វៀតណាមបង្កើនកិច្ចសហប្រតិបត្តិការសន្តិសុខជាមួយកម្ពុជានិងឡាវ
នាព្រឹកថ្ងៃទី១៧ ខែសីហា ឆ្នាំ២០១៧ នាយករដ្ឋមន្ត្រីរដ្ឋាភិបាលវៀតណាម លោក Nguyen Xuan Phuc បានទទួលជួបសន្ទនា ជាមួយ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ព្រះរាជាណាចក្រកម្ពុជា សម្ដេចក្រឡាហោម ស ខេង និងរដ្ឋមន្ត្រីក្រសួងសន្តិសុខឡាវ លោក Somkeo Silavong ក្នុងឱកាសអញ្ជើញ ចូលរួមជំនួបមិត្តភាពរវាងរដ្ឋមន្ត្រីក្រសួងនគរបាលវៀតណាម- ក្រសួងសន្តិសុខ ឡាវនិងក្រសួងមហាផ្ទៃព្រះរាជាណាចក្រកម្ពុជាដែលប្រព្រឹត្តទៅនៅវៀតណាម។
ក្នុងការទទួលជួបសន្ទនាជាមួយឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ព្រះរាជាណាចក្រកម្ពុជា សម្ដេចក្រឡាហោម ស ខេង នាយករដ្ឋមន្ត្រីវៀតណាម លោក Nguyen Xuan Phuc បានអះអាងថា៖ វៀតណាមជានិច្ចកាលសាមគ្គីគាំទ្រ ប្រជាជននិងរាជរដ្ឋាភិបាលកម្ពុជាតាមទិសស្លោក «ប្រទេសជិតខាងល្អប្រសើរ មិត្តភាពប្រពៃណី សហប្រតិបត្តិការលើគ្រប់ជ្រុងជ្រោយ និរន្តរភាពយូរអង្វែង»។ នាយករដ្ឋមន្ត្រី Nguyen Xuan Phuc បានស្នើឲ្យកំលាំងនគរបាល នៃប្រទេសទាំង ពីរបន្តសហការប្រយុទ្ធប្រឆាំង រាល់ឧបាយកលបំបែកបំបាក ស្មារតីសាមគ្គីភាព មិត្តភាពទ្វេភាគី សហការពិគ្រោះយោបល់ និងគាំទ្រគ្នាទៅវិញទៅមកលើបណ្ដា វេទិកាអន្តរជាតិពហុភាគី ស្តីពីការប្រយុទ្ធប្រឆាំងនឹងបទល្មើស។ កំលាំងនគរបាល វៀតណាមនិងកម្ពុជាសហការយ៉ាងជិតស្និទ្ធ ជាមួយស្ថាប័នសមត្ថកិច្ចពាក់ព័ន្ធនានា ដើម្បីធានាសន្តិសុខសុវត្ថិភាពរបៀង ព្រំដែនវៀតណាម-កម្ពុជា កសាងខ្សែ ព្រំដែនសន្តិភាពស្ថិរភាពមិត្តភាព សហប្រតិបត្តិការនិងអភិវឌ្ឍន៍។
នៅជំនួបសន្ទនាជាមួយរដ្ឋមន្ត្រីសន្តិសុខឡាវ លោក Somkeo Silavong នាយករដ្ឋមន្ត្រីវៀតណាម លោក Nguyen Xuan Phuc បានលើកច្បាស់ថា៖ ក្នុងកាលៈទេសៈស្ថានភាពពិភពលោក មានបំរ៉ែបំរួលស្មុគស្មាញ កំលាំងនគរបាល វៀតណាមនិងឡាវ គប្បីបន្តសហការអនុវត្តល្អ នូវកិច្ចព្រមព្រៀងរបស់ថ្នាក់ដឹកនាំ ជាន់ខ្ពស់វៀតណាម និងឡាវដើម្បីធានាសន្តិសុខ នយោបាយសណ្តាប់ធ្នាប់សុវត្ថិភាពសង្គម នៃប្រទេសនិមួយៗ។ រួមជាមួយគ្នានេះ ភាគីទាំងពីរប្រយុទ្ធប្រឆាំង សកម្មនឹងបទល្មើស ជាពិសេសគឺការជួញដូរគ្រឿងញៀនអាវុធគ្រឿងផ្ទុះឆ្លង ព្រំដែនខុសច្បាប់ មិនអនុញ្ញតឲ្យកំលាំងអមិត្តណាប្រើប្រាស់តំបន់ដែនដី របស់ ប្រទេសនេះ ដើម្បីបង្កមហន្តរាយទៅលើសន្តិសុខសណ្តាប់ធ្នាប់ នៃប្រទេសនោះឡើយ៕
តាម VOV5 - វិទ្យុសំឡេងវៀតណាម