នាយករដ្ឋមន្ត្រីហុងគ្រីលោក Orbán Viktor និងលោកជំទាវកំពុងមានដំណើរទស្សនកិច្ចជាផ្លូវការនៅវៀតណាមក្នុងរយៈពេល៣ថ្ងៃ។ នេះជាព្រឹត្តិការណ៍សំខាន់ក្នុងទំនាក់ទំនងវៀតណាម-ហុងគ្រី បើកចេញឱកាសសហប្រតិបត្តិការជាច្រើនរួមទាំងកិច្ចព្រមព្រៀងសហប្រតិបត្តិការមួយចំនួនគ្រោងនឹងបានចុះហត្ថលេខាក្នុងដំណើរទស្សនកិច្ចនេះដែរ។ ជាពិសេស ដំណើរទស្សនកិច្ចនេះនឹងជាឱកាសសម្រាប់ភាគីទាំងពីរ ព្រមព្រៀងលើវិធានការជម្រុញកិច្ចសហប្រតិបត្តិការលើគ្រប់វិស័យ ក្នុងនោះមានទាំងវិស័យពាណិជ្ជកម្មនិងវិនិយោគផងដែរ។
វៀតណាមនិងហុងគ្រីត្រៀមខ្លួនជាស្រេចសម្រាប់ដំណាក់កាលសហប្រតិបត្តិថ្មី
ហុងគ្រីនិងវៀតណាមមានរយៈពេល ៦៧ ឆ្នាំបង្កើតទំនាក់ទំនងមិត្តភាពនិងការទូតយ៉ាងល្អប្រសើរ។ រដ្ឋាភិបាលហុងគ្រីបានចាត់ទុក វៀតណាមជាដៃគូយុទ្ធសាស្ត្រនៅអាស៊ីអាគ្នេយ៍។ នាប៉ុន្មានឆ្នាំកន្លងទៅ ប្រទេសទាំងពីរបានពង្រឹងនិងពង្រីកដោយឥតឈប់ឈរនូវកិច្ចសហប្រតិបត្តិការលើគ្រប់វិស័យឈរលើមូលដ្ឋានមានផលប្រ យោជន៍រួមនិងគោរពរាល់វិស័យមានឧត្តមភាព ជាពិសេសគឺពាណិជ្ជកម្មនិងវិនិយោគ។
ចំណុចភ្លឺក្នុងកិច្ចសហប្រតិបត្តិការពាណិជ្ជកម្មទ្វេភាគី
នាប៉ុន្មានឆ្នាំថ្មីៗនេះអាចឃើញបានកំណើនគួរឲ្យកត់សម្គាល់នៃទំនាក់ទំនង ពាណិជ្ជកម្មទ្វេភាគី ប៉ុន្តែបរិមាណនៅតែស្ថិតក្នុងកម្រិតដូចការរំពឹងទុក។ នៅថ្នាក់រដ្ឋាភិបាល នាពេលកន្លងទៅ ប្រទេសទាំងពីរបានខិតខំប្រឹងប្រែង ជម្រុញកិច្ចសហប្រតិបត្តិការទ្វេភាគី។ ភាគីទាំងពីរបានរក្សារាល់កិច្ចប្រជុំជាប្រចាំរបស់គណៈកម្មាធិការចម្រុះសហប្រតិបត្តិការសេដ្ឋកិច្ចជាវេទិកាមានប្រសិទ្ធិភាពមួយសម្រាប់បង្កើតខ្សែសហ ប្រតិបត្តិការដែរ។ ទន្ទឹមជាមួយគ្នានោះ វៀតណាមនិងហុងគ្រីក៏បានបង្កើនការរៀបចំសិក្ខាសាលានានា ការពន្លឿនពាណិជ្ជកម្ម តាមរយៈដំណើរទស្សនកិច្ចរបស់សហគ្រាសនិងអ្នកជំនាញការ។
តាមតួរលេខរបស់អគ្គនាយកដ្ឋានគយវៀតណាមថា ទំហំពាណិជ្ជកម្មទ្វេភាគីហុងគ្រីនិងវៀតណាមឆ្នាំ២០១៦ទទួលបានជិត២៧០លានដុល្លាអាមេរិក កើន៣៧% បើប្រៀបនឹងឆ្នាំ២០១៥។ ក្នុងនោះ ការនាំចេញរបស់វៀតណាមកើន ៤៥,៥% ការនាំចូលកើន ៣៣,៩%។ មុខទំនិញនាំចេញទៅហុងគ្រីចំនួន៣ប្រភេទជាប្រៀបខ្លាំងរបស់វៀតណាមគឺសម្លៀកបំពាក់វាយនភណ្ឌ អេឡិចត្រូនិកនិងមធ្យោបាយដឹកជញ្ជូនខណៈដែលមុខទំនិញនាំចូលជួរមុខរបស់ហុងគ្រីមកវៀតណាមចំនួន៣ប្រភេទនោះគឺថ្នាំពេទ្យនិងផលិតផលឱសថ មធ្យោបាយធ្វើដំណើរសាធារណៈនិងទំនិញកែច្នៃ។
គិតដល់ឆ្នាំ២០១៦ ហុងគ្រីមានគំរោងការ FDI ចំនួន១៥ ដែលកំពុងមានសុពលភាពនៅវៀតណាមដោយទុនចុះបញ្ជីសរុបគឺ ៥០ លានដុល្លាអាមេរិកឈរលំដាប់ថ្នាក់ទី ៥៥ ក្នុងចំណោមប្រទេសនិងតំបន់ដែនដីទាំង១០៥ ដែលកំពុងធ្វើការវិនិយោគនៅវៀតណាម។ គម្រោងការទាំងអស់នេះគឺប្រមូលផ្តុំលើវិស័យកែច្នៃ ផ្សព្វផ្សាយ ការធ្វើ អាជីវកម្មអចលនៈទ្រព្យក្រោមរូបភាព ១០០% ជាទុនវិនិយោគបរទេសនិងកិច្ចសន្យាសហប្រតិបត្តិការធ្វើអាជីវកម្មជាដើម។ ស្តីពីកិច្ចសហប្រតិបត្តិការអភិវឌន៍ ភាគីទាំងពីរបានចុះហត្ថលេខាលើកិច្ចព្រមព្រៀងសហប្រតិបត្តិការជាច្រើន ដើម្បីជួយឧបត្ថម្ភរាល់គំរោងការអភិវឌ្ឍន៍នៅវៀតណាម។ សំដៅជម្រុញថែមទៀតកិច្ចសហប្រតិបត្តិការទ្វេភាគី ហុងគ្រីបានបើកការិយាល័យតំណាងនៅទីក្រុងហូជីមិញផងដែរ។
ដាក់ចេញគោលដៅសម្រាប់ដំណាក់កាលអភិវឌ្ឍន៍ថ្មី
ឈរលើមូលដ្ឋាននោះ ដំណើរទស្សនកិច្ចរបស់នាយករដ្ឋមន្ត្រីហុងគ្រីមកវៀតណាមលើកនេះ សំដៅដាក់ចេញគោលដៅអភិវឌ្ឍន៍នៃទំនាក់ទំនងនយោបាយនិងសេដ្ឋកិច្ចរវាងប្រទេសទាំងពីរនាប៉ុន្មានឆ្នាំខាងមុខ។
អមដំណើរជាមួយនាយករដ្ឋមន្ត្រីមានវត្តមានគណៈប្រតិភូសហគ្រាសចំនួន ៧០ អង្គភាព ហើយភាគីទាំងពីរនឹងរៀបចំវេទិកាសហគ្រាសដើម្បីសហគ្រាសនៃប្រទេសទាំងពីរជួបប្រាស្រ័យផ្ទាល់ជម្រុញកិច្ចសហប្រតិបត្តិការ។ ជាប្រទេសដែលកំពុងអភិវឌ្ឍន៍ កិច្ចសហប្រតិបត្តិការទ្វេភាគីរវាងវៀតណាមនិងហុងគ្រីនឹងមានការផ្លាស់ប្តូរ នាពេលខាងមុខ ជាពិសេស ខណៈដែលកិច្ចព្រមព្រៀងពាណិជ្ជកម្មសេរីវៀតណាម -EU (EVFTA) មានសុពលភាព។
ឈរលើមូលដ្ឋានរយៈពេល៦៧ឆ្នាំរួមទាំងសមិទ្ធិយ៉ាងល្អប្រសើរដែលទទួលបាននោះ ដំណើរទស្សនកិច្ចជាផ្លូវការនៅវៀតណាមរបស់នាយករដ្ឋមន្ត្រីហុងគ្រីលោក Orbán Viktor និងលោកជំទាវសំដៅអះអាងនូវគោលនយោបាយគោរពនិងបំណង បង្កើនកិច្ចសហប្រតិបត្តិការលើគ្រប់វិស័យជាមួយវៀតណាម។ ដំណើរទស្សនកិច្ចក៏ជាឱកាសដើម្បីភាគីទាំងពីរផ្លាស់ប្តូរវិធានការជម្រុញកិច្ចសហប្រតិបត្តិការទ្វេភាគីលើគ្រប់វិស័យ ជាពិសេសលើវិស័យសេដ្ឋកិច្ច ពាណិជ្ជកម្ម វិនិយោគ អប់រំ បណ្តុះបណ្តាល សុខាភិបាល បរិស្ថាន សន្តិសុខ ការពារជាតិ វប្បធម៌ ទេសចរណ៍ និងផ្លាស់ប្តូរលើបណ្តាបញ្ហាតំបន់និងអន្តរជាតិដែលមានការយកចិត្តទុកដាក់ដូចគ្នា៕
តាម VOV5-វិទ្យុសម្លេងវៀតណាម