្លើង។ លោក លីញសប្បាយរីករាយនិយាយថា៖ បុព្វបុរសនៃគ្រួសារយើងខ្ញុំគឺលោកវ៉វ៉ាន់ឃាត – ប្រធានក្រុមកងទ័ពហ្វាងសា - ទទួលព្រះរាជបញ្ជារបស់ស្តេច បញ្ជូនទ័ពមកដល់កោះហ្វាងសា បោះបង្គោលកំណត់ អធិបតេយ្យភាព នាឆ្នាំ១៧៦៨។ សព្វថ្ងៃនេះ កោះមានអគ្គីសនីហើយ ដូច្នេះ ខ្ញុំបោះបង់ចោល មុខរបរទាញម៉ាស៊ីនភ្លើង ដើម្បីវិលត្រឡប់មកមុខរបរចាស់របស់ដូនតាវិញ គឺចេញទៅសមុទ្រដល់ហ្វាងសានេសាទ។
ក៏ក្នុងពីធីថ្វាយសំណែននៅទីសក្ការបូជាវង្សក្រកូល វ៉ យើងខ្ញុំបានជួបមនុស្សធ្លាប់ស្គាល់ម្នាក់។ នេះគឺបង វ៉វ៉ាន់អ៊ូត – ចៅតវង្សត្រកូលវ៉ នៅលើកោះលីសើន ដែលខ្ញុំបានមានឱកាសនិយាយ ជាមួយគ្នា នៅពេលមកដល់កោះលីសើនឆ្នាំមុន។ និយាយអំពីរឿងនេសាទ ដុះគំនិត បងអ៊ូតអះអាងយ៉ាងជឿជាក់ថា៖ កោះមានអគ្គីសនី ប្រជាជនចេញទៅសមុទ្រដូចពួកយើងស្រួលណាស់បងអើយ ! ឥឡូវនេះគ្មានក្តីខ្វល់អំពីការខ្វះអគ្គីសនីសាកអាគុយទុកបំរុង ! គ្មានក្តីខ្វល់ ពីជលផលចុះថោក ឬត្រូវគេសង្កត់តំលៃ មកពីគ្មានលក្ខណៈរក្សាទុក។ សប្បាយជាងគឺទឹកកក វត្ថុធាតុដើមសំខាន់ចំបង សំរាប់រក្សាទុកត្រីចុះថោក ១/៣ បើប្រៀបធៀបនឹងមុននេះ”។
បានដឹងថា នៅកោះលីសើន កាលពីមុននេះ ទឹកកកមួយដើមសំរាប់រក្សាទុកជលផលលើទូកដែលទៅនេសាទរយៈពេលច្រើនថ្ងៃ មានតំលៃលក់នៅលីសើនប្រមាណជិត ៣០ ពាន់ដុង។ តាំងពីពេលមានអគ្គីសនី រោងចក្រផលិតទឹកកកត្រូវបានកសាងឡើង តំលៃទឹកកក មួយដើមនៅសល់តែ ៨ ពាន់ដុង។ ប្រការនេះបានកាត់បន្ថយចំណាយគួរកត់សំគាល់សំរាប់នាវាដែលមានអនុភាពធំរបស់ស្រុកកោះ ចំនួន ៤០០គ្រឿង និងរួមចំណែកបង្កើនចំណូលឲ្យអ្នកនេសាទផងដែរ។
រឿងសប្បាយអំពីអគ្គីសនីនៅទីសក្ការបូជារបស់វង្សត្រកូល វ៉ ស្មានថាគ្មានវគ្គបញ្ចប់នោះទេ នៅពេលបងស្រី លឹវធីប៊ិញ ប្រព័ន្ធរបស់លោក វ៉ហៀនលីញ និយាយបន្ត៖ “ កុំស្មានថាអគ្គីសនីមកដល់ អ្នកនេសាទពួកបងស្រួលណ៎ះ! រីឯពួកស្ត្រីយើងខ្ញុំដែលប្រកបមុខរបរដាំខ្ទឹមក្រហម ខ្ទឹមស ក៏បានទំនេរហើយ ”។ បងស្រីប៊ិញអួតថា តាំងពីមានអគ្គីសនី ផ្ទះគាត់ទិញប្រព័ន្ធបូមស្រោចស្វ័យប្រវត្តិភ្លាម ដើម្បីបំរើការដាំខ្ទឹមក្រហម ខ្ទឹមស។
ឃើញថាមុខរបរដាំខ្ទឹមក្រហម ខ្ទឹមសនៅកោះលីសើនធ្លាប់ល្បីឈ្មោះទូទាំងប្រទេសតាំងពីយូរលង់មកហើយ ដល់សព្វថ្ងៃនេះ មានឱកាសអភិវឌ្ឍជាងទៀត នៅពេលអគ្គីសនីមកដល់ ធានាលក្ខណៈស្រោចស្រពសំរាប់ជាង ៣០០ ហិកតា និងឆ្អើរផលិតផលក្រោយពេលប្រមូលផល។
ថ្ងៃបន្ទាប់ខ្ញុំរៀបចំអីវ៉ាន់ចាកចេញកោះលីសើន បន្ទាប់ពីសម្រេចជើងបំពេញការងារ ម្ចាស់ផ្ទះសំណាក់ ប៊ិញអៀន គឺបងង្វៀនថើយ នៅភូមតី (ឃុំអានវិញ) រីករាយប្រាប់ថា៖ “ ឆ្លៀតរឿងសប្បាយអគ្គីសនីមកដល់កោះចុះតំលៃ ១/៣ នៃថ្លៃស្នាក់នៅជូនអ្នកកាសែតដែលជាភ្ញៀវធ្លាប់ស្គាល់” បងថើយក៏ឲ្យដឹងថា លើកក្រោយខ្ញុំទៅដល់កោះលីសើន ផ្ទះសំណាក់ប៊ិញអៀនរបស់បងនឹងឡើងកំរិត ទៅជាសណ្ឋាគាររួមមានគ្រប់បរិក្ខារទំនើបដូចជា៖ ម៉ាស៊ីនត្រជាក់ ធុងទឹកក្តៅ ត្រជាក់ wifi ឥតគិតថ្លៃ។
ឆ្លៀតរឿងនេះ ខ្ញុំនឹកដល់ការនិយាយជាមួយលោកស្រីអនុប្រធានស្រុក ង្វៀនធីហឿង។ លោកស្រីហឿង ឲ្យដឹងថា បន្ទាប់ពីកោះមានអគ្គីសនី សហគ្រាសទេសចរណ៍ជាច្រើន បានគាំទ្រ សុំវិនិយោគនៅស្រុកលីសើន។ ក្នុងពេលឆាប់ៗនេះ កោះនឹងមានសណ្ឋាគារ តំបន់ទេសចរណ៍ ជាច្រើន ដែលមានទ្រង់ទ្រាយ ដើម្បីបំរើភ្ញៀវទេសចរណ៍យ៉ាងជំនាញជាង។ គ្រោងដល់ចុងឆ្នាំ ២០១៤ នេះ កោះនឹងមានសណ្ឋាគារលំដាប់ផ្កាយបីចំនួន២ បានសម្រេច ដើម្បីបំរើភ្ញៀវទេសចរណ៍។
ត្រឡប់មករដ្ឋធានីហាណូយវិញ នៅពេលផ្លូវថ្នល់ត្រចះត្រចង់ដោយពន្លឺចង្កៀង ផ្កា ដែលរៀបចំឲ្យប្រព្រឹត្តការណ៍អនុស្សាវរីយ៍ ៦០ ឆ្នាំនៃទិវារំដោះរដ្ឋធានីហាណូយ ខ្ញុំក៏នឹកដល់បរិយាកាសអ៊ូអរសប្បាយនៅកោះលីសើន។ នៅទីនោះ សន្ទុះនៃជីវភាពរស់នៅពោរពេញថាមពលក៏ចាប់ផ្តើមភ្ញាក់ រួមនឹងការសន្យាអំពីអនាគតល្អប្រសើរ ធ្វើឲ្យត្រចះត្រចង់ស្រុកកំណើតរបស់ក្រុមវីរៈកងទ័ពសមុទ្រហ្វាងសារ៕
អត្ថបទ៖ ថុងធៀន រូបថត៖ ថុងធៀន ដាំងឡឹម ង៉ុកហា
