ព័ត៌មាន
ប្រធានាធិបតីរដ្ឋអ៊ីស្រាអែលនិងលោកជំទាវបញ្ចប់ប្រកបដោយជោគជ័យដំណើរទស្សនកិច្ចថ្នាក់រដ្ឋនៅវៀតណាម
ប្រធានាធិបតីរដ្ឋអ៊ីស្រាអែលលោក Reuven Ruvi Rivlin (ខាងស្ដាំ) និងប្រធានរដ្ឋវៀតណាមលោក Tran Dai Quang (រូបថត៖Nhan Sang/TTXVN)
នាយប់ថ្ងៃទី២៥ ខែមិនា ឆ្នាំ២០១៧ ប្រធានាធិបតីរដ្ឋអ៊ីស្រាអែល លោក Reuven Ruvi Rivlin និងលោកជំទាវបានចាកចេញ ពីទីក្រុងហាណូយ បញ្ចប់ប្រកបដោយជោគជ័យដំណើរទស្សនកិច្ចថ្នាក់រដ្ឋនៅវៀតណាម ចាប់ពីថ្ងៃទី១៩ ដល់ថ្ងៃទី២៥ ខែមិនា ឆ្នាំ២០១៧។ នៅបណ្ដាជំនួបជាមួយថ្នាក់ដឹកនាំវៀតណាម ប្រធានាធិបតី លោក Reuven Rivlin និងថ្នាក់ដឹកនាំវៀតណាមសុទ្ធតែអះអាងនូវការប្ដេជ្ញាចិត្តបង្កើនថែមទៀត ទំនាក់ទំនងសហប្រតិបត្តិការ នាពេលខាងមុខ ជាពិសេសលើវិស័យសេដ្ឋកិច្ច វិទ្យាសាស្ត្របច្ចេកវិទ្យា។ ភាគីទាំងពីរជឿជាក់ថា កិច្ចសហប្រតិបតិ្តការដ៏ស្អិតរមួត រវាងរដ្ឋាភិបាលទាំងពីរ សហគ្រាសនៃប្រទេសទាំងពីរ នឹងនាំទំនាក់ទំនងសេដ្ឋកិច្ច ពាណិជ្ជកម្មទ្វេភាគីអភិវឌ្ឍន៍យ៉ាងខ្លាំងក្លាថែមទៀត។ ភាគីទាំងពីរបានឯកភាព លើការបង្កើនទំហំពាណិជ្ជកម្មទ្វេភាគីឡើងដល់ទៅ៣ពាន់លានដុល្លាអាមេរិកនា ប៉ុន្មានឆ្នាំខាងមុខ។
ក្នុងក្របខ័ណ្ឌដំណើរទស្សនកិច្ចលើកនេះ ប្រធានាធិបតីលោក Reuven Ruvi Rivlin និង លោកជំទាវបានអញ្ជើញដាក់កម្រងផ្កា នៅវិធានគោរពវិញ្ញាណក្ខ័ន្ទវីរៈយុទ្ធជនវៀតណាម ទៅគោរពវិញ្ញាណក្ខ័ន្ទប្រាង្គតម្កល់សពលោកប្រធានហូជីមិញ ចូលរួមវេទិកាសហគ្រាសវៀតណាម-អ៊ីស្រាអែល និងសកម្មភាពផ្សេងជាច្រើន ទៀតនៅរដ្ឋធានីហាណូយ ទីក្រុងហូជីមិញ និងខេត្តក្រុងមួយចំនួនទៀតនៅវៀតណាមផងដែរ៕
តាម VOV5 - វិទ្យុសំឡេងវៀតណាម